Tikhulu
14 Ngemuva kwaloko Samsoni wehlela eThimna, futsi wafike wabona intfombi lengumFilisti.* 2 Ngako wahamba wayotjela babe wakhe namake wakhe watsi: “Kukhona intfombi lengumFilisti lengikhangile eThimna. Ngitsatseleni yona ibe ngumfati wami.” 3 Kodvwa babe wakhe namake wakhe batsi: “Ngeke yini ukhone kutfola umfati etihlotjeni takho nasemkhatsini wabo bonkhe bantfu bakitsi?+ Kungani kufanele uyofuna umfati kumaFilisti langakasoki?” Kodvwa Samsoni watsi kubabe wakhe: “Ngitsatseleni lentfombi, ngobe ngiyayitsandza.”* 4 Babe wakhe namake wakhe bebangati kutsi loku kuvela kuJehova, ngobe bekafuna litfuba lekulwa nemaFilisti njengobe bekungiwo labebusa ema-Israyeli ngaleso sikhatsi.+
5 Ngako Samsoni wehlela eThimna akanye nababe wakhe namake wakhe. Watsi nakefika etihlahleni temagilebisi taseThimna, wabona libhubesi* lita kuye libhodla. 6 Umoya waJehova wabese umnika emandla,+ futsi walidzabula ekhatsi njengemuntfu nakadzabula ekhatsi imbuti leseyincane ngetandla takhe. Kodvwa akazange amtjele babe wakhe nobe make wakhe ngaloko labekwentile. 7 Ngemuva kwaloko, Samsoni wehla wayokhuluma nalentfombi futsi beyisolo itsandzeka emehlweni akhe.+
8 Ngekuhamba kwesikhatsi nasekayotsatsa lentfombi aye nayo ekhaya,+ waphambukela eceleni wayobuka lelibhubesi lelifile futsi kulo wakhandza libulo letinyosi kanye neluju. 9 Ngako wahwayela loluju etandleni takhe, futsi waludla endleleni. Watsi nakakhandza babe wakhe namake wakhe wabapha lolunye lwalo kute baludle. Kodvwa akazange abatjele kutsi abelutsetse ebhubesini lelifile.
10 Babe waSamsoni wehla waya kulentfombi futsi Samsoni wenta lidzili lapho ngobe nguloko emajaha labekavame kukwenta. 11 Ngesikhatsi bantfu bambona, baletsa timphekeleteli temkhwenyane letingu-30 kute tihambe naye. 12 Samsoni wase utsi kubo: “Ngisacela kuniphica. Nangabe nisati lesiphicwaphicwane futsi ningitjele imphendvulo yaso kulamalanga langu-7 alelidzili, ngitaniniketa tingubo telineni letingu-30 netimphahla tekushintja letingu-30. 13 Kepha nanehluleka kungitjela imphendvulo yaso, kufanele ninginike tingubo telineni letingu-30 netimphahla tekushintja letingu-30.” Bona batsi kuye: “Ase usisho lesiphicwaphicwane sakho, sifuna kusiva.” 14 Ngako watsi kubo:
“Kulokudlanako kwaphuma lokudliwako,
Kulokunemandla kwaphuma lokunongotelako.”+
Kwaphela emalanga lamatsatfu solo bangakhoni kumtjela imphendvulo yalesiphicwaphicwane. 15 Ngelilanga lesine, bakhuluma nemfati waSamsoni batsi: “Khohlisa indvodza yakho+ khona itositjela imphendvulo yalesiphicwaphicwane. Nawungenti njalo sitawushisa wena nendlu yababe wakho ngemlilo. Kantsi nisimemele kulendzawo kuze nitsatse tintfo tetfu yini?” 16 Ngako umfati waSamsoni wamkhalela futsi watsi: “Ngiyabona kutsi uyangitondza, awungitsandzi.+ Uphice bantfu bakitsi kodvwa mine awukangitjeli imphendvulo.” Samsoni yena watsi: “Ngisho bobabe namake angikabatjeli imphendvulo yalesiphicwaphicwane! Pho ngingakutjelelani-ke wena?” 17 Kodvwa wachubeka amkhalela kuwo onkhe lamalanga labesasele alelidzili. Ngelilanga lesi-7, Samsoni wagcina amtjelile ngobe bekamcindzetela. Ngemuva kwaloko umfati waSamsoni wahamba wayotjela bantfu bakubo imphendvulo yalesiphicwaphicwane.+ 18 Ngako ngaphambi kwekutsi lishone* ngalelilanga lesi-7, emadvodza alelidolobha atsi kuSamsoni:
“Yini lenongotela kwendlula luju,
Futsi yini lenemandla kunelibhubesi?”+
Samsoni wawaphendvula watsi:
“Kube beningakalimi ngelitfole lami,+
Beningeke niyati imphendvulo yalesiphicwaphicwane sami.”
19 Ngemuva kwaloko umoya waJehova wamniketa emandla,+ futsi Samsoni wehlela e-Ashkeloni+ wafike wabulala emadvodza akhona langu-30, watsatsa timphahla tawo watinika labo lebebaphendvule lesiphicwaphicwane sakhe.+ Abetfukutsele abila ngalesikhatsi abuyela emuva endlini yababe wakhe.
20 Umfati waSamsoni+ wabese unikwa lelinye lijaha lebeliyimphekeleteli yaSamsoni.+