Kuze Uhlale Unemngani, Nawe Kufanele Ube Ngumngani

Bungani busekelwe elutsandvweni. Lutawukhula kakhulu lutsandvo lwakho ngaJehova njengoba ufundza ngaye. Njengoba lutsandvo lwakho ngaNkulunkulu lukhula, nesifiso sakho sekumkhonta naso sitawukhula. Loku kutakwenta ube ngumfundzi waJesu Khristu. (Matewu 28:19) Ngekuba ngulomunye walomndeni lojabulako waboFakazi BaJehova, utawujabulela bungani naNkulunkulu kuze kube phakadze. Yini lokufanele uyente kuze ujabulele konkhe loku?

Kufanele ukhombise lutsandvo lwakho ngaNkulunkulu ngekulalela imitsetfo yakhe. “Ngobe kutsandza Nkulunkulu kugcina imiyalo yakhe. Imiyalo yaNkulunkulu ayimatima kitsi.”—1 Johane 5:3.

Sebentisa loko lokufundzako. Jesu walandzisa indzaba lekhombisa loku. Indvodza lehlakaniphile yakha indlu yayo etikwelidvwala, kodvwa lesilima yakha indlu yayo esihlabatsini. Nakufika imvula lenkhulu, lendlu lebeyakhiwe etikwelidvwala ayizange iwe, kodvwa lena lebeyakhiwe esihlabatsini yawa. Jesu watsi bonkhe labalalela emavi akhe futsi bawente bafana nendvodza lehlakaniphile leyakha indlu yayo etikwelidvwala. Kodvwa labo labeva lamavi akhe futsi bangawenti bafana nendvodza lesilima leyakha indlu yayo esihlabatsini. Nguyiphi indvodza lofuna kufana nayo?—Matewu 7:24-27.

Kutinikela. Loku kusho kutsi uya kuJehova ngemthandazo umtjele kutsi ufuna kwenta intsandvo yakhe kuze kube phakadze. Kwenta intsandvo yaNkulunkulu kukhombisa kutsi ungumfundzi waJesu Khristu sibili.—Matewu 11:29.

Lubhajatiso. “Sukuma ubhajatiswe, utsetselelwe tono takho, ukhuleke egameni lakhe.”—Imisebenti 22:16.

Bani nencenye legcwele ekukhonteni Nkulunkulu. “Konkhe lenikwentako, kwenteni ngenhlitiyo, kube shengatsi nentela iNkhosi, hhayi bantfu.”—Kholose 3:23.