Incwadzi Yekucala YaSamuweli

18 Ngemuva kwekutsi Davide sekacedzile kukhuluma naSawula, boJonathani naDavide baba bangani labakhulu futsi Jonathani+ wacala kutsandza Davide njengobe abetitsandza yena.+ 2 Kusukela ngalelolanga, Sawula watsi Davide akahlale naye futsi akazange amvumele kutsi abuyele endlini yababe wakhe.+ 3 BoJonathani naDavide babese benta sivumelwane+ ngobe Jonathani abetsandza Davide njengobe abetitsandza yena.+ 4 Jonathani wakhumula lijazi lakhe lelite imikhono walinika Davide, wamnika netembatfo takhe temphi, inkemba yakhe, butjoki bakhe kanye nelibhande lakhe. 5 Davide abephuma ayokulwa futsi abephumelela*+ nome ngukuphi lapho Sawula abemtfuma khona. Ngako Sawula wambeka kutsi aphatse libutfo lemphi+ futsi loko kwabajabulisa bonkhe bantfu kanye netinceku taSawula.

6 Bekutsi lapho Davide nalalamanye emasotja nababuya kuyokulwa nemaFilisti, bafati baphume kuwo onkhe emadolobha aka-Israyeli bahlabele+ futsi bajayive, bahlangabete iNkhosi Sawula bajabulile, badlale emathamborine+ kanye netinsimbi temculo letinetintsambo letintsatfu. 7 Labafati lebebahalalisa bebahlabela batsi:

8 Sawula watfukutsela kakhulu,+ futsi lengoma yamcansula ngobe bekatsi: “Badvumise Davide ngekutsi ubulele bantfu labangemashumi etinkhulungwane, kodvwa mine batsi ngibulele tinkhulungwane nje kuphela. Intfo lesele nyalo kutsi bamnike yona bukhosi!”+ 9 Kusukela ngalelolanga, Sawula abehlala ambuka kabi Davide.

10 Ngelilanga lelilandzelako, umoya lomubi lobewuvunyelwe nguNkulunkulu wahlupha Sawula,+ futsi wacala kwenta tintfo letingakavami* endlini yakhe njengobe Davide abemdlalela umculo ngelihabhu+ njengasemalangeni. Sawula abephetse sikhali esandleni sakhe,+ 11 futsi wasijikijela,+ acabanga atsi: ‘Ngitawuhlanganisa Davide nelubondza!’ Kodvwa Davide wabaleka tikhatsi letimbili. 12 Sawula wabese uyamesaba Davide ngobe Jehova abenaDavide,+ kodvwa asamshiyile yena.+ 13 Ngako Sawula wamyekelisa kusebenta embikwakhe wase umenta indvuna yemasotja layinkhulungwane, futsi Davide abehola libutfo emphini.*+ 14 Davide wachubeka aphumelela*+ kuko konkhe labekwenta, futsi Jehova abenaye.+ 15 Sawula watsi nakabona kutsi Davide uyaphumelela, wamesaba. 16 Kodvwa bonkhe bantfu baka-Israyeli nebakaJuda bebamtsandza Davide ngobe abebahola nabaya etimphini.

17 Ngekuhamba kwesikhatsi, Sawula watsi kuDavide: “Nangu Merabi+ indvodzakati yami lendzala. Ngitakwendzisela yena.+ Kepha kufanele uchubeke uba nesibindzi futsi ulwe timphi taJehova.”+ Sawula abecabanga atsi: ‘Akangabulawa ngimi, kodvwa akabulawe ngemaFilisti.’+ 18 Davide waphendvula Sawula watsi: “Ngingubani nje mine, futsi uyini nje umndeni wababe ka-Israyeli kutsi ngingaba ngumkhwenyane wenkhosi?”+ 19 Kodvwa satsi nasifika sikhatsi sekutsi Merabi indvodzakati yaSawula aniketwe Davide, kwatfolakala kutsi sewuvele wendziselwe Adriyeli+ waseMehola.

20 Indvodzakati yaSawula lokutsiwa nguMikhali+ beyimtsandza Davide. Sawula wabese uyeva ngaloko, futsi kwamjabulisa. 21 Ngako Sawula watsi: “Ngitamniketa yona kute ngitfole indlela yekutsi emaFilisti ambulale.”+ Sawula waphindze wakhuluma naDavide kwesibili watsi: “Lamuhla utawuba ngumkhwenyane wami.” 22 Ngetulu kwaloko, Sawula watjela tinceku takhe watsi: “Khulumani naDavide ngasense nitsi: ‘Inkhosi iyajabula ngawe futsi tonkhe tinceku tayo tiyakutsandza. Ngako vuma kuba ngumkhwenyane wenkhosi.’” 23 Ngesikhatsi tinceku taSawula titjela Davide konkhe loku, Davide watsi: “Nicabanga kutsi kuyintfo lelula yini kutsi ngibe ngumkhwenyane wenkhosi njengobe ngiluphuya futsi ngingakadvumi?”+ 24 Ngemuva kwaloko tinceku taSawula tambikela loko lobekushiwo nguDavide.

25 Sawula watsi: “Kufanele nitjele Davide nitsi: ‘Inkhosi ayilifuni lilobolo+ kuwe ngaphandle kwemajwabu langu-100+ emaFilisti kute itiphindziselele etitseni tayo.’” Sawula abenta lisu lekutsi Davide abulawe ngemaFilisti. 26 Ngako tinceku taSawula tatjela Davide ngalamavi, futsi wajabula kutsi utawuba ngumkhwenyane wenkhosi.+ Ngaphambi kwekutsi sifike leso sikhatsi lesasibekiwe, 27 Davide nelibutfo lakhe bahamba babulala emaFilisti langu-200, wase uletsa onkhe lamajwabu awo enkhosini kute abe ngumkhwenyane wenkhosi. Ngako Sawula wamendzisela Mikhali indvodzakati yakhe.+ 28 Sawula wabona kutsi Jehova uyamsekela Davide+ nekutsi Mikhali indvodzakati yakhe bekamtsandza Davide.+ 29 Loku kwenta Sawula wamesaba kakhulu Davide, futsi waba sitsa sakhe kuphila kwakhe konkhe.+

30 Tindvuna temaFilisti tachubeka nekulwa timphi, kodvwa njalo natiyokulwa, Davide abephumelela* kakhulu kwendlula tonkhe tinceku taSawula,+ futsi libito lakhe lahlonishwa kakhulu.+