2 Tikhronike
26 Bonkhe bantfu bakaJuda base batsatsa Uziya+ lobekaneminyaka lengu-16 budzala, bambeka kutsi abe yinkhosi esikhundleni sababe wakhe Amasiya.+ 2 Wakha kabusha i-Elathi+ futsi wayibuyisela kaJuda ngemuva kwekutsi inkhosi* seyingcwatjwe lapho kwangcwatjwa khona bokhokho bayo.+ 3 Uziya+ bekaneminyaka lengu-16 budzala nakaba yinkhosi futsi wabusa iminyaka lengu-52 eJerusalema. Libito lamake wakhe bekunguJekoliya waseJerusalema.+ 4 Wachubeka enta lokuhle emehlweni aJehova njengobe nje babe wakhe Amasiya bekentile.+ 5 Wachubeka afuna Nkulunkulu ngemalanga ekuphila kwaZakhariya lowamfundzisa kwesaba Nkulunkulu weliciniso. Ngaleso sikhatsi, bekafuna Jehova futsi Nkulunkulu weliciniso wamenta waphumelela.+
6 Wahamba wayokulwa nemaFilisti+ futsi wafohla elubondzeni lwaseGathi,+ lwaseJabne+ nelwase-Ashdodi.+ Wabese wakha emadolobha esifundzeni sase-Ashdodi kanye nasendzaweni yemaFilisti. 7 Nkulunkulu weliciniso wachubeka nekumsita nakalwa nemaFilisti, nema-Arabiya+ lebekahlala eGuri-bhali, waphindze wamsita nakalwa nemaMeyunimu. 8 Ema-Amoni+ acala kuletsa tetfulo* ku-Uziya. Kancane kancane tidvumo takhe tasakateka taze tayofika eGibhithe ngobe besekanemandla kakhulu. 9 Ngetulu kwaloko, Uziya wakha imibhoshongo+ eJerusalema ngaseGedeni Lelisekoneni,+ ngaseGedeni Lelisesihosheni+ nangaseTinsikeni futsi wayicinisa. 10 Waphindze wakha nemibhoshongo+ ehlane futsi wagubha* imitfombo yemanti (ngobe bekanemfuyo lenyenti); wenta lokufanako naseShefela kanye nasendzaweni lebekile. Bekanebalimi nebantfu labasebenta emasimini emagilebisi etintsabeni naseKhameli, ngobe bekakutsandza kulima nekufuya.
11 Ngetulu kwaloko, Uziya waba nelibutfo lelihlomele imphi. Beliphuma liyomisa emathende lingemacembu lahlelwe kahle. Belibalwa liphindze libhaliswe+ nguJeyiyeli mabhalane+ naMaseya indvuna lebeyingaphansi kwaHananiya, lenye yetikhulu letingaphansi kwenkhosi. 12 Nasetiphelele tinhloko temindeni lebetiphetse lamasotja latingwazi, betingu-2 600. 13 Emasotja lahlomile labekangephansi kwaletingwazi futsi alungele imphi bekangu-307 500. Bekalibutfo lemphi lelinemandla lebelivikela inkhosi etitseni.+ 14 Uziya wahlomisa lonkhe lelibutfo ngemahawu, ngetikhali,+ ngetigcoko tekutivikela, ngetembatfo temphi tekutivikela,+ ngebutjoki kanye nematje etidubulelo.+ 15 Ngetulu kwaloko, eJerusalema wenta imishini yemphi lebeyisungulwe bonjiniyela; yabekwa emibhoshongweni+ nasemakoneni elubondza futsi beyidubula ngebutjoki nangematje lamakhulu. Ngako, tidvumo takhe tasakateka etindzaweni letikhashane ngobe bekatfola lusito lolunyenti futsi waba nemandla lamakhulu.
16 Nome kunjalo, ngekushesha nje nasekanemandla wase uyatiphakamisa* futsi loko kwamletsela inhlekelele. Akazange etsembeke kuJehova Nkulunkulu wakhe ngobe wangena ethempelini laJehova wayoshisa imphepho e-al’thare lemphepho.+ 17 Ngekushesha nje Azariya umphristi nalabanye baphristi baJehova labanesibindzi labangu-80 bamlandzela. 18 Bayicondza iNkhosi Uziya base bayekhuta kamatima, batsi: “Ye-Uziya, akukafaneli kutsi wena ushisele Jehova imphepho!+ Baphristi kuphela lokufanele bashise imphepho ngobe bayintalelwane ya-Aroni+ futsi bangcwelisiwe. Phuma kulendzawo lengcwele ngobe wente sento sekungetsembeki futsi angeke utfole ludvumo kuJehova Nkulunkulu ngalesento sakho.”
19 Kodvwa Uziya lobekaphetse sitja sekushisela imphepho afuna kushisa imphepho, watfukutsela kakhulu;+ watsi asetfukutselele labaphristi, wacalwa bulephelo+ ebuntini embikwebaphristi endlini yaJehova eceleni kweli-al’thare lemphepho. 20 Watsi Azariya umphristi lomkhulu kanye nabo bonkhe baphristi nabagucukela ngakuye, babona kutsi sewushaywe ngebulephelo ebuntini. Ngako bamkhiphela ngephandle ngekushesha futsi naye waphutfuma waphuma ngobe bekashaywe nguJehova.
21 INkhosi Uziya yaba nebulephelo kwaze kwaba lilanga leyafa ngalo futsi beyisolo ihlala yodvwa endlini leseceleni inebulephelo+ ngobe beyikhishiwe endlini yaJehova. Jothamu indvodzana yayo besekunguye lobuke indlu* yenkhosi, ehlulela nebantfu kulelive.+
22 Lomunye umlandvo wa-Uziya, kusukela ekucaleni kuyofika ekugcineni, wabhalwa ngumphrofethi Isaya+ indvodzana ya-Amozi. 23 Uziya wabese uyafa, walala nabokhokho bakhe, kodvwa yena wangcwatjwa esigangeni lebesingaphandle kwendzawo lebekungcwatjwa kuyo emakhosi, ngobe bebatsi: “Unebulephelo.” Indvodzana yakhe Jothamu+ yaba yinkhosi ngemuva kwakhe.