Tishayo Letingu-10

ASE ubuke letitfombe. Ngasinye kuto sikhombisa tishayo Jehova latiletsa eGibhithe. Esitfombeni sekucala sibona Aroni ashaya uMfula iNayili ngendvuku yakhe. Watsi nje nakacedza kuwushaya, emanti emfula agucuka aba yingati. Tinhlanti tafa, futsi nemanti acala kunuka.

Kwesibili, Jehova wabangela kutsi kuphume ticoco eMfuleni iNayili. Tagcwala yonkhe indzawo—emahhavini, etitjeni tekubhaka kanye nasemibhedzeni yebantfu. Ngalesikhatsi ticoco setifile emaGibhithe atibutsisa ndzawonye taba ticumbi letinkhulu, futsi indzawo yacala kunuka.

Aroni washaya umhlaba ngendvuku yakhe, futsi lutfuli lwagucuka lwaba timbuzulwane. Leti tilwanyana letilumanako. Taba sishayo sesitsatfu eveni laseGibhithe.

Tishayo letalandzela tahlasela emaGibhithe kuphela, atizange tiwahlasele ema-Israyeli. Sishayo sesine kwakusetimphungane letinkhulu letagcwala etindlini temaGibhithe. Sesihlanu sona sahlasela tilwane. Sabulala tinkhomo, timvu kanye netimbuti tebantfu baseGibhithe.

BoMosi na-Aroni batsatsa umlotsa bawuphosa etulu emoyeni. Lomlotsa wabangela kutsi bantfu netilwane babe netilondza letibuhlungu. Lesi kwakusishayo sesitfupha.

Ngemuva kwaloko Mosi welulela sandla sakhe etulu, futsi Jehova watfumela sangcotfo nekudvuma lokukhulu. Leso sangcotfo saba ngulesibi kunato tonkhe letake taba khona eGibhithe.

Sishayo sesiphohlongo kwaba tintsetse letinyenti. Bekucala ngca kutsi kube netintsetse letinyenti kangaka. Tadla konkhe lokungazange koniwe sangcotfo.

Semfica, kwaba bumnyama. Lobumnyama batsatsa emalanga lamatsatfu, kodvwa lapho ema-Israyeli abehlala khona kwakukhanya.

Ekugcineni, Nkulunkulu watjela bantfu bakhe kutsi babhoce ingati yelizinyane lembuti nobe lemvu eminyanga yetindlu tabo. Ingilosi yaNkulunkulu yayihamba hamba eGibhithe. Yayitsi nayibona ingati eminyango, ingababulali bantfu labakuleyondlu. Kodvwa kuto tonkhe tindlu iminyango yato lebeyingakabhocwa ngengati, ingilosi yaNkulunkulu yayibulala onkhe ematubulo ebantfu newetilwane. Lesi kwakusishayo selishumi.

Ngemuva kwalesishayo sekugcina, Faro watjela ema-Israyeli kutsi ahambe. Bonkhe bantfu baNkulunkulu besebavele bakulungele kuhamba, futsi ngalobo busuku bacala luhambo loludze besuka eGibhithe.