Gideyoni Nemadvodza Langu-300

UYABONA kutsi yini leyentekako lana? Lawa ngemadvodza emphi aka-Israyeli. Lalaguce phasi ayanatsa. Sikhulu lesinguGideyoni sime edvute nawo. Sibukele indlela lanatsa ngayo emanti lamadvodza.

Uyayibona yini indlela lanatsa ngayo lamadvodza kutsi ayifani? Lamanye anatsa abuke phasi emantini, kantsi lena lenye yona ikha emanti ngesandla, ngoba ifuna kubona lokwentekako. Loku lokwentekako kwakubalulekile, ngoba Jehova watjela Gideyoni kutsi akhetse kuphela emadvodza lakha emanti ngetandla kuze abone lokwentekako. Onkhe lawa lamanye watsi kumelwe abuyele emakhaya. Ase sibone kutsi kungani.

Ema-Israyeli aphindze angena enkingeni, ngoba enta lokubi emehlweni aJehova. Bantfu bakaMidiyani baba nemandla lamakhulu kunawo, futsi bawaphatsa kabi. Ngako ema-Israyeli akhala kuJehova acela lusito, futsi wakuva kukhala kwawo.

Jehova watjela Gideyoni kutsi ahlanganise imphi, ngako wahlanganisa emadvodza emphi langu-32 000. Kodvwa emaMidiyani wona abenemadvodza langu-135 000 labetawulwa nema-Israyeli. Nobe kunjalo, Jehova watjela Gideyoni watsi: “Lamadvodza lohamba nawo manyenti kakhulu.” Kungani Jehova akhuluma kanjena?

Kungoba ema-Israyeli uma abengancoba lemphi, abeyawutishaya tifuba atsi atisindzise wona. Abengase acabange kutsi awamdzingi Jehova. Ngako Jehova watsi kuGideyoni: ‘Tjela onkhe emadvodza lesabako kutsi abuyele emakhaya.’ Nasekakwentile loko Gideyoni, kwahamba emadvodza langu-22 000 abuyela emakhaya. Wasala nemadvodza langu-10 000 kuphela, labetawulwa nemasotja langu-135 000.

Kodvwa Jehova watsi: ‘Asemanyenti lamadvodza.’ Ngako watjela Gideyoni kutsi ahambe nawo emfuleni ayonatsa emanti, lawo laguca phasi nakanatsa awabuyisele ekhaya. Wamtsembisa watsi: ‘Ngikunika lamadvodza langu-300 lakhe emanti ngetandla nakanatsa kuze abone lokwentekako, kutsi uncobe ngawo.’

Sikhatsi semphi sefika. Gideyoni wahlela lamadvodza langu-300, wawenta aba ngemacembu lamatsatfu. Onkhe lamadvodza wawaniketa emacilongo kanye nemajeke lanemathoshi ekhatsi. Ekhatsi nebusuku atungeleta indzawo lapho emasotja latitsa abehlala khona. Lamabutfo aGideyoni ashaya emacilongo awo kanye kanye, afohlota emajeke awo, futsi amemeta atsi: ‘Inkemba yaJehova naGideyoni!’ Emasotja latitsa awuva lomsindvo, avuka. Amangala ngoba abengati kutsi kwentekani, acala kwesaba. Onkhe abaleka, ema-Israyeli ayincoba lemphi.