Imisebenti Yebaphostoli
12 Ngaleso sikhatsi, iNkhosi Herodi yacala kuhlupha lamanye emalunga elibandla.+ 2 Yabulala Jakobe umnakabo Johane ngenkemba.+ 3 Yatsi nayibona kutsi loku bekuwajabulisa emaJuda, yase ibopha naPhetro. (Loku kwenteka ngesikhatsi seMkhosi Wesinkhwa Lesite Imvubelo.)+ 4 Yambamba yase imvalela ejele.+ Bekagadvwa ngemacembu lamane emasotja, amgadza ngekushintjana, futsi licembu ngalinye belinemasotja lamane. Herodi bekafuna kumkhiphela* kubantfu ngemuva kweliPhasika. 5 Ngako Phetro wagcinwa ejele, kodvwa libandla belichubeka limthantazela kuNkulunkulu ngenhlitiyo yonkhe.+
6 Ngebusuku lobungaphambi kwekutsi Herodi amletse kubantfu, Phetro bekaboshwe ngetinketane letimbili, alele emkhatsini wemasotja lamabili, futsi bogadzi bebagadze emnyango welijele. 7 Kodvwa kwema ingilosi yaJehova,*+ futsi kwakhanya ejele. Lengilosi yanyikitisa Phetro, yamvusa yatsi: “Vuka masinyane!” Letinketane tawa etandleni takhe.+ 8 Lengilosi yatsi kuye: “Gcoka,* ufake netincabule takho.” Phetro wenta njalo. Ekugcineni yatsi kuye: “Gcoka ingubo yakho yangetulu, bese uyangilandzela.” 9 Ngako waphuma wayilandzela, kodvwa bekangati kutsi lentfo lebeyentiwa ngulengilosi yenteka mbamba. Ecinisweni, bekacabanga kutsi ubona umbono. 10 Bendlula bogadzi bekucala nebesibili, base befika esangweni lensimbi leliphumela edolobheni, futsi lavele lativulekela. Nasebaphumile, behla ngemgwaco futsi masinyane lengilosi yamshiya. 11 Ngesikhatsi Phetro sekumkhanyela kutsi kwentekeni, watsi: “Nyalo sengiyati kutsi Jehova* utfumele ingilosi yakhe wangikhulula esandleni saHerodi, nakuto tonkhe tintfo emaJuda lebekafuna tenteke.”+
12 Ngemuva kwaloko waya ekhaya laMariya, make waJohane lokutsiwa nguMakho,+ lapho bekuhlangene khona bafundzi labambalwa futsi bathantaza. 13 Ngesikhatsi Phetro anconcotsa esangweni, intfombatane lesisebenti lokutsiwa nguRoda yeta yatomvulela. 14 Yatsi nayiva livi laPhetro yajabula kakhulu kangangekutsi ayilivulanga lelisango, kodvwa yagijima yabuyela emuva yayobika kutsi Phetro ume esangweni. 15 Bona batsi kuyo: “Usangene yini?” Kodvwa lentfombatane yachubeka ibelesela itsi loko lekushoko kuliciniso. Ngako babese batsi: “Yingilosi yakhe.” 16 Kodvwa Phetro bekasolo anconcotsa. Batsi nabavula lelisango, bambona futsi bamangala. 17 Wababindzisa wase ubatjela indlela Jehova* lebekamkhiphe ngayo ejele, watsi: “Nibobikela Jakobe+ kanye nebazalwane ngaloku.” Ngemuva kwaloko waphuma waya kulenye indzawo.
18 Ekuseni, emasotja bekadidekile ngekutsi kwentekeni kuPhetro. 19 Herodi wamfunisisa, kodvwa watsi nakangamtfoli waphenya labogadzi wase utsi abajeziswe;+ ngemuva kwaloko Herodi wesuka eJudiya waya eKhesariya wahlala khona sikhashana.
20 Herodi bekabatfukutselele* bantfu baseThire naseSidoni. Ngemuva kwekutsi labantfu bancenge Blastusi, indvodza lebeyengamele tintfo letenteka endlini yenkhosi,* baya kuHerodi kanyekanye kuze bakhe kuthula, ngobe live labo belemukela kudla eveni lakhe. 21 Ngalelinye lilanga, ngesikhatsi bantfu bahlangene, Herodi wagcoka timphahla takhe tasebukhosini, wahlala esihlalweni sekwehlulela, wase wetfula inkhulumo. 22 Ngemuva kwaloko, labantfu lebebalapho bamemeta batsi: “Leli livi lankulunkulu, akusilo lemuntfu!” 23 Masinyane, ingilosi yaJehova* yashaya Herodi ngesifo ngobe akazange akhatimulise Nkulunkulu, futsi wadliwa tibungu, wafa.
24 Kodvwa livi laJehova* lachubeka likhula futsi landza.+
25 Ngesikhatsi boBhanabasi+ naSawula sebawucedzile umsebenti wekusita eJerusalema,+ babuyela emuva bahamba naJohane+ lobekutsiwa nguMakho.