Jobe
4 Elifazi+ umThemani wase uyamphendvula utsi:
2 “Nangabe lotsite etama kukhuluma nawe, utawutfukutsela yini?
Ngobe ngubani nje longathula?
3 Ngiyati kutsi weluleke bantfu labanyenti,
Futsi bewubacinisa labo lababutsakatsaka.
4 Emavi akho bekakhutsata nobe ngubani lophelelwa ngemandla,*
Nalabanemadvolo lacegako bewubacinisa.
5 Kodvwa nyalo tinhlekelele setikwehlele, futsi sewucindzetelekile;*
Setikufikele, nawe sewuphelelwa ngemandla.
6 Kuhlonipha kwakho Nkulunkulu akukwenti yini kutsi umetsembe?
Kuba cotfo kwakho+ akukuniki yini litsemba?
7 Ngicela ucabange nganaku: Ukhona yini umuntfu longenacala lowake wacotfulwa?
Kuke kwenteka yini kutsi lolungile abhujiswe?
8 Lengikubonile kutsi labo labahlela* kwenta lokubi
Nalabo labahlanyela bubi batawuvuna kona loko.
9 Ngekuphefumula nje kwaNkulunkulu bayashabalala,
Nangekuvutsa kwentfukutselo yakhe bayaphela.
10 Libhubesi liyabhodla, nelibhubesi lelisakhula liyahhonga,
Kodvwa ngisho nematinyo emabhubesi lanemandla* ayephuka.
11 Libhubesi liyafa nakute lelingakudla,
Nemawundlu alo ayahlakateka.
12 Kukhona lofike wakhuluma nami ekusitsekeni,
Futsi lofike wangihlebela endlebeni yami.
13 Ebusuku, bantfu nabalele hhu butfongo,
Mine ngabona imibono leyangikhatsata,
14 Ngafikelwa kwesaba lokukhulu,
Kwadledletelisa onkhe ematsambo ami.
15 Kukhona lokwendlule* embikwebuso bami;
Tinwele tami tavele tema.
16 Ngemuva kwaloko kwema kwanganyakati,
Kodvwa angizange ngibone kutsi kuyini.
Bekunentfo letsite embikwami;
Lendzawo beyithulile, futsi ngase ngiva livi litsi:
17 ‘Kungenteka yini kutsi umuntfu alunge kakhulu kwendlula Nkulunkulu?
Umuntfu angaba msulwa yini kwendlula uMdali wakhe?’
18 Ngisho netinceku takhe akatetsembi,
Futsi ubuka emaphutsa nasetingilosini* takhe.
19 Kakhulu kangakanani-ke ngalabo labahlala etindlini letakhiwe ngeludzaka,
Lokutindlu letakhelwe elutfulini,+
Labapitjiteka kamelula njengemvunya!
20 Babakhona ekuseni, litsi liyoshona babe sebapitjitwe baphela;
Bayashabalala kuze kube phakadze, futsi kute namunye lokunakako loko.
21 Bafana nelithende lelikhishwe tintsambo talo lase liyawa.
Bafa bete kuhlakanipha.