Incwadzi Yesibili YaSamuweli

4 Ngesikhatsi Ishboshethi*+ indvodzana yaSawula eva kutsi Abneri sewufile eHebroni,+ wesaba kakhulu* futsi onkhe ema-Israyeli kwawetfusa loko. 2 Bekunemadvodza lamabili lebekalawula emacembu lamabili emasotja lahlaselako endvodzana yaSawula. Lenye yalamadvodza bekunguBhana futsi lenye kunguRekhabi. Omabili bekangemadvodzana aRimona umBherothi wesive sakaBhenjamini. (Ngobe iBherothi+ nayo beyivame kubalwa njengaleyincenye yesive sakaBhenjamini. 3 EmaBherothi abaleka aya eGithayimu+ futsi afike ahlala lapho njengetihambi kuze kube ngulamuhla.)

4 Jonathani+ indvodzana yaSawula bekanemntfwana longumfana lobekakhubateke etinyaweni.+ Bekaneminyaka lesihlanu nakufika umbiko wekushona kwaSawula naJonathani lobewusuka eJezreyeli,+ futsi umuntfu lobekamnakekela wamtsatsa wabaleka naye etfuke kakhulu. Nakasabaleka wase uyawa lomntfwana wakhubateka. Libito lakhe bekunguMefiboshethi.+

5 Emadvodzana aRimona longumBherothi, boRekhabi naBhana, aya endlini ya-Ishboshethi emini lilanga selishisa futsi amtfola atiphumulele. 6 Angena endlini yakhe enta shengatsi ayotsatsa kolo, efike amgwaza esiswini. BoRekhabi kanye naBhana+ umnakabo base bayabaleka. 7 Bebangene kulendlu ngesikhatsi aselele embhedzeni ekamelweni lakhe, bamgwaza bambulala base bamncuma inhloko. Ngemuva kwaloko batsatsa lenhloko bahamba nayo busuku bonkhe ngemgwaco loya e-Arabha. 8 Befike baniketa Davide eHebroni lenhloko futsi batsi kuye: “Nayi inhloko ya-Ishboshethi+ indvodzana yaSawula sitsa sakho+ lebesifuna kukubulala.*+ Lamuhla Jehova unikete inkhosi yami litfuba lekutiphindziselela kuSawula kanye nasentalelwaneni yakhe.”

9 Davide waphendvula boRekhabi naBhana umnakabo, emadvodzana aRimona umBherothi, watsi: “Ngifunga Jehova Nkulunkulu lophilako, lowangikhulula* kuko konkhe kucindzeteleka kwami.+ 10 Ngesikhatsi kufika umuntfu lotsite kimi atoletsa umbiko mayelana naSawula atsi: ‘Sawula ufile.’+ Abecabanga kutsi ungiletsele tindzaba letimnandzi. Ngako ngambamba ngambulala+ eSikilagi. Loko kwaba sigwebo lesatfolwa ngulesitfunywa. 11 Kakhulu kangakanani-ke ngemadvodza lamabi labulele indvodza lelungile endlini yayo nasembhedzeni wayo! Akukafaneli yini nginente nilandzise ngengati yayo+ futsi nginisuse emhlabeni?” 12 Davide watjela emajaha kutsi akababulale.+ Abajuba tandla netinyawo ase abalengisa+ ngasechibini laseHebroni. Inhloko ya-Ishboshethi yona ayitsatsa ayingcwaba ethuneni la-Abneri eHebroni.