Hezekeli
35 Livi laJehova laphindze lefika kimi, latsi: 2 “Ndvodzana yemuntfu, bhekisa buso bakho esifundzeni lesinetintsaba saseSeyiri,+ bese uphrofetha ngalokumelene naso.+ 3 Ubotsi kuso: ‘INkhosi Lephakeme Jehova itsi: “Ngimelene nawe, wena sifundza lesinetintsaba saseSeyiri, ngitawelula sandla sami ngimelane nawe, futsi ngitakwenta ube yindzawo lengenalutfo nalengenamsebenti.+ 4 Emadolobha akho ngitawenta abe tindzala futsi ayawuba yindzawo lengenalutfo nalengenamsebenti;+ utawukwati kutsi mine nginguJehova. 5 Ngobe wakhombisa kuba sitsa lesinelunya+ futsi wanikela ema-Israyeli kutsi abulawe ngesikhatsi abhekene nenhlekelele yawo, ngesikhatsi atfola sijeziso sawo sekugcina.”’+
6 “INkhosi Lephakeme Jehova itsi: ‘Ngako-ke ngitifunga mine, ngitsi sengikunikele ekufeni* futsi angeke uze uphunyule.+ Njengobe wena bewubulala labo lobenyanyako, nyalo angeke usakhona kuphunyula ekufeni.+ 7 Sifundza lesinetintsaba saseSeyiri ngitawusenta sibe yindzawo lengenalutfo nalengenamsebenti,+ ngitawubulala nobe ngubani lowendlula kuso nobe lobuyela kuso. 8 Ngitawugcwalisa tintsaba talesifundza ngetidvumbu; futsi labo lababulewe ngenkemba batakuwa emagcumeni akho, etihosheni takho, kanye nakuyo yonkhe imifudlana yakho. 9 Ngitawukwenta usale ungenalutfo siphelane futsi kute lotawuhlala emadolobheni akho;+ utawukwati kutsi mine nginguJehova.’
10 “Ngobe utsite: ‘Letive letimbili nalamave lamabili ayawuba ami, futsi ngitawatsatsa omabili,’+ ngisho nome ngabe Jehova lucobo lwakhe bekakhona lapho, 11 ‘ngitifunga mine,’ kusho iNkhosi Lephakeme Jehova, ‘ngitsi ngitakwehlulela ngisebentisa intfukutselo nemona lofana naloyo lowabakhombisa wona;+ futsi batawungati ngesikhatsi ngikwehlulela. 12 Utawukwati kutsi mine, Jehova ngiweve onkhe emagama ekwedzelela lowakhulume ngalokumelene netintsaba taka-Israyeli nawutsi: “Tisele tingenalutfo futsi tinikelwe kimi kuze ngitishwabadzele.”* 13 Ukhulume ngekwedzelela ngalokumelene nami, futsi watiphindzaphindza tinhlamba lowangetfuka ngato.+ Ngakuva konkhe loko.’
14 “Naku lokushiwo yiNkhosi Lephakeme Jehova: ‘Umhlaba wonkhe utawujabula nasengikwenta uba yindzawo lengenalutfo nalengenamsebenti. 15 Njengobe wajabula ngesikhatsi lifa lesive saka-Israyeli lisala lingenalutfo, nguleyo-ke indlela nami lengitakwehlulela ngayo.+ Uyawuba tindzala letingenalutfo wena sifundza lesinetintsaba saseSeyiri, futsi bonkhe baka-Edomu+ batawukwati kutsi mine nginguJehova.’”