Kubita Kahle Emagama

AKUSIWO onkhe emaKhristu latfole imfundvo lesisekelo. Baphostoli, boPhetro naJohane bebachazwa ngekutsi “abakafundzi lokuyaphi nekutsi babantfukatana nje.” (Imis. 4:13) Nanobe kunjalo, kubalulekile kutsi ulwele kungawabiti kabi emagama ngobe loko kungaphazamisa indlela lowetfula ngayo emaciniso eliBhayibheli.

Lokufanele Ukunake. Tonkhe tilwimi tinemitsetfo yato. Tilwimi letinyenti tibhalwa ngetinhlavu temagama (alphabets). Ngetulu kwetinhlavu temagama tesiLatin, tikhona netinhlavu tesi-Arabhu, siCyrillic, siGriki nesiHebheru. Esikhundleni sekusebentisa tinhlavu temagama, siShayina sibhalwa ngetinhlavu letakhiwe ngetakhi letinyenti. Letinhlavu tivame kumelela ligama lelitsite nome incenye yalo. Nanobe lulwimi lwesiJapane nesiKorea lusebentisa tinhlavu tesiShayina, leto tinhlavu tingase tibitwe ngalenye indlela kuletilwimi futsi tibe nenchazelo leyehlukile.

Etilwimini letisebentisa tinhlavu temagama, kubita kahle emagama kudzinga kutsi ukhiphe umsindvo lofanele weluhlavu ngalunye nome tinhlavu letihlangene. Nangabe tilwimi letinjalo tilandzela umtsetfo longashintji njengobe kunjalo ngesiGriki, Sipanishi nesiZulu, kutawuba melula kubita kahle emagama. Kutsatfwa kwemagama kuletinye tilwimi kungase kubangele kutsi indlela yekubita lawo magama ivete umsuka wawo. Ngaleso sizatfu, tinhlavu letitsite nobe letihlanganisiwe tingabitwa ngetindlela letehlukehlukene nome ngaletinye tikhatsi tingabitwa sanhlobo. Kungase kudzingeke ubambe indlela leyehlukile yekuwabita bese uyisebentisa njalo nawukhuluma. Elulwimini lwesiShayina, kubita kahle emagama kudzinga kutsi ubambe tinhlavu letinyenti ngenhloko. Kuletinye tilwimi inchazelo yeligama iyashintja nangabe ulibita ngalenye indlela. Kungayinaki lemitsetfo yelulwimi kungenta kutsi kwendluliseleke umcondvo longasiwo.

Nangabe emagama elulwimi akhiwa ngemalunga, kubalulekile kutsi ugcizelele emalunga lafanele. Etilwimini letinyenti letisebentisa lendlela yekwakha emagama kusetjentiswa indlela lecishe ifane yekugcizelela nawukhuluma. Nangabe kunalenye indlela yekubita ligama, kungaba neluphawu lolukhombisa kutsi kufanele libitwe njani. Loko kusita kutsi kube melula kubita emagama. Nanobe kunjalo, kuba matima nangabe lendlela ingalandzelwa njalo. Kuhlangabetana nalenkinga ngendlela lephumelelako kudzinga kutsi ubambe tintfo letinyenti ngenhloko.

Kuletinye tilwimi, timphawu letiba ngetulu nobe ngephansi kwemagama kufanele tinakwe kakhulu. Letimphawu tiba kuletinye tinhlavu temagama, njengaleti: è, é, ô, ñ, ō, ŭ, č, ö, ç. Ngaletinye tikhatsi letimphawu utitfola tibhaliwe, nobe kudzingeke kutsi loyo lofundzako atifakele ngekutsi abuke indzaba emagama lasetjentiswe kuyo. Nangabe kudzingeka wente kanjalo, kufanele ulungiselele kahle nangabe wabelwe kufundzela linyenti.

Endzabeni yekubita emagama, kunetintfo lokufanele sitibalekele. Kuwagcamisa kakhulu emagama kungase kuvakale kungasiyo indlela levamile yekukhuluma futsi kukhombise kutsi uyatigabatisa. Loku kungaphindze kubonakale nawubita emagama ngendlela yekukhuluma leseyingaketayeleki. Umphumela waloko kungaba kutsi kunakwe kakhulu loyo lokhulumako. Nanobe kunjalo, kuhle kutsi sikubalekele kunganaki nasikhuluma nobe nasibita emagama. Letinye taletintfo kukhulunywe ngato esihlokweni lesitsi “Emagama Abitwe Ngalokucacile.”

