Incwadzi Yesibili YaSamuweli
7 Ngesikhatsi inkhosi seyitintile endlini*+ yayo futsi Jehova sekayinikete kuphumula, tonkhe titsa letakhelene nayo tingasayihluphi, 2 inkhosi yatsi kuNathani+ umphrofethi: “Mine ngihlala endlini yemisedari+ kantsi Libhokisi laNkulunkulu weliciniso lihlala ethendeni letindvwangu.”+ 3 Nathani waphendvula inkhosi, watsi: “Khululeka, yenta noma ngabe yini lesenhlitiyweni yakho ngobe Jehova unawe.”+
4 Ngabo lobo busuku, livi laJehova lefika kuNathani latsi: 5 “Hamba uye encekwini yami Davide ufike utsi, ‘Naku lokushiwo nguJehova: “Kufanele yini wakhe indlu lengitawuhlala kuyo?+ 6 Ngobe angikaze ngihlale endlini kusukela ngelilanga lengakhulula ngalo ema-Israyeli eGibhithe kuze kube ngulamuhla,+ kodvwa bengisolo ngihambahamba ethendeni kanye nasethendeni lekukhontela.+ 7 Kuso sonkhe lesikhatsi ngihamba nema-Israyeli,* ngake ngasho yini kubaholi betive tawo lengababeka kutsi beluse bantfu bami ema-Israyeli, ngatsi, ‘Aningakheli ngani indlu yemisedari?’”’ 8 Ubotjela inceku yami Davide utsi, ‘Naku lokushiwo nguJehova wemabutfo: “Ngakutsatsa emadlelweni welusa umhlambi,+ ngakwenta umholi webantfu bami ema-Israyeli.+ 9 Ngitawuba nawe nome ngukuphi lapho uya khona+ futsi ngitawucotfula* tonkhe titsa takho embikwakho;+ ngitakwakhela ligama lelikhulu+ lelifana nelebantfu labadvumile emhlabeni. 10 Ngitawukhetsa indzawo lapho ngitawuhlalisa khona bantfu bami ema-Israyeli futsi batawuhlala lapho bangaphindze baphatanyiswe; bantfu lababi angeke baphindze babacindzetele njengobe benta esikhatsini lesendlulile,+ 11 kusukela ngelilanga lengabeka ngalo behluleli+ kubantfu bami ema-Israyeli. Ngitakuphumuta kuto tonkhe titsa takho.+
“‘“Jehova uphindze wakutjela kutsi Jehova utakwakhela indlu.*+ 12 Nakuphela emalanga ekuphila kwakho+ futsi nasewungcwatjwe nabokhokho bakho, ngitawubese ngibeka intalelwane* yakho, indvodzana yakho* kutsi ibe yinkhosi ngemuva kwakho futsi ngitawucinisa umbuso wayo.+ 13 Ngiyo letakwakha indlu lebitwa ngelibito lami,+ futsi ngitawucinisa sihlalo sebukhosi sembuso wayo kuze kube phakadze.+ 14 Ngitawuba ngubabe wayo yona ibe yindvodzana yami.+ Nangabe yeca imitsetfo yami, ngitayijezisa ngendvuku yebantfu ngiphindze ngiyishaye imivimba yemadvodzana ebantfu.*+ 15 Lutsandvo lwami lolucotfo ngeke lusuke kuyo ngendlela lengalususa ngayo kuSawula+ lengamkhweshisa embikwakho. 16 Indlu yakho nembuso wakho kutawuvikeleka kuze kube phakadze; sihlalo sakho sebukhosi sitawumiswa sicine kuze kube phakadze.”’”+
17 Nathani watjela Davide onkhe lamavi nawo wonkhe lombono.+
18 Nayikuva loko iNkhosi Davide yangena ngekhatsi yahlala phansi embikwaJehova, yase itsi: “Awu Nkhosi Lephakeme Jehova, bengiyini nje mine? Beyiyini nje indlu yami kutsi ungaze ungibeke kulesigaba lesengikuso?+ 19 Loko longentele kona bekungakeneli yini Nkhosi Lephakeme Jehova? Uphindze wakhuluma nangendlu yenceku yakho kutsi utayibusisa kuze kube sesikhatsini lesidze lesitako; futsi loko kungumtsetfo lokufanele watiwe ngibo bonkhe bantfu, Nkhosi Lephakeme Jehova. 20 Yini lenye inceku yakho Davide lengayisho kuwe njengobe uyati kahle kangaka,+ Nkhosi Lephakeme Jehova? 21 Ngenca yelivi lakho nangenca yesivumelwane losente nenhlitiyo* yakho, wente tonkhe letintfo letinkhulu futsi utembulele inceku yakho.+ 22 Kungako umkhulu kakhulu+ wena Nkhosi Lephakeme Jehova. Akekho lonjengawe+ futsi kute lomunye Nkulunkulu ngaphandle kwakho.+ Konkhe lesikuve ngetindlebe tetfu kuyakufakazela loko. 23 Sikhona yini sive emhlabeni lesifana nebantfu bakho ema-Israyeli?+ Nkulunkulu wahamba wabakhulula baba bantfu bakhe+ watakhela ligama+ ngekutsi abentele tintfo letinkhulu naletimangalisako.+ Waticosha tive kanye nabonkulunkulu bato, ngenca yebantfu bakho lowabakhulula eGibhithe. 24 Wenta ema-Israyeli aba bantfu bakho ngaso sonkhe sikhatsi,+ wena Jehova waba nguNkulunkulu wawo.+
25 “Wena Jehova Nkulunkulu, shengatsi ngaso sonkhe sikhatsi ungasigcina setsembiso sakho lesimayelana nenceku yakho kanye nendlu yayo futsi shengatsi ungenta njengobe wetsembisile.+ 26 Shengatsi libito lakho lingaphakanyiswa kuze kube phakadze+ kute bantfu batsi, ‘Jehova wemabutfo unguNkulunkulu wema-Israyeli,’ futsi nendlu yenceku yakho Davide shengatsi ingamiswa icine embikwakho.+ 27 Ngobe wena Jehova wemabutfo, Nkulunkulu wema-Israyeli, wembulele inceku yakho ngekutsi uyitjele emavi latsi: ‘Ngitakwakhela indlu.’*+ Kungako inceku yakho inesibindzi* sekuthantaza lomthantazo kuwe. 28 Wena Nkhosi Lephakeme Jehova unguNkulunkulu weliciniso, nemavi akho aliciniso+ futsi wetsembise inceku yakho letintfo letinhle. 29 Shengatsi kungaba kuhle emehlweni akho kutsi ubusise indlu yenceku yakho futsi shengatsi ingachubeka ikhona embikwakho+ kuze kube phakadze; ngobe wena Nkhosi Lephakeme Jehova wetsembisile futsi shengatsi indlu yenceku yakho ungayibusisa kuze kube phakadze.”+