Hezekeli
1 Ngemnyaka wesi-30, enyangeni yesine ngelilanga lesihlanu, ngalesikhatsi ngisemkhatsini webantfu labatfunjiwe+ ngasemfuleni iKhebari,+ kwavuleka emazulu futsi ngabona imibono levela kuNkulunkulu. 2 Ngelilanga lesihlanu kuleyo nyanga, lokungumnyaka wesihlanu wekutfunjwa kweNkhosi Jehoyakhini,+ 3 livi laJehova lefika kuHezekeli,* indvodzana yaBuzi umphristi, angasemfuleni iKhebari, eveni lemaKhaledi.+ Kukuleyondzawo lapho emandla* aJehova aba setikwakhe khona.+
4 Ngatsi ngisebukile, ngabona sivunguvungu sichamuka enyakatfo.+ Bekunelifu lelikhulu kakhulu nembane+ lokwakutungeletwe kukhanya lokukhulu, futsi emkhatsini walombane bekunalokutsite lebekubonakala ngatsi kuyinhlanganisela yelisiliva neligolide.+ 5 Ekhatsi kwalombane bekukhona lebekubonakala shengatsi tidalwa letine letiphilako+ futsi ngasinye sato besifanana nemuntfu. 6 Sidalwa ngasinye besinebuso lobune netimphiko letine.+ 7 Tinyawo taletidalwa beticondzile futsi ngephansi betifanana nemasondvo elitfole. Betimanyatela njengelitfusi lelimanyatelako.+ 8 Ngephansi kwetimphiko tato etinhlangotsini tato letine betinetandla letifana netemuntfu, futsi totine letidalwa betinebuso netimphiko. 9 Timphiko tato betitsintsana. Letidalwa betingagucuki natihamba, nguleso naleso besihamba sicondze ngco embili.+
10 Buso bato bebubukeka kanjena: Sidalwa ngasinye kuleti letine besinebuso bemuntfu, sinebuso belibhubesi+ ngesekudla, sinebuso benkunzi+ ngesencele, futsi totine betinebuso+ belusweti.+ 11 Bebunjalo-ke buso bato. Timphiko tato betivulekele ngetulu kwetinhloko tato. Sidalwa ngasinye besinetimphiko letimbili letitsintsanako futsi leletinye letimbili betivale imitimba yato.+
12 Nguleso naleso sidalwa besihamba sicondze ngco embili, siye nome ngukuphi lapho umoya usiholela khona.+ Betingagucuki natihamba. 13 Letidalwa betibukeka njengemalahle lavutsako. Bekuphindze kube netintfo letinjengetibane, lebetikhanyisa kakhulu, tiya emuva nasembili emkhatsini waletidalwa letiphilako, futsi bekunembane losuka kulomlilo.+ 14 Betitsi letidalwa letiphilako natiya emuva nasembili, kuhamba kwato bekungatsi kumanyata kwembane.
15 Njengobe bengibukela letidalwa letiphilako letinebuso lobune, ngabese ngibona lisondvo emhlabatsini liseceleni kwesidalwa ngasinye.+ 16 Lamasondvo nendlela lakheke ngayo, bewakhatitela njengekhrisolithe futsi omane bekafanana. Kubukeka kwawo nendlela lakheke ngayo bekungatsi lelinye lisondvo lisekhatsi kwalelinye.* 17 Nawahamba, abekhona kuya kuto totine tinhlangotsi angagucuki. 18 Emarimu alamasondvo bekaphakeme ngendlela lemangalisako futsi lamarimu awo omane bekagcwele emehlo yonkhe indzawo.+ 19 Bekutsi nome nini letidalwa letiphilako natihamba, nalamasondvo ahambe kanye nato. Nangabe tiphakama emhlabatsini, nalamasondvo bekaphakama.+ 20 Letidalwa betihamba tiye lapho umoya utiholela khona, nome ngukuphi lapho umoya bewuya khona. Lamasondvo abephakama kanye nato ngobe umoya lobewusebenta kuto* bewukhona nakulamasondvo. 21 Betitsi letidalwa natihamba, nalamasondvo ahambe; titsi natima, nalamasondvo eme. Betitsi natiphakama emhlabatsini, nalamasondvo bekaphakama kanye nato ngobe umoya lobewusebenta kuletidalwa bewukhona nakulamasondvo.
22 Ngetulu kwetinhloko taletidalwa letiphilako, bekunalokufana nemkhatsi futsi bekucwebetela njengelichwa lelimhlophe cwa, lobekwendlaleke ngetulu kwetinhloko tato.+ 23 Ngephansi kwalomkhatsi, timphiko tato betivuleke ticondzile tibuke etulu,* ngulolo phiko luvulekele ngakulolunye. Timphiko letimbili tesidalwa ngasinye lesiphilako betimbonye luhlangotsi lunye lwemtimba waso, kantsi letinye letimbili betimbonye lololunye luhlangotsi. 24 Ngesikhatsi ngiva umsindvo wetimphiko tato, bekungatsi ngumsindvo wemanti lagijimako, bekungatsi liphimbo laSomandla.+ Betitsi natihamba, kuvakale umsindvo lofana newelibutfo lemphi. Natima betehlisa timphiko tato.
25 Bekunelivi ngetulu kwemkhatsi lobewungetulu kwetinhloko tato. (Betitsi natima, tehlise timphiko tato.) 26 Ngetulu kwalomkhatsi lobewungetulu kwetinhloko tato, bekunalokufanana nelitje lesafire+ futsi bekufanana nesihlalo sebukhosi.+ Kulesihlalo sebukhosi bekuhleti lotsite lobekafanana nemuntfu.+ 27 Ngabona lokutsite lokucwebetelako lebekubonakala ngatsi kuyinhlanganisela yelisiliva neligolide+ lebekufana nemlilo kuphuma kuloko lokungatsi lukhalo lwakhe kuya etulu; kusukela elukhalo lwakhe kuya entasi ngabona lokutsite lokufana nemlilo.+ Bekatungeletwe kukhanya lokukhulu 28 lokufana nemushi wenkosazana+ loba semafini nalina. Bekunjalo-ke lokukhanya lokukhulu. Bekufana nekubonakala kwenkhatimulo yaJehova.+ Ngatsi nangikubona, ngaguca ngatsintsa ngebuso phansi futsi ngabese ngiva livi lalotsite lokhulumako.