Incwadzi Yekucala YeTikhronike
15 Wachubeka nekutakhela tindlu eDolobheni laDavide futsi walungisa indzawo yeLibhokisi laNkulunkulu weliciniso, wamisa lithende lalo.+ 2 Kwaba ngaleso sikhatsi lapho Davide atsi: “Kute umuntfu lokufanele etfwale Libhokisi laNkulunkulu weliciniso ngaphandle kwemaLevi, ngobe Jehova ukhetse wona kutsi etfwale leLibhokisi laJehova futsi amkhonte ngaso sonkhe sikhatsi.”+ 3 Davide wabese uhlanganisa onkhe ema-Israyeli eJerusalema kute atokhuphula Libhokisi laJehova aliyise endzaweni lebekayilungiselele lona.+
4 Davide wahlanganisa intalelwane ya-Aroni+ neyaLevi:+ 5 KumaKhohati, bekungu-Uriyeli indvuna kanye nabomnakabo labangu-120; 6 kumaMerari, bekungu-Asaya+ indvuna kanye nabomnakabo labangu-220; 7 kumaGeshomu, bekunguJoweli+ indvuna kanye nabomnakabo labangu-130; 8 entalelwaneni ya-Elisafani,+ bekunguShemaya indvuna kanye nabomnakabo labangu-200; 9 entalelwaneni yaHebroni, bekungu-Eliyeli indvuna kanye nabomnakabo labangu-80; 10 entalelwaneni ya-Uziyeli,+ bekungu-Aminadabi indvuna kanye nabomnakabo labangu-112. 11 Ngetulu kwaloko, Davide wabita baphristi boSadoki+ na-Abiyatha+ kanye nemaLevi, bo-Uriyeli, Asaya, Joweli, Shemaya, Eliyeli na-Aminadabi, 12 watsi kubo: “Nine nitinhloko temindeni yemaLevi. Tingcweliseni, nine kanye nabomnakenu, bese nikhuphula leLibhokisi laJehova Nkulunkulu wema-Israyeli liye endzaweni lengiyilungiselele lona. 13 Njengobe ningazange niletfwale ekucaleni,+ intfukutselo yaJehova Nkulunkulu wetfu yasivutsela+ ngobe asizange silandzele ticondziso letifanele.”+ 14 Ngako baphristi nemaLevi batingcwelisa kute bakhuphule leLibhokisi laJehova Nkulunkulu wema-Israyeli.
15 EmaLevi abese etfwala leLibhokisi laNkulunkulu weliciniso emahlombe awo alibambe ngetindvuku,+ njengobe Mosi bekawayalile ngelivi laJehova. 16 Davide wabese utjela letindvuna temaLevi kutsi tibeke bomnakabo lababahlabeleli kuze bahlabele ngenjabulo, bahambisane netinsimbi temculo letifaka ekhatsi tinsimbi temculo letinetintsambo, emahabhu+ nemasimbali.+
17 Ngako esiveni sawo, emaLevi abeka Hemani+ indvodzana yaJoweli, Asafa+ indvodzana yaBherekhiya na-Ethani+ indvodzana yaKhushaya wemndeni wemaMerari. 18 Bebakanye nabomnakabo besigaba sesibili,+ boZakhariya, Bheni, Jaziyeli, Shemiramothi, Jehiyeli, Uni, Eliyabe, Bhenaya, Maseya, Mathithiya, Elifelehu, naMikneya, bogadzi bekubo-Obedi-edomu kanye naJeyiyeli. 19 Bahlabeleli boHemani,+ Asafa+ na-Ethani bekufanele badlale emasimbali elitfusi;+ 20 boZakhariya, Aziyeli, Shemiramothi, Jehiyeli, Uni, Eliyabe, Maseya naBhenaya bebadlala tinsimbi temculo letinetintsambo ngelinothi le-Alamothi;*+ 21 boMathithiya,+ Elifelehu, Mikneya, Obedi-edomu, Jeyiyeli kanye na-Azaziya bebadlala emahabhu ngelinothi leShiminithi,*+ kute babe bacondzisi. 22 Khenaniya+ indvuna yemaLevi bekacondzisa tekutfutsa ngobe bekanguchwephesha, 23 futsi boBherekhiya na-Elkhana bebabogadzi beLibhokisi. 24 Baphristi boShebaniya, Josafati, Nethaneli, Amasayi, Zakhariya, Bhenaya na-Eliyezeri bebashaya emacilongo akhale kakhulu embikweLibhokisi laNkulunkulu weliciniso+ futsi bo-Obedi-edomu naJehiya bebaphindze babe bogadzi baleLibhokisi.
25 Davide nemadvodza lamadzala aka-Israyeli, kanye netindvuna tetinkhulungwane babese bahamba kanye kanye kuze bayolandza lelibhokisi lesivumelwane saJehova endlini ya-Obedi-edomu+ ngenjabulo.+ 26 Ngesikhatsi Nkulunkulu asita emaLevi lebekatfwele lelibhokisi lesivumelwane saJehova, banikela ngetinkunzi letisetincane letingu-7 kanye netimvu letindvuna letingu-7.+ 27 Davide bekagcoke lijazi lelingenamikhono lelentiwe ngendvwangu lecolisakele njengobe bekagcoke kanjalo nawo onkhe emaLevi lebekatfwele leLibhokisi, nebahlabeleli naKhenaniya indvuna yetekutfutsa neyebahlabeleli; Davide bekaphindze agcoke sidziya selineni.+ 28 Onkhe ema-Israyeli abekhuphula lelibhokisi lesivumelwane saJehova ngemsindvo wenjabulo,+ ngemsindvo weluphondvo, nemacilongo,+ nemasimbali, badlalela etulu tinsimbi temculo letinetintsambo, badlala nemahabhu.+
29 Kodvwa ngesikhatsi lelibhokisi lesivumelwane saJehova lifika eDolobheni laDavide,+ Mikhali indvodzakati yaSawula+ wahlola phansi ngelifasitelo wabona iNkhosi Davide igiya futsi ihalalisa; Mikhali wacala kuyedzelela enhlitiyweni yakhe.+