Incwadzi Yekucala YaSamuweli
19 Ngekuhamba kwesikhatsi, Sawula watjela Jonathani indvodzana yakhe nato tonkhe tinceku takhe kutsi ufuna kubulala Davide.+ 2 Ngesizatfu sekutsi Jonathani indvodzana yaSawula abemtsandza kakhulu Davide,+ watsi kuye: “Babe ufuna kukubulala. Ngicela ubocaphela kusasa ekuseni futsi uye endzaweni lesekusitsekeni ufike ubhace khona. 3 Ngitawuphuma bese ngima eceleni kwababe lena esigangeni, lapho utawube ubhace khona. Ngitawukhuluma ngawe kuye, futsi nakukhona lengitakutfola, ngitawubese ngiyakutjela.”+
4 Ngako Jonathani wakhuluma kahle ngaDavide+ kubabe wakhe Sawula. Watsi kuye: “Inkhosi akukafaneli yente lutfo lolubi kuDavide inceku yayo, ngobe akakoni ngalutfo futsi loko lakwentele kona kusite wena. 5 Wabeka kuphila kwakhe engotini kuze abulale lomFilisti,+ futsi ngaleyondlela Jehova waletsela onkhe ema-Israyeli kuncoba lokukhulu.* Wena wakubona loko, futsi wajabula. Kungani-ke kufanele wone ngekutsi ucitse ingati lete licala, ubulale Davide ngaphandle kwesizatfu?”+ 6 Sawula wamlalela Jonathani, futsi wafunga watsi: “Ngifunga Jehova Nkulunkulu lophilako, kutsi Davide ngeke abulawe.” 7 Ngemuva kwaloko, Jonathani wabita Davide wase umtjela ngako konkhe loku. Jonathani wase uta naDavide kuSawula futsi Davide wachubeka ayinceku yaSawula njengasekucaleni.+
8 Ngekuhamba kwesikhatsi kwaphindze kwaba nemphi, ngako Davide wahamba wayokulwa nemaFilisti wabulala lamanyenti awo futsi onkhe langazange afe abaleka.
9 Umoya lomubi lebewuvunyelwe nguJehova wahlupha Sawula+ ngesikhatsi ahleti endlini yakhe aphetse sikhali esandleni, futsi Davide abedlala umculo ngelihabhu.+ 10 Sawula wetama kugwaza Davide ngesikhali amhlanganise nelubondza, kodvwa Davide wavika, lesikhali sagwaza lubondza. Davide wabaleka futsi waphunyula kulobo busuku. 11 Ngekuhamba kwesikhatsi Sawula watfumela titfunywa kutsi tiyogadza indlu yaDavide futsi timbulale ekuseni,+ kodvwa Mikhali umfati waDavide watsi kuye: “Nangabe ungeke ubaleke lamuhla ebusuku, kusasa utakufa.” 12 Ngekushesha Mikhali wehlisa Davide ngelifasitelo kuze abaleke futsi aphunyule. 13 Mikhali watsatsa sithico* wasilalisa embhedzeni, wase ubeka inethi leyentiwe ngeboya bembuti lapho kucamela khona Davide futsi wasimbonya ngesembatfo.
14 Sawula wabese utfumela titfunywa kuDavide, kodvwa Mikhali watsi: “Uyagula.” 15 Ngako Sawula watfumela letitfunywa kutsi tiyobona Davide, watsi kuto: “Mletseni ngembhedze wakhe kute ngimbulale.”+ 16 Ngesikhatsi letitfunywa tingena, tatfola kunalesithico* embhedzeni futsi bekunenethi leyentiwe ngeboya bembuti lapho bekufanele ngabe Davide ucamele khona. 17 Sawula watsi kuMikhali: “Ungikhohliseleni wahambisa sitsa sami+ kute singibalekele?” Mikhali wamphendvula watsi: “Utsite kimi: ‘Ngihambise, futsi nawungakwenti loko ngitakubulala!’”
18 Davide abebalekile futsi waphunyuka, waya kuSamuweli eRama.+ Wafike wamtjela konkhe Sawula lakwente kuye. Ngemuva kwaloko, wahamba naSamuweli bayohlala eNayothi.+ 19 Ngekuhamba kwesikhatsi Sawula watfola umbiko lotsi: “Davide useNayothi eRama.” 20 Ngaso leso sikhatsi, Sawula watfumela titfunywa kutsi tiyobamba Davide. Natibona baphrofethi lasebakhulile baphrofetha futsi Samuweli emile angumholi wabo, umoya waNkulunkulu wehlela kuletitfunywa taSawula, nato tase ticala kwenta tintfo njengebaphrofethi.
21 Nabatjela Sawula ngaloku, ngekushesha watfumela letinye titfunywa, nato tacala kwenta tintfo njengebaphrofethi. Ngako Sawula waphindze watfumela licembu lesitsatfu letitfunywa, futsi nato tacala kwenta tintfo njengebaphrofethi. 22 Ekugcineni, Sawula naye wahamba waya eRama. Nakefika emgodzini lomkhulu wemanti loseSeku, wabuta watsi: “Baphi boSamuweli naDavide?” Bamphendvula batsi: “BaseNayothi+ eRama.” 23 Ngesikhatsi Sawula asendleleni alibangise eNayothi eRama, umoya waNkulunkulu wehlela kuye futsi abehamba enta tintfo njengemphrofethi waze wayofika eNayothi eRama. 24 Wakhumula netembatfo takhe futsi wenta tintfo njengemphrofethi embikwaSamuweli, walala lapho angcunu* lilanga lonkhe nebusuku bakhona. Kungako kutsiwa: “NaSawula ungumphrofethi yini?”+