Umshumayeli
1 Lawa ngemavi emfundzisi,*+ indvodzana yaDavide lebeyiyinkhosi yaseJerusalema.+
2 Umfundzisi utsi: “Kulite!
Kulite! Konkhe kulite!”+
3 Umuntfu utfolani ngawo wonkhe umsebenti wakhe lomatima
Latikhandla ngawo lapha emhlabeni?+
4 Situkulwane siyengca futsi kufike lesinye situkulwane,
5 Lilanga liyaphuma futsi lishone;
Ngekushesha libuyele lapho litawuphindze liphume khona.+
6 Umoya ubheka eningizimu bese ubheka enyakatfo ushaya indingilizi;
Uchubeka ujikeleta futsi ungayekeli kuhhusha.
7 Yonkhe imifula igeletela elwandle, kodvwa alugcwali.+
Imifula ibuyela emuva lapho isuke khona, kuze iphindze igelete.+
8 Tonkhe tintfo tenta umuntfu adzinwe;
Kute longatichaza.
Liso alidzinwa kubuka;
Nendlebe ayidzinwa kuva.
9 Lokwake kwaba khona kutawuphindze kube khona,
Lokwake kwentiwa kutawuphindze kwentiwe;
Kute intfo lensha lapha emhlabeni.+
10 Ikhona yini intfo umuntfu langatsi ngayo: “Asenibuke naku, kusha”?
Kwakuvele kukhona kusukela kadzeni;
Kwakuvele kukhona ngaphambi kwekutsi sibe khona natsi.
11 Kute umuntfu lokhumbula bantfu bakadzeni;
Nalabo labatawulandzela angeke bakhunjulwe;
Futsi angeke bakhunjulwe nangulabo labatawuta emvakwabo.+
12 Mine mfundzisi, ngiyinkhosi yaka-Israyeli eJerusalema.+ 13 Ngancuma kusebentisa kuhlakanipha+ kwami kuze ngibukisise tonkhe tintfo letentiwa emhlabeni.+ Ngahlolisisa imisebenti lematima Nkulunkulu layinikete bantfu, futsi lebenta bahlale bamatasatasa.
14 Ngabona yonkhe imisebenti leyentiwa emhlabeni,
Futsi ngabona kutsi konkhe kulite, kufana nekucosha umoya.+
15 Intfo legwegwile angeke ize icondziswe,
Nentfo lengekho angeke ize ibalwe.
16 Ngase ngikhuluma ngenhlitiyo ngitsi: “Asewubuke nje, mine ngatfola kuhlakanipha lokukhulu kwendlula bonkhe labake baba khona embikwami eJerusalema,+ nenhlitiyo yami yahlakanipha kakhulu futsi yaba nelwati lolunyenti.”+ 17 Ngatimisela kwati kuhlakanipha, umsangano* kanye nebulima,+ futsi ngabona kutsi naloku kufana nekucosha umoya.
18 Ngobe kuhlakanipha kakhulu kuletsa kucindzeteleka lokukhulu,
Ngako umuntfu lowandzisa lwati lwakhe utandzisela lusizi.+