Yekucala KubaseKhorinte
1 Mine Pawula, lengakhetfwa kutsi ngibe ngumphostoli+ waKhristu Jesu ngentsandvo yaNkulunkulu, ngikanye naSostenesi umzalwane wetfu, 2 ngibhalela libandla laNkulunkulu leliseKhorinte,+ kanye nabo bonkhe lababita libito leNkhosi yetfu Jesu Khristu+ kuyo yonkhe indzawo; yena uyiNkhosi yetfu neyabo. Nkulunkulu uningcwelisile ebunyeni naKhristu Jesu, futsi wanibita kutsi nibe ngulabangcwele:+
3 Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu, naseNkhosini lenguJesu Khristu.
4 Ngihlale ngimbonga Nkulunkulu wami ngenca yemusa lomkhulu lanikhombise wona ngaKhristu Jesu; 5 ngesizatfu sekutsi nimunye naKhristu, nemukele tonkhe tintfo, lokufaka ekhatsi likhono lekukhuluma kahle ngelivi laNkulunkulu kanye nelwati loluphelele,+ 6 njengobe nje nebufakazi lobumayelana naKhristu+ bentiwe bacina kini, 7 kuze kube bete sipho leniseswelako, njengobe nikulindzele ngekulangatelela kwembulwa kweNkhosi yetfu Jesu Khristu.+ 8 Nkulunkulu utawuphindze anicinise kuze kube sekugcineni, khona nitotfolakala nite licala ngelilanga leNkhosi yetfu Jesu Khristu.+ 9 Nkulunkulu wetsembekile,+ futsi nguye lowanibita kutsi nibe nebudlelwane* neNdvodzana yakhe lenguJesu Khristu iNkhosi yetfu.
10 Ngako ngiyanincenga bazalwane ngelibito leNkhosi yetfu Jesu Khristu, kutsi nonkhe nikhulume ngekuvumelana futsi kube bete kwehlukana emkhatsini wenu,+ kodvwa nibe munye futsi nicabange ngendlela lefanako.+ 11 Ngobe labanye emndenini waKlowe bangitjelile ngani bazalwane bami, kutsi kukhona kuphikisana emkhatsini wenu. 12 Loku ngikusho ngobe ngamunye wenu utsi: “Mine ngiwaPawula,” lomunye utsi: “Mine ngiwa-Apholosi,”+ lomunye utsi: “Mine ngiwaKhefase,”* kantsi lomunye yena utsi: “Mine ngiwaKhristu.” 13 Khristu wehlukene ekhatsi yini? NguPawula yini lowabulawa elugodvweni ngenca yenu? Nabhajatiswa egameni laPawula yini? 14 Ngibonga Nkulunkulu ngekutsi emkhatsini wenu kute lengambhabhatisa ngaphandle kwaKhrispusi+ naGayusi,+ 15 kuze kube bete longatsi nabhajatiswa egameni lami. 16 Ngaphindze ngabhabhatisa nemndeni waStefanasi.+ Kodvwa kulaba labanye angisakhumbuli kutsi ukhona yini lomunye lengambhabhatisa. 17 Ngobe Khristu akazange angitfume kutsi ngibhabhatise, kodvwa wangitfuma kutsi ngimemetele tindzaba letimnandzi,+ kepha hhayi kutsi ngisebentise emavi ebantfu labahlakaniphile, kuze lugodvo* Khristu labetselwa kulo lungentiwa intfo lengenamsebenti.
18 Inkhulumo lemayelana nalolugodvo* ivakala ibulima kulabo lababhubhako,+ kodvwa kitsi tsine lesisindziswako ingemandla aNkulunkulu.+ 19 Ngobe kubhaliwe kwatsiwa: “Kuhlakanipha kwebantfu labahlakaniphile ngitakwenta kushabalale, nekukhalipha kwabongcondvongcondvo ngeke ngikwemukele.”*+ 20 Siphi sihlakaniphi? Siphi sati semtsetfo? Uphi umuntfu walelive lotsandza timphikiswane? Nkulunkulu akakwentanga yini kuhlakanipha kwalelive* kwaba bulima? 21 Ngenca yekutsi live beletsembele ekuhlakanipheni kwalo,+ alizange limati Nkulunkulu.+ Kodvwa Nkulunkulu wakhombisa kuhlakanipha kwakhe ngekutsi asindzise labo labakholwako, futsi loko wakwenta asebentisa umlayeto lesiwushumayelako lobonakala ubulima+ kulelive.
22 Ngobe emaJuda acela tibonakaliso+ futsi emaGriki afuna kuhlakanipha; 23 kepha tsine sishumayela ngaKhristu lowabulawa elugodvweni, futsi losikhubekiso kumaJuda nalobonakala abulima kubantfu betive.+ 24 Kodvwa-ke kulabo lababitiwe, kokubili emaJuda nemaGriki, Khristu ungemandla aNkulunkulu nekuhlakanipha kwaNkulunkulu.+ 25 Ngobe tintfo taNkulunkulu letibonakala tibulima, tihlakaniphile kunebantfu, netintfo taNkulunkulu letibonakala tibutsakatsaka, tinemandla kunebantfu.+
26 Loku niyakubona emkhatsini wenu bazalwane, nine lenabitwa, kutsi abasibanyenti labahlakaniphile ngembono webantfu,+ abasibanyenti labanemandla, abasibanyenti nalabahlonipheke ngekutalwa,*+ 27 kodvwa Nkulunkulu wakhetsa tintfo letibulima kulelive kuze ente tihlakaniphi tihlazeke; wakhetsa netintfo letibutsakatsaka kulelive kuze ente tintfo letinemandla tihlazeke;+ 28 Nkulunkulu wakhetsa tintfo letingakabaluleki kulelive netintfo letibukeleka phansi, lokutintfo letingekho, kuze atente lite tintfo letikhona,+ 29 khona kutawuba bete umuntfu* lotigabatisako embikwaNkulunkulu. 30 Kungenca yaNkulunkulu kutsi nine nisebunyeni naKhristu Jesu, futsi kitsi Jesu sowube kuhlakanipha lokuvela kuNkulunkulu, nekulunga,+ nekungcweliswa+ kanye nekukhululwa ngenhlawulo,+ 31 kuze kutowuba njengobe nje kubhaliwe kwatsiwa: “Loyo lotigabatisako, akatigabatise ngaJehova.”*+