Tihlabelelo
Sihlabelelo sekuhlatjelwa nakuvulwa indlu. Ingoma yaDavide.
30 Awu Jehova, ngitakudvumisa ngobe ungisindzisile;*
Awukativumeli titsa tami kutsi tihlekise ngami.+
2 Awu Jehova Nkulunkulu wami, ngakhalela lusito kuwe futsi wena wangiphilisa.+
3 Awu Jehova, ungikhiphile eThuneni.*+
Ungigcine ngiphila; wangisindzisa kuze ngingangeni emgodzini.*+
4 Hlabelani nidvumise* Jehova, nine bantfu bakhe labetsembekile,+
Nibonge libito lakhe lelingcwele;*+
5 Ngobe utfukutselela umuntfu sikhashana,+
Kodvwa umusa lawentela labo labatsandzako uhlale ukhona njalo.+
Nanobe umuntfu angakhala ntsambama, kodvwa ekuseni ujabula kakhulu.+
6 Ngesikhatsi tintfo tingihambela kahle, ngatsi:
“Ngeke nginyakatiswe.”*
7 Awu Jehova, ngesikhatsi usangitsandza,* wangenta ngacina njengentsaba.+
Kodvwa watsi nawungifihlela buso bakho, ngesaba kakhulu.+
8 Awu Jehova, ngachubeka ngikubita;+
Futsi ngachubeka Jehova ngikucela kutsi ungentele umusa.
9 Kuzuzisa ngani kutsi ngife, kutsi ngehlele emgodzini?*+
Lutfuli lungakudvumisa yini?+ Lungakumemetela yini kwetsembeka kwakho?+
10 Ngilalele Jehova futsi ungentele umusa.+
Awu Jehova, ngisite.+
11 Ungente ngadansa ngijabulile esikhundleni sekutsi ngilile;
Ungikhumule indvwangu yelisaka, wangembatsisa kujabula,
12 Kuze ngihlabele ngikudvumise futsi ngingabindzi.
Awu Jehova Nkulunkulu wami, ngitakudvumisa kuze kube phakadze.