OBADIYA
1 Lona ngumbono lowabonwa ngu-Obadiya:*
INkhosi Lephakeme Jehova yanika Obadiya umbono lomayelana na-Edomu.+ Obadiya watsi:
“Sitfole umbiko lovela kuJehova,
Kunesitfunywa lesitfunyelwe etiveni, futsi sitsi:
‘Sukumani, asitilungiselele kuyohlasela Edomu.’”+
2 “Nginente naba sive lesibukelwa phansi;
Ngabangela nekutsi bantfu banedzelele kakhulu.+
3 Kutetsemba kakhulu kunikhohlisile+
Nine lenihlala ekhatsi emadvwaleni,
Kunikhohlisile nine lenihlala eticongweni tetintsaba, lebenititjela nitsi:
‘Ngubani longasehlisela phansi emhlabatsini?’
4 Ngisho nobe ningahlala etulu* kuhle kwelusweti,
Nobe nakhe sidleke senu etinkhanyetini,
Mine ngitanilandza khona lapho,” kusho Jehova.
5 “Kube beningafikelwa tigebengu ebusuku,
(Nitawubhujiswa niphele nya!)*
Betingeke yini titsatse loko letikutele nje kuphela?
Kube bantfu labavuna emagilebisi bebangeta kini,
Bebangeke yini banishiyele leningawabutsa?+
6 Awu nine bantfwana ba-Esawu, bebanigijimisa banifuna!
Umcebo wenu loligugu lobewufihliwe sewutsetfwe!
7 Banicoshile eveni labo.
Bonkhe lebebanisita* banikhohlisile.
Bantfu lebebanekuthula nani banehlulile.
Labo labadla nani batanibekela lugibe,
Kodvwa nine angeke nibone.”
8 Jehova utsi: “Ngalelolanga,
Ngitawubhubhisa bantfu labahlakaniphile baka-Edomu+
Futsi ngitawucotfula bantfu labanekucondza labasesifundzeni lesinetintsaba saka-Esawu.
9 Awu Themani,+ emabutfo akho atawesaba kakhulu,+
Ngobe bonkhe labasesifundzeni lesinetintsaba saka-Esawu batawubulawa.+
10 Ngenca yebudlova lobente kuJakobe+ umnakenu,
Utawuhlazeka kakhulu,+
Futsi ushabalale kuze kube phakadze.+
11 Ngalelilanga umile ubukela,
Ngesikhatsi bantfu bekuhamba batfumba libutfo lakhe,+
Nangalesikhatsi bantfu bakuletinye tive bangena emasangweni akhe, futsi bashaya inkatho+ behlukaniselana tintfo letitsetfwe eJerusalema,
Nawe bekungatsi ungulomunye wabo.
12 Bekungakafaneli ujabule ngekuhlupheka+ lokwehlele umnakenu,
Bekungakafaneli utfokote lapho bantfu bakaJuda bashabalala,+
Futsi bekungakafaneli ukhulume kabi nabacindzetelekile.
13 Bekungakafaneli ungene egedeni lebantfu bami ngelilanga labo lenhlekelele,+
Bekungakafaneli ujabule ngalesikhatsi tintfo tingabahambeli kahle,
Futsi bekungakafaneli utsintse umcebo wabo ngesikhatsi bahluphekile.+
14 Bekungakafaneli ume lapho kuhlangana khona tindlela kuze ubulale labasindzile,+
Futsi labo labasindzile bekungakafaneli ubanikele etitseni tabo ngesikhatsi bacindzetelekile.+
15 Selisondzele lilanga lekutsi Jehova amelane nato tonkhe tive.+
Loko lokwente kulabanye kutawentiwa nakuwe.+
Utawuphatfwa ngendlela nawe lobewubaphatsa ngayo labanye.*
16 Ngendlela lobewunatsa ngayo liwayini entsabeni yami lengcwele,
Kanjalo-ke netive titawuchubeka tinatsa+ intfukutselo yami kuhle kweliwayini.
Titayinatsa tiyiminyele intfukutselo yami,
Futsi titawushabalala kube ngatsi atizange setibe khona.
17 Kodvwa eNtsabeni iSiyoni kutawuba nalabo labasindzile,+
Futsi itawuba ngcwele;+
Nebantfwana baJakobe batawuphindze batsatse tintfo tabo.+
18 Bantfwana baJakobe batawuba ngumlilo,
Nebantfwana baJosefa babe lilangabi,
Futsi bantfwana ba-Esawu batawuba njengemakhoba;
Batawubalumeka ngemlilo, bashe bangcongce,
Futsi kute lotawusindza ebantfwaneni ba-Esawu,+
Ngobe Jehova sewukhulumile.
19 Batawutsatsa iNegebhu kanye nesifundza lesinetintsaba saka-Esawu+
Batsatse iShefela nelive lemaFilisti.+
Batawutsatsa indzawo ya-Efrayimu, nendzawo yaseSamariya,+
Futsi Bhenjamini utawutsatsa iGileyadi.
20 Bantfu bakulendzawo levikelekile lebebatfunjiwe,+
Lokungema-Israyeli, batawutsatsa live lemaKhenani kuze kuyofika eSarefathi.+
Bantfu baseJerusalema labatfunjiwe futsi lebebaseSefaradi, batawutsatsa emadolobha aseNegebhu.+
21 Labo labatawubasindzisa batawukhuphuka baye eNtsabeni iSiyoni
Kuze behlulele sifundza lesinetintsaba saka-Esawu,+
Futsi nguJehova lotawuba yinkhosi.”+
Lokusho kutsi “Inceku YaJehova.”
Kungaphindze kubekwe ngekutsi, “ningandizela etulu.”
Kungaphindze kubekwe ngekutsi, “Kungakanani lebetitakubhubhisa?”
Nobe “lebebente sivumelwane nani.”
NgesiHebheru kutsi, “Indlela lobewubaphatsa ngayo labanye itawubuya enhloko yakho.”