Incwadzi Yekucala YaSamuweli
27 Nobe kunjalo, Davide wacabanga watsi: “Ngalelinye lilanga Sawula utangibulala. Kuncono ngibaleke+ ngiye eveni lemaFilisti; Sawula utawubese uphelelwa ngemandla ekufunana nami kulo lonkhe lelive laka-Israyeli,+ futsi ngitawusindza esandleni sakhe.” 2 Ngako Davide nemadvodza langu-600+ labehamba nawo bewelela ku-Akhishi+ inkhosi yaseGathi, lobekayindvodzana yaMayoki. 3 Davide kanye nemadvodza labehamba nawo bahlala na-Akhishi eGathi, nguleyo naleyo ndvodza beyinemndeni wayo. Davide bekanebafati bakhe lababili, lokungu-Ahinowami+ waseJezreyeli na-Abigayili+ waseKhameli, lobekangumfelokati waNabali. 4 Ngesikhatsi Sawula atfola umbiko lotsi Davide ubalekele eGathi, wase uyayekela kumfuna.+
5 Ngemuva kwaloko Davide watsi ku-Akhishi: “Nangabe ngitfole umusa emehlweni akho, ngicela ungiphe indzawo kulelinye lemadolobhana kuze ngihlale kuyo. Inceku yakho ingahlala njani nje nawe edolobheni lebukhosi?” 6 Ngako ngalelolanga Akhishi wamnika iSikilagi.+ Kungako kuze kube ngulamuhla iSikilagi iyemakhosi akaJuda.
7 Davide wahlala umnyaka netinyanga letine eveni lemaFilisti.+ 8 Abekhuphuka nemadvodza labenaye bayohlasela emaGeshuri,+ emaGizi, nema-Amaleki,+ ngobe abehlala eveni lelisuka eThelamu liye eShuri+ lize liyofika eGibhithe. 9 Bekutsi Davide nakahlasela lelive, acotfule wena ndvodza, wena mfati,+ kodvwa abetsatsa imihlambi yetimvu neyetimbuti, imihlambi yetinkhomo, timbongolo, emakamela netimphahla, bese ubuyela nako ku-Akhishi. 10 Bekutsi Akhishi nakambuta atsi: “Bowuhlasele kuphi lamuhla?” Davide amphendvule atsi: “Bengihlasele eningizimu* yakaJuda”+ nobe atsi: “Bengihlasele eningizimu yendzawo yemaJerameli”+ nobe atsi: “Bengihlasele eningizimu yendzawo yemaKheni.”+ 11 Davide abebulala wena ndvodza, wena mfati kute bangaletfwa eGathi, ngobe bekatsi: “Ngentela kutsi bangatjeli muntfu ngatsi, baze batsi: ‘Nguloku-ke Davide lakwentile.’” (Bekenta njalo kuso sonkhe lesikhatsi lasihlala eveni lemaFilisti.) 12 Akhishi wametsemba Davide, waze wacabanga watsi: ‘Bantfu baka-Israyeli sebayamenyanya Davide, ngako utawuhlale ayinceku yami.’