Hezekeli
29 Ngemnyaka wesi-10, enyangeni yesi-10, ngelilanga lesi-12 laleyo nyanga, livi laJehova lefika kimi latsi: 2 “Ndvodzana yemuntfu, bhekisa buso bakho ngakuFaro inkhosi yaseGibhithe, bese uphrofetha ngalokumelene naye nangalokumelene nayo yonkhe iGibhithe.+ 3 Khuluma naye utsi: ‘Naku lokushiwo yiNkhosi Lephakeme Jehova:
“Ngimelene nawe wena Faro, nkhosi yaseGibhithe,+
Wena silwane lesikhulu saselwandle lesilele emifudlaneni yeNayili,*+
Lesikhulume satsi: ‘Umfula iNayili ngewami.
Ngatakhela mine.’+
4 Kodvwa ngitawufaka emahhuka emihlatsini yakho, ngente netinhlanti teNayili yakho kutsi tinamatsele etincwencweni takho.
Ngitakukhipha eNayili yakho kanye nato tonkhe tinhlanti letinamatsele etincwencweni takho.
5 Ngitakulahla elugwadvule, wena kanye nato tonkhe tinhlanti teNayili yakho.
Utawufela endzaweni lebonwa nguwonkhewonkhe futsi angeke ubutfwe nobe utsatfwe lapho.+
Ngitawunikela ngawe ube kudla kwetilwane tesiganga nekwetinyoni letindiza esibhakabhakeni.+
6 Bonkhe labahlala eGibhithe batawukwati kutsi mine nginguJehova,
Ngobe wena besewuyindvuku yemhlanga kubantfu baka-Israyeli.+
7 Batsi nababamba sandla sakho, wena wafohloka
Futsi walimata emahlombe abo.
8 “‘Ngako-ke, naku lokushiwo yiNkhosi Lephakeme Jehova: “Ngitawuletsa inkemba imelane nawe,+ futsi kuwe ngitawubulala bantfu kanye netilwane. 9 Live laseGibhithe liyawuba yindzawo lengenalutfo nalecotfuliwe,+ futsi niyawukwati kutsi mine nginguJehova ngobe wena* utsite: ‘Umfula iNayili ngewami; wentiwa ngimi lucobo lwami.’+ 10 Ngako ngimelene nawe kanye nemfula wakho iNayili, futsi ngitawenta live laseGibhithe libe yindzawo lecotfuliwe naleyomile, ngilente libe yindzawo lengenamsebenti,+ kusukela eMigdoli+ kuya eSiyene+ kuze kuyofika emnceleni waseTopiya. 11 Bantfu nemfuyo angeke kwendlule khona ngetinyawo,+ futsi lelive litawusala lingenalutfo iminyaka lengu-40. 12 Live laseGibhithe ngitawulenta lisale lingenalutfo kwendlula onkhe lamanye emave futsi emadolobha akhona atawusala angenalutfo kwendlula onkhe lamanye iminyaka lengu-40;+ ngitawusakatela bantfu baseGibhithe etiveni letehlukehlukene nasemaveni.”+
13 “‘INkhosi Lephakeme Jehova itsi: “Ngemuva kweminyaka lengu-40 ngitawubalandza bantfu baseGibhithe etiveni lebebasakatekele kuto;+ 14 ngitababuyisela ePhathrosi+ bantfu baseGibhithe lebebatfunjiwe, lokulive labo, futsi khona lapho batawuba ngumbuso longakabaluleki. 15 IGibhithe itawuba ngumbuso lophansi kunaleminye, futsi angeke iphindze itiphakamise ibe ngetulu kwaletinye tive.+ Ngitayenta ibe yincane kuze ingasakhoni kuncoba letinye tive.+ 16 Bantfu baka-Israyeli angeke baphindze betsembele kuyo,+ kodvwa itawubakhumbuta ngesono sabo sekucela lusito kuyo, futsi bayawukwati kutsi mine ngiyiNkhosi Lephakeme Jehova.”’”
17 Ngemnyaka wesi-27, enyangeni yekucala, ngelilanga lekucala laleyo nyanga, livi laJehova lefika kimi latsi: 18 “Ndvodzana yemuntfu, iNkhosi Nebukhadnezari*+ yaseBhabhulona isebentise libutfo layo kamatima kuze lilwe neThire.+ Tonkhe tinhloko tavela timphandla, nawo onkhe emahlombe aphotfuka. Nome kunjalo, yona kanye nelibutfo layo abawutfolanga umholo ngemsebenti labawenta eThire.
19 “Ngako-ke naku iNkhosi Lephakeme Jehova lekushoko: ‘Live laseGibhithe ngilinikela eNkhosini Nebukhadnezari* yaseBhabhulona+ futsi itawutsatsa umcebo walo, iphindze ititsatsele tintfo kulo; titawuba ngumholo welibutfo layo.’
20 “INkhosi Lephakeme Jehova itsi: ‘Ngitayinika live laseGibhithe libe ngumholo wemsebenti wayo wekumelana nayo,* ngobe bebasebentela mine.’+
21 “Ngalelolanga, ngitawubangela kutsi kuhlume luphondvo esiveni saka-Israyeli,*+ futsi wena ngitakunika litfuba lekutsi ukhulume emkhatsini wabo; bayawukwati kutsi mine nginguJehova.”