Hezekeli
13 Livi laJehova laphindze lefika kimi, latsi: 2 “Ndvodzana yemuntfu, phrofetha ngalokumelene nebaphrofethi baka-Israyeli,+ futsi ubotsi kulabo labatakhela tiphrofetho tabo:*+ ‘Lalelani livi laJehova. 3 Naku lokushiwo yiNkhosi Lephakeme Jehova: “Maye kulabaphrofethi labalibele, labakhuluma labakucabangako, babe bangakawutfoli umbono lovela kimi!+ 4 Awu Israyeli! Baphrofethi bakho sebafana netimphungushe letisetindzaleni. 5 Nine baphrofethi angeke niye etindzaweni letibhidlikile letitungeletwe lubondza lwematje kute niyotakha kabusha nitakhele bantfu baka-Israyeli.+ Ngenca yaloku, ema-Israyeli angeke asindze emphini ngelilanga laJehova.”+ 6 “Babone imibono lengemanga futsi baphrofetha emanga labo labatsi: ‘Livi laJehova litsi,’ abe Jehova angakabatfumi, futsi balindzele kutsi livi labo lifezeke.+ 7 Akusiwo yini umbono longemanga lona leniwubonile futsi anikaphrofethi yini emanga ngesikhatsi nitsi: ‘Livi laJehova litsi,’ kube kute lengikushito?”’
8 “‘Ngako-ke naku lokushiwo yiNkhosi Lephakeme Jehova: “‘Ngesizatfu sekutsi nikhulume emanga futsi nabona imibono lengemanga, mine ngimelene nani,’ kusho iNkhosi Lephakeme Jehova.”+ 9 Sandla sami simelene nebaphrofethi lababone imibono lengemanga nalabaphrofetha emanga.+ Angeke babe sekhatsi kwebantfu lengibatjela timfihlo tami; angeke babhalwe emabhukwini ekubhalisa bantfu baka-Israyeli; futsi angeke babuyele eveni laka-Israyeli. Nitawukwati kutsi mine ngiyiNkhosi Lephakeme Jehova.+ 10 Konkhe loku kungenca yekutsi badukise bantfu bami, ngekutsi batsi: “Kunekuthula!” kube kute kuthula.+ Nakwakhiwa lubondza lwekwehlukanisa lolungakacini, baluhuca ngeludzaka lolumhlophe.’*+
11 “Tjela labo labahuca lolubondza ngeludzaka lolumhlophe kutsi lutawudzilika. Imvula lenkhulu itawuta, kutawufika sangcotfo* futsi umoya lomkhulu utalubhidlita.+ 12 Lutawutsi lolubondza naludzilika, nibutwe kutsiwe: ‘Kuphi loku lebenihuce ngako?’+
13 “Ngako-ke iNkhosi Lephakeme Jehova itsi: ‘Ngitawubangela kutsi kube nesiphepho lesikhulu nemvula lenkhulu ngenca yentfukutselo yami. Ngitawutfumela sangcotfo kutsi silubhidlite, ngobe ngitfukutsele kakhulu. 14 Ngitawubhidlita lolubondza leniluhuce ngeludzaka lolumhlophe ngiluwisele phansi emhlabatsini, futsi sisekelo salo sitawuba sebaleni. Kutawutsi lelidolobha naliwa, nibhubhe kanye nalo; futsi nitawukwati kutsi mine nginguJehova.’
15 “‘Ngitawutsi nangikhiphela lonkhe lulaka lwami etikwalolubondza nasetikwalabo labaluhuce ngeludzaka lolumhlophe, ngitsi kini: “Lolubondza alusekho, nalabo labaluhuca abasekho.+ 16 Baphrofethi baka-Israyeli abasekho, labo labaphrofetha ngeJerusalema nalababona imibono yekuthula ngayo, kube kute kuthula,”’+ kusho iNkhosi Lephakeme Jehova.
17 “Wena ndvodzana yemuntfu, buso bakho abubuke emadvodzakati ebantfu bakini lacamba tiphrofetho tawo, futsi phrofetha ngalokumelene nawo. 18 Tsani kuwo: ‘Naku lokushiwo yiNkhosi Lephakeme Jehova: “Maye kubafati labatfunga emabhande ayo yonkhe imikhono* nalabenta emaduku asenhloko ebukhulu lobehlukahlukene, kuze atingele timphilo* tebantfu! Nitingela kuphila kwebantfu bami yini nibe netama kuvikela kuphila* kwenu? 19 Ningangedzelela yini mine emkhatsini webantfu bami kuze nitfole ibhali legcwele sandla netimvutfu tesinkhwa,+ nibulale labo* lokungakafaneli kutsi bafe futsi niyekele labo* lokungakafaneli kutsi baphile, ngekukhuluma emanga kubantfu bami labalalela emanga enu?”’+
20 “Ngako-ke naku lokushiwo yiNkhosi Lephakeme Jehova: ‘Ngimelene nemabhande enu nine bafati, lawo leniwasebentisela kutingela bantfu* kuhle kwetinyoni, ngitawadzabula emikhonweni yenu futsi ngibakhulule labo lenibatingela njengetinyoni. 21 Ngitawudzabula emaduku enu asenhloko futsi ngikhulule bantfu bami etandleni tenu. Angeke basaba tintfo tekubanjwa ngini nanitingela; kufanele nati kutsi mine nginguJehova.+ 22 Ngobe nimvise buhlungu lolungile ngalamanga enu+ ngibe mine ngingafuni kumvisa buhlungu, futsi nikhutsate lomubi+ kuze angakuyekeli lokubi, ngenca yaloko angeke achubeke aphila.+ 23 Ngako-ke, nine bafati angeke niphindze nibone imibono lengemanga futsi angeke nisaphengula;+ ngitawukhulula bantfu bami etandleni tenu, futsi nitawukwati kutsi mine nginguJehova.’”