Imisebenti Yebaphostoli
16 Ngako wefika eDebe naseListra.+ Kuleyo ndzawo bekunalomunye umfundzi lobekutsiwa nguThimothi,+ make wakhe bekangumJuda futsi akholwa, kantsi babe wakhe bekangumGriki. 2 Bazalwane baseListra nebase-Ikhoniyumi bebakhuluma kahle ngaThimothi. 3 Pawula waba nesifiso sekuhamba naye. Ngako wamtsatsa wamsoka ngenca yemaJuda lebekakuleto tindzawo,+ ngobe onkhe bekati kutsi babe wakhe ungumGriki. 4 Njengobe bahamba kulamadolobha, bebatjela bazalwane ngetincumo letentiwe baphostoli nalabadzala eJerusalema+ kuze batigcine. 5 Kukholwa kwemabandla bekuchubeka kuciniswa, futsi bekandza malanga onkhe.
6 Bahamba badzabula eFrigiya naseGalathiya,+ ngobe umoya longcwele bewubalele kutsi bakhulume ngelivi laNkulunkulu esifundzeni sase-Asiya. 7 Batsi nabefika eMisiya, betama kungena eBhithiniya,+ kodvwa umoya waJesu awubavumelanga. 8 Ngako bendlula* eMisiya baze befika eThrowasi. 9 Ebusuku, Pawula wabona umbono. Wabona kume indvodza yaseMasedoniya imncenga itsi: “Yewelela eMasedoniya utosisita.” 10 Ngekushesha nasekabone lombono, satilungiselela kuya eMasedoniya, ngobe besesibonile kutsi Nkulunkulu usitfuma khona kuze simemetele tindzaba letimnandzi.
11 Sesuka ngemkhumbi eThrowasi sacondza eSamothrakhe, kwatsi ngakusasa saya eNeyapholisi. 12 Nasisuka lapho saya eFiliphi,+ lidolobha lebeliphetfwe ngemaRoma, futsi lebelibalulekile esifundzeni saseMasedoniya. Sahlala emalangana kulelidolobha. 13 Ngelilanga leliSabatha, saphumela ngephandle kwelisango saya ngasemfuleni, futsi besicabanga kutsi lapho kunendzawo yekuthantaza. Sefika sahlala phansi sakhuluma nebafati lesabatfola bahlangene lapho. 14 Lomunye umfati lobekutsiwa nguLidiya bekalalele, bekangumtsengisi wetingubo letibukhwebeletane,* awasedolobheni laseThiyathira+ futsi asikhonti saNkulunkulu. Jehova* wavula inhlitiyo yakhe kuze inake tintfo lebetishiwo nguPawula. 15 Ngesikhatsi yena nabo bonkhe labahlala kakhe babhajatiswa,+ wasincenga watsi: “Nangabe nibona kutsi ngetsembekile kuJehova,* wotani nitohlala endlini yami.” Wasincenga saze savuma.
16 Nasisaya kulendzawo yekuthantaza, sahlangana nalenye intfombatana lesigcili, inelidimoni lekuphengula.+ Banikati bayo bebatfola imali lenyenti ngalokuphengula kwayo.* 17 Lentfombatana beyisolo isilandzela imemeta itsi: “Lamadvodza lamemetela kini indlela leningasindziswa ngayo, atinceku taNkulunkulu Losetikwako Konkhe.”+ 18 Yachubeka ikwenta loku emalanga lamanyenti. Ekugcineni Pawula wacansuka, watsi kulelidimoni: “Egameni laJesu Khristu ngitsi phuma kuye.” Lelidimoni laphuma ngaso leso sikhatsi.+
19 Ngesikhatsi banikati balentfombatana babona kutsi litsemba labo lekutfola imali alisekho,+ babamba Pawula naSilasi babahudvulela emakethe, embikwebabusi.+ 20 Babayisa kubomantji, bafike batsi: “Lamadvodza ahlupha kakhulu lapha edolobheni lakitsi.+ AngemaJuda, 21 futsi akhuluma ngemasiko lesingakavumeleki kuwagcina tsine maRoma.” 22 Sicumbi sebantfu naso sabavukela, futsi ngemuva kwekutsi labomantji badzabule tingubo taboPawula naSilasi, babese bakhipha umyalo wekutsi babhambabulwe ngemizaca.+ 23 Nasebabashaye imivimba leminyenti, babese babavalela ejele, bayala gadzi welijele kutsi abagadzisise.+ 24 Ngemuva kwekutfola lomyalo, logadzi wabafaka esitokisini, wakhungela tinyawo tabo etigodvweni.
25 Ekhatsi nebusuku, boPawula naSilasi bathantaza, baphindze badvumisa Nkulunkulu ngetingoma,+ futsi letinye tiboshwa betibalalele. 26 Ngekushesha, kwaba nekutamatama kwemhlaba lokukhulu, kwaze kwatamatama ngisho netisekelo telijele. Kwatsi kusenjalo, yonkhe iminyango yavuleka, netinketane lebetibabophile takhumuka kubo bonkhe.+ 27 Ngesikhatsi logadzi avuka futsi abona kutsi iminyango yelijele ivulekile, wahoshula inkemba yakhe afuna kutibulala, ngobe bekacabanga kutsi letiboshwa tibalekile.+ 28 Kodvwa Pawula wamemeta watsi: “Ungatibulali, sikhona sonkhe!” 29 Logadzi wacela kwekukhanyisa, wagijima wangena ngekhatsi, futsi waguca embikwaPawula naSilasi achachatela. 30 Wabakhiphela ngephandle watsi: “Banumzane, yini lokufanele ngiyente kuze ngisindziswe?” 31 Bona batsi: “Kholwa yiNkhosi Jesu, futsi wena nemndeni wakho nitawusindziswa.”+ 32 Ngako bashumayela ngelivi laJehova* kuye nakuwo wonkhe umndeni wakhe. 33 Wabatsatsa kulobo busuku wafike wageza tilondza tabo. Ngaphandle kwekucitsa sikhatsi, yena nawo wonkhe umndeni wakhe babhajatiswa.+ 34 Waya nabo kakhe, wafike wabadekela litafula badla. Yena kanye nawo wonkhe umndeni wakhe bajabula kakhulu, njengobe besebakholwa kuNkulunkulu.
35 Nasekusile, labomantji batfuma bogadzi babo kuye batsi: “Khulula labo bantfu.” 36 Ngako logadzi welijele wabikela Pawula watsi: “Bomantji batfume emadvodza kutsi atonikhulula. Ngako seningaphuma, nihambe ngekuthula.” 37 Kodvwa Pawula watsi kubo: “Basibhambabule embikwebantfu sibe site licala,* ngisho nobe singemaRoma,+ futsi basivalela ejele. Manje sebafuna kusikhulula ngasense? Cha, ngeke! Akute bona batosikhipha.” 38 Labogadzi babikela bomantji ngaloko, futsi nabeva kutsi lamadvodza angemaRoma,+ besaba kakhulu. 39 Ngako beta babancenga, futsi ngemuva kwekubakhiphela ngephandle, babacela kutsi bahambe kulelidolobha. 40 Kodvwa baphuma ejele baya ekhaya laLidiya, futsi ngesikhatsi babona bazalwane, babakhutsata+ base bayahamba.