Mikha
4 Encenyeni yekugcina yemalanga,*
Intsaba yendlu yaJehova+
Iyawukuma icine ngetulu kweticongo tetintsaba,
Iyawuphakanyiswa ibe ngetulu kwemagcuma,
Futsi tonkhe tive tiyawugeleta tiye kuyo.+
2 Tive letinyenti tiyawukuta, titsi:
“Wotani, asikhuphukeleni entsabeni yaJehova,
Endlini yaNkulunkulu waJakobe.+
Utasifundzisa tindlela takhe,
Futsi sitawuhamba etindleleni takhe.”
Ngobe umtsetfo* uyawuphuma eSiyoni,
Nelivi laJehova liyawuphuma eJerusalema.
3 Uyawukwehlulela tive letinyenti,+
Alungise tindzaba* letiphatselene netive letinemandla futsi letikhashane.
Tona tiyawugucula tinkemba tato titente tibe ngemakhuba,+
Tikhali tato titente tikelo tekutsena tihlahla.
4 Nguloyo naloyo utawuhlala ngephansi kwesihlahla sakhe semagilebisi nangephansi kwesihlahla sakhe semakhiwa,+
Futsi kute lotabesabisa,+
Ngobe Jehova wemabutfo* sewukhulumile.
5 Nguleso naleso sive sitawuhlonipha* nkulunkulu waso,
Kodvwa tsine sitawuhlonipha* Jehova Nkulunkulu+ wetfu kuze kube phakadze.
6 Jehova utsi: “Ngalelolanga,
Ngitababutsela ndzawonye labo labachutako,
Futsi ngibabutsele ndzawonye labo labahlakatekile,+
Kanye nalabo lengabajezisa.
7 Ngitawenta kutsi kube khona labasalako kulabo lebebachuta,+
Futsi labo lebebalahlelwe khashane ngitawubenta babe sive lesinemandla.+
Jehova utawuba yinkhosi yabo eNtsabeni iSiyoni,
Kusukela nyalo kuze kube phakadze.
8 Wena mbhoshongo lovikela umhlambi,
Wena loligcuma lelidolobha laseSiyoni,+
Umbuso wakho wasekucaleni* utawuphindze ubuye kuwe,+
Lokungumbuso welidolobha laseJerusalema.+
9 Umemetelani kangaka?
Kantsi ute yini inkhosi,
Nemeluleki wakho sewufile yini?
Ngiko yini usebuhlungwini lobungaka, kuhle kwemfati lobelekako?+
10 Awu nine bantfu baseSiyoni,* shumpani futsi nikhale kakhulu
Njengemfati lobelekako,
Ngobe senitawuphuma kulelidolobha, nihambe niyohlala esigangeni.
Nitawuhamba niyofika ngisho naseBhabhulona,+
Futsi nitawutsi nasenilapho nikhululwe;+
Kulapho-ke Jehova atanihlenga khona etitseni tenu, anibuyisele emuva.+
11 Tive letinyenti titawubutsana timelane nani;
Titawutsi: ‘Shengatsi lelidolobha lingangcoliswa,
Futsi shengatsi singakubona loku nakwenteka eSiyoni.’
12 Kodvwa letive atati kutsi Jehova ucabangani,
Atiyicondzi injongo* yakhe;
Futsi utatibutsela ndzawonye njengakolo losandza kuvunwa emalayinini awo, wabutsiselwa ebaleni lekubhulela.