Incwadzi Yekucala YaSamuweli
7 Ngako emadvodza aseKhiriyathi-jeyarimu eta afike atsatsa Libhokisi laJehova akhuphuka nalo aliyisa endlini ya-Abinadabi+ lesegcumeni, abese angcwelisa Eliyezeri indvodzana yakhe kuze agadze leLibhokisi laJehova.
2 Kusukela ngelilanga leLibhokisi lelefika ngalo eKhiriyathi-jeyarimu, kwendlula sikhatsi lesidze lesiyiminyaka lengu-20, futsi bonkhe bantfu baka-Israyeli babese bacala kuphendvukela* kuJehova.+ 3 Samuweli wase ukhuluma nabo bonkhe bantfu baka-Israyeli watsi: “Nangabe nibuyela kuJehova ngayo yonkhe inhlitiyo yenu,+ susani labonkulunkulu betive+ naletitfombe ta-Ashtarothe+ letisemkhatsini wenu, tinhlitiyo tenu nitinikele ngalokuphelele kuJehova niphindze nikhonte yena yedvwa,+ futsi utanikhulula esandleni semaFilisti.”+ 4 Ngako ema-Israyeli abalahla boBhali kanye netitfombe ta-Ashtarothe, ase akhonta Jehova kuphela.+
5 Ngemuva kwaloko Samuweli watsi: “Hlanganisani ndzawonye onkhe ema-Israyeli eMispa,+ futsi ngitanithantazela kuJehova.”+ 6 Ngalelolanga ahlangana ndzawonye eMispa, futsi akha emanti abese awatfulula embikwaJehova aphindze azila kudla.+ Ngesikhatsi alapho atsi: “Sonile kuJehova.”+ Ngako Samuweli wacala kuba ngumehluleli+ wema-Israyeli eMispa.
7 Ngesikhatsi emaFilisti eva kutsi ema-Israyeli ahlangene ndzawonye eMispa, baholi bawo bakhuphuka kuze balwe nema-Israyeli. Ema-Israyeli atsi nakeva ngaloko, afikelwa kwesaba ngenca yemaFilisti.+ 8 Ngako atsi kuSamuweli: “Ungayekeli kusithantazela kuJehova Nkulunkulu wetfu kute asisite+ futsi asisindzise esandleni semaFilisti.” 9 Samuweli wabese utsatsa lizinyane lemvu lelisamunya walinikela kuJehova laba ngumnikelo wekushiswa lophelele;+ wathantaza kuJehova wacelela ema-Israyeli lusito futsi Jehova wamphendvula.+ 10 Njengobe Samuweli abenikela lomnikelo wekushiswa, emaFilisti asondzela atokulwa nema-Israyeli. Ngalelolanga Jehova wabangela kutsi lidvume kakhulu+ ngakumaFilisti futsi wawenta adideka,+ ngako ema-Israyeli awancoba emaFilisti.+ 11 Nawabona loko, emadvodza aka-Israyeli aphuma eMispa ase acosha emaFilisti, awabulala aze ayofika eningizimu yeBhethi-khari. 12 Ngemuva kwaloko Samuweli watsatsa litje+ walibeka emkhatsini weMispa neJeshana, walibita ngekutsi yi-Ebheneza,* ngobe bekatsi: “Kuze kube ngunyalo, Jehova abesolo asisita.”+ 13 Ngako-ke emaFilisti ancotjwa futsi akazange aphindze ete endzaweni yema-Israyeli;+ nesandla saJehova sachubeka simelene nawo kuwo onkhe emalanga aSamuweli.+ 14 Ngetulu kwaloko, emadolobha labetsetfwe ngemaFilisti kuma-Israyeli abuyiselwa ka-Israyeli, kusukela e-Ekroni kuya eGathi futsi ema-Israyeli aphindze awutfola umhlaba wawo esandleni semaFilisti.
Kwaba nekuthula nasemkhatsini wema-Israyeli nema-Amori.+
15 Samuweli wachubeka ehlulela ema-Israyeli kuphila kwakhe konkhe.+ 16 Umnyaka ngamunye abehamba aye eBetheli,+ eGilgali+ naseMispa+ futsi bekehlulela ema-Israyeli kuto tonkhe letindzawo. 17 Kodvwa bekabese ubuyela eRama+ ngobe indlu yakhe beyilapho, futsi nalapho bekehlulela ema-Israyeli. Wakhela Jehova li-al’thare kuleyondzawo.+