Incwadzi Yekucala YaSamuweli
10 Ngemuva kwaloko Samuweli watsatsa libhodlela lelinemafutsa wase uwatsela enhloko yaSawula.+ Wamanga futsi watsi: “Angitsi Jehova sewukugcobile kutsi ube ngumholi+ welifa lakhe?+ 2 Utawutsi nawusuka lapha kimi lamuhla ukhandze emadvodza lamabili edvute nelithuna laRakheli+ leliseveni lakaBhenjamini eSelsa. Atawutsi kuwe: ‘Letimbongolo lebewuyotifuna setitfolakele futsi babe wakho sewukhohliwe ngato+ kodvwa sewukhatsateke ngawe. Uyatibuta utsi: “Ngitakwenta njani ngendvodzana yami?”’ 3 Nawusuka lapho ubohamba uze uyofika esihlahleni lesikhulu saseThabori lapho utawuhlangana khona nemadvodza lamatsatfu lakhuphukela kuNkulunkulu weliciniso eBetheli,+ lenye itawube iphetse timbuti letintsatfu letisetincane, lenye iphetse tinkhwa letintsatfu, kantsi lelenye itawube iphetse imbita lenkhulu yeliwayini. 4 Lamadvodza atakubuta imphilo, akunike netinkhwa letimbili futsi ubotitsatsa. 5 Ngemuva kwaloko, utawufika egcumeni laNkulunkulu weliciniso lapho kunelibutfo lemasotja emaFilisti khona. Nawufika edolobheni, utawuhlangana nelicembu lebaphrofethi labesuka endzaweni lengcwele, futsi embikwabo kutawube kudlalwa tinsimbi temculo letinetintsambo, ithamborine, umntjingo kanye nelihabhu njengobe bona batawube baphrofetha. 6 Umoya waJehova utakunika emandla,+ futsi utawuphrofetha kanye nabo uphindze ushintje ube ngumuntfu lowehlukile.+ 7 Nasetentekile letibonakaliso, ubokwenta nobe yini longakhona kuyenta ngobe Nkulunkulu weliciniso unawe. 8 Kufanele uhambe embili wehlele eGilgali,+ futsi mine ngitawehlela lapho ngite kuwe kute ngente imihlatjelo yekushiswa nemihlatjelo yekuthula. Ubolindza emalanga langu-7 kuze kube ngulapho ngifika kuwe. Ngemuva kwaloko ngitakutjela kutsi kufanele wenteni.”
9 Kwatsi nje lapho Sawula agucuka ashiya Samuweli, Nkulunkulu wacala kushintja inhlitiyo yakhe yaba shengatsi yalomunye umuntfu, futsi tonkhe letibonakaliso tenteka ngalelolanga. 10 Ngako Sawula nenceku yakhe bahamba baya egcumeni, futsi licembu lebaphrofethi lefika lamhlangabeta. Ngaso leso sikhatsi umoya waNkulunkulu wamniketa emandla,+ wase ucala kuphrofetha+ kanye nabo. 11 Ngesikhatsi bonkhe bantfu lebebamati bambona aphrofetha nalabaphrofethi, bakhuluma bodvwa batsi: “Kwentekeni endvodzaneni yaKhishi? Kantsi naSawula sewungumphrofethi yini?” 12 Ngemuva kwaloko lenye indvodza yakuleyo ndzawo yatsi: “Kepha ngubani babe wabo?” Ngako kwabese kuba nesisho* lesitsi: “Kantsi naSawula sewungumphrofethi yini?”+
13 Nakacedza kuphrofetha, wahamba waya endzaweni lephakeme. 14 Ngemuva kwesikhatsi, umnakabobabe waSawula wabuta Sawula nalenceku yakhe watsi: “Beniyephi?” Sawula watsi: “Besiyofuna timbongolo,+ kodvwa asikatitfoli, ngako sibese siyahamba siya kuSamuweli.” 15 Umnakabobabe waSawula wambuta watsi: “Ngicela ungitjele, utsiteni Samuweli kuwe?” 16 Sawula wamphendvula watsi: “Usitjele kutsi letimbongolo lebesitifuna setitfolakele.” Kodvwa akazange amtjele ngaloko Samuweli labekushito kuye mayelana nekuba yinkhosi.
17 Samuweli wabese ubitela bantfu ndzawonye kutsi bete kuJehova eMispa+ 18 futsi watsi kubo: “Naku lokushiwo nguJehova Nkulunkulu wema-Israyeli: ‘Ngimi lowakhipha ema-Israyeli eGibhithe,+ nganikhulula esandleni sebantfu baseGibhithe nakuyo yonkhe imibuso lebeyinicindzetela. 19 Kodvwa lamuhla senimlahlile Nkulunkulu wenu+ lobekanguMsindzisi wenu kubo bonkhe bumatima nekucindzeteleka kwenu, nase nitsi: “Cha, sibekele inkhosi.” Ngako nyalo manini embikwaJehova ngetive tenu nangemindeni yenu.’”*
20 Samuweli watsi tonkhe tive tema-Israyeli atisondzele,+ futsi kwakhetfwa sive sakaBhenjamini.+ 21 Ngemuva kwaloko watsi sive sakaBhenjamini asisondzele ngemindeni yaso, kwase kukhetfwa umndeni wemaMatri. Ekugcineni kwakhetfwa Sawula indvodzana yaKhishi.+ Kodvwa batsi nabayomfuna bangamtfoli. 22 Babese babuta Jehova+ batsi: “Sewufikile yini?” Jehova wabaphendvula watsi: “Nanguya lapha, ubhace emkhatsini wemitfwalo.” 23 Ngako bagijima bayomlandza. Ngesikhatsi Sawula eme emkhatsini webantfu, abemudze kunabo bonkhe, bona bebamane bafika emahlombe akhe.+ 24 Samuweli wakhuluma nabo bonkhe labantfu watsi: “Niyambona yini loyo Jehova lamkhetsile,+ kutsi kute lonjengaye emkhatsini wabo bonkhe bantfu?” Bonkhe labantfu bamemeta batsi: “Lunwele loludze nkhosi!”
25 Samuweli wakhuluma nalabantfu ngetintfo lebetitawufunwa ngemakhosi+ wase utibhala encwadzini futsi wayibeka embikwaJehova. Ngemuva kwaloko Samuweli wabakhulula, nguloyo naloyo wabuyela endlini yakhe. 26 NaSawula wabuyela ekhaya lakhe eGibeya, aphekeletelwa ngemasotja Jehova labewatsintse tinhlitiyo. 27 Kodvwa lamanye emadvodza langenangcondvo atsi: “Utasisindzisa njani nje yena lona?”+ Ngako amedzelela, futsi awazange amletsele tipho.+ Nobe kunjalo, Sawula akashongo lutfo.*