Indlela leyemukelekako yekubita emagama ingehlukahluka kuye ngemave. Ngisho naseveni linye, indlela yekubita emagama endzaweni letsite ingase yehluke endleleni labitwa ngayo kulenye. Umuntfu losuka kulelinye live angase akhulume lulwimi lwaseveni lakulo ngendlela leyehlukile. Tichazamagama tingase tibe neluhla lwetindlela letemukelekako kodvwa letehlukehlukene tekubita ligama. Nangabe umuntfu afundze kancane nome lulwimi lasalukhuluma lungasilo lwakhe, angazuza kakhulu ngekulalelisisa bantfu labalukhuluma kahle lolo lwimi futsi alingise indlela labakhuluma ngayo nakabita emagama. Tsine BoFakazi BaJehova, sifuna kukhuluma ngendlela letawenta umlayeto lesiwushumayelako uhlonipheke futsi bantfu basendzaweni yakitsi bawucondze.

Onkhe malanga nawukhuluma kuncono kakhulu kutsi usebentise emagama lowetayele. Ngalokuvamile, ngeke kube yinkinga kubita emagama nawucoca. Nanobe kunjalo, nawufundza ngalokuvakalako ungase uhlangane nemagama longawasebentisi njalo nawukhuluma. Tinyenti tikhatsi lapho tsine BoFakazi BaJehova sifundza khona ngelivi lelivakalako. Nasifakaza kubantfu, sibafundzela liBhayibheli. Labanye bazalwane bayacelwa kutsi bafundze tigaba eSifundvweni Se-Sicongosekulindza nome eSifundvweni SeliBhayibheli Selibandla. Kubalulekile kutsi sifundze emagama njengobe anjalo futsi singawendluliseli kabi umlayeto ngekuwabita kabi emagama.

Uye ukutfole kumatima yini kubita lamanye emabito laseBhayibhelini? Elulwimini lwesiNgisi kuba neluphawu lwekugcizelela lolulandzela lilunga lokufanele ligcanyiswe. Nangabe lelo lunga ligcina ngankhamisa, loyo nkhamisa uyamdvonsa nawumbita. Nangabe lilunga ligcina ngangwaca, lonkhamisa walelo lunga awumdvonsi. Nangabe kulandzelana nkhamisa a na-i, njengasegameni lelitsi Morʹde·cai nalelitsi Siʹnai, lo-ai uyamdvonsa nawumbita, kube ngu-i kuphela. Ngaphandle kwasegameni lelitsi Rachel, tinhlavu letimbili ch utibita njenga-k, umgcizelele, njengasegameni lelitsi Mel·chizʹe·dek.

Longakwenta Kuze Utfutfuke. Bantfu labanyenti labangawabiti kahle emagama, basuke bangati kutsi banaleyo nkinga. Nangabe umbonisi wesikolwa akutjela tintfo lokufanele utitfutfukise endleleni lobita ngayo emagama, kwemukele loko. Nasewuyati inkinga yakho, ungatfutfuka njani?

Kwekucala, nawunesabelo sekufundzela linyenti, tinikete sikhatsi sekufundza sichazamagama. Buka emagama longawati. Nawungaketayeli kusisebentisa, fundza emakhasi ekucala aso kuze utfole inchazelo yetimphawu letisetjentisiwe, nome ucele lotsite kutsi akuchazele nangabe kunesidzingo. Egameni lelinemalunga lamanyenti, sichazamagama sitakukhombisa kutsi nguliphi lilunga lokufanele uligcamise kakhulu, sitawuphindze sikukhombise kutsi nguyiphi incenye lokufanele ungayigcamisi kakhulu egameni lelidze. Sitakukhombisa indlela yekubita bonkhamisa nabongwaca bemagama. Ngaletinye tikhatsi, ligama lingabitwa ngetindlela letehlukene kuye ngekutsi lisetjentiswe kuphi. Nome nguliphi ligama lolibuka kusichazamagama libite ngelivi lelivakalako tikhatsi letinyenti ngaphambi kwekutsi usivale.

Kwesibili longakwenta kute utfutfukise indlela lobita ngayo emagama, kufundzela umuntfu lowabita kahle emagama futsi umcele akusite nangabe uwabita kabi.

Kwesitsatfu longakwenta kulalelisisa bantfu labawabita kahle emagama. Nangabe i-“New World Translation,” Sicongosekulindza, i-“Phaphama!” nome letinye tincwadzi kutfolakala ngelulwimi lwakho ku-CD nome ku-jw.org, kusebentise. Nawulalele, nakisisa emagama labitwa ngendlela leyehlukile kuleyo bewungawabita ngayo. Wabhale phansi futsi uphrakthize kuwabