Kusukela Enkhosini Yekucala Yaka-Israyeli Kuya Ekutfunjweni EBhabhulona

Sawula waba yinkhosi yekucala yaka-Israyeli. Kodvwa Jehova wamala, futsi wakhetsa Davide kutsi abe yinkhosi esikhundleni sakhe. Sitfola tintfo letinyenti ngaDavide. Asesemusha, walwa nesidlakela lesinguGoliyathi. Ngekuhamba kwesikhatsi wabalekela iNkhosi lenemona lenguSawula. Inkhosikati lenhle ligama layo lokwakungu-Abigayili, yamvimba Davide kutsi angenti intfo lebulima.

Siphindze sifundze lokunyenti ngendvodzana yaDavide lenguSolomoni, leyaba yinkhosi yaka-Israyeli emuva kwakhe. Kulamakhosi ekucala lamatsatfu aka-Israyeli, iyinye yabusa iminyaka lengu-40. Ngemuva kwekufa kwaSolomoni, Israyeli wahlukaniswa waba yimibuso lemibili, lomunye waba ngumbuso wasenyakatfo kantsi lomunye waba ngumbuso waseningizimu.

Kwatsatsa iminyaka lengu-257 ngembi kwekuba umbuso wasenyakatfo wetive letingu-10, ubhujiswe ngema-Asiriya. Umbuso waseningizimu wetive letimbili wona wabhujiswa ngemuva kweminyaka lengu-133. Kungalesi sikhatsi-ke ema-Israyeli latfunjwa ngaso eBhabhulona. Incenye YESINE ihlanganisa iminyaka lengu-510 yemlandvo, lokwatsi emkhatsini wayo kwaba netentakalo letinyenti letijabulisako.