Hezekeli
14 Lamanye emadvodza aka-Israyeli eta afike ahlala embikwami.+ 2 Livi laJehova lase liyefika kimi latsi: 3 “Ndvodzana yemuntfu, lamadvodza atimisele kulandzela tithico tawo letenyanyekako* futsi abeke lugibe lolubangela bantfu kutsi bone. Kufanele yini ngiwavumele kutsi angibute?+ 4 Khuluma nawo utsi: ‘Naku lokushiwo yiNkhosi Lephakeme Jehova: “Nangabe um-Israyeli atimisele kulandzela tithico takhe letenyanyekako, futsi abeka lugibe kuze abangele bantfu kutsi bone, bese uta kutobuta kumphrofethi, mine Jehova ngitamphendvula kuye ngelinani letithico takhe letenyanyekako. 5 Ngobe ngitawubangela kutsi ema-Israyeli etfuke kakhulu* ngenca yekutsi onkhe angishiyile alandzela tithico tawo letenyanyekako.”’+
6 “Ngako-ke khuluma nebantfu baka-Israyeli utsi: ‘Naku lokushiwo yiNkhosi Lephakeme Jehova: “Buyani, shiyani letithico tenu letenyanyekako, bese niyayiyekela yonkhe lemikhuba yenu leyenyanyekako.+ 7 Ngobe nangabe um-Israyeli nome umuntfu wakulesinye sive lohlala ka-Israyeli atehlukanisa nami, futsi atimisele kulandzela tithico takhe letenyanyekako, aphindze abeke lugibe lolubangela bantfu kutsi bone, bese uyeta utewubuta kumphrofethi wami,+ mine Jehova lucobo lwami ngitamphendvula. 8 Buso bami butawumelana naloyo muntfu futsi ngitamenta abe sibonelo lesisecwayiso nentfo yekuhlekwa bantfu, bese ngiyamsusa emkhatsini webantfu bami;+ futsi niyawukwati kutsi mine nginguJehova.”’
9 “‘Kodvwa nangabe umphrofethi ayengeka bese uyaphendvula, kutawube kungimi, mine Jehova, loyenge lomphrofethi.+ Ngitawubese ngelulela sandla sami kuye kuze ngimelane naye, ngimcotfule kubantfu bami ema-Israyeli. 10 Kutawudzingeka kutsi betfwale licala labo; licala lalobutile litawulingana nelicala lemphrofethi, 11 kuze bantfu baka-Israyeli bayekele kungishiya futsi bayekele kutingcolisa ngato tonkhe tono tabo. Batawuba bantfu bami, mine ngibe nguNkulunkulu wabo,’+ kusho iNkhosi Lephakeme Jehova.”
12 Livi laJehova laphindze lefika kimi latsi: 13 “Ndvodzana yemuntfu, nangabe live lona kimi ngekutsi lingetsembeki, ngitawelula sandla sami ngimelane nalo, ngicotfule kudla*+ kwalo, ngitfumele nendlala lenkhulu kulo,+ bese ngibulala bantfu netilwane letikulo.”+ 14 “INkhosi Lephakeme Jehova itsi: ‘Ngisho nome bekungatsiwa lamadvodza lamatsatfu, lokunguNowa,+ Danyela+ naJobe+ akhona kulelive, bewangatisindzisa wona* kuphela ngenca yekulunga kwawo.’”+
15 “‘Nome asesitsi ngitfumela tilwane tesiganga letiyingoti, tidzabule kulelive bese tilinciphisa kakhulu linani lebantfu* bakhona, tente lelive libe yindzawo lengenamsebenti, kube bete namunye lodzabula kulo ngenca yaletilwane tesiganga.+ 16 Ngitifunga mine, ngitsi ngisho nome lamadvodza lamatsatfu bekakhona kulelive, bekangeke awasindzise emadvodzana awo nemadvodzakati awo; bekatatisindzisa wona kuphela futsi lelive belingeke lihlale muntfu,’ kusho iNkhosi Lephakeme Jehova.”
17 “‘Nome asesitsi ngiletsa inkemba kulelive,+ bese ngitsi: “Inkemba ayidzabule kulo lonkhe lelive,” ngibulale bantfu netilwane letikulo,+ 18 ngisho nome bekungatsiwa lamadvodza lamatsatfu akhona kulo, ngitifunga mine kutsi bekangeke awasindzise emadvodzana awo nemadvodzakati awo; bekatatisindzisa wona kuphela,’ kusho iNkhosi Lephakeme Jehova.”
19 “‘Nome-ke asesitsi ngitfumela sifo lesibulalako kulelive,+ ngiphindze ngitfululele intfukutselo yami kulo, ngibangele kucitseka kwengati yebantfu neyetilwane, 20 ngisho nome boNowa,+ Danyela+ naJobe+ bebakhona kulo, ngitifunga mine kutsi bebangeke bawasindzise emadvodzana abo nemadvodzakati abo, kodvwa bebatatisindzisa bona* kuphela ngenca yekulunga kwabo,’ kusho iNkhosi Lephakeme Jehova.”+
21 “Ngako naku lokushiwo yiNkhosi Lephakeme Jehova: ‘Kutawenteka lokufanako nangitfumela tijeziso tami letine,*+ letifaka ekhatsi inkemba, indlala, tilwane tesiganga letiyingoti nesifo lesibulalako,+ futsi ngikutfumele eJerusalema kuze ngibulale bantfu netilwane letikuyo.+ 22 Nome kunjalo, labanye labasele kuyo batawuphunyula+ futsi batawukhishwa kulelive, lokufaka ekhatsi emadvodzana nemadvodzakati. Batawuta kini futsi nitawutsi nanibona imisebenti yabo netento tabo, natawubese niyadvudvuteka ngenca yenhlekelele lengiyiletse eJerusalema, ngako konkhe loko lengikwentile kuyo.’”
23 “INkhosi Lephakeme Jehova itsi: ‘Nitawudvudvuteka nanibona imisebenti yabo netento tabo, futsi niyawukwati kutsi loko lengikwente kuyo ngikwente ngesizatfu lesiphatsekako.’”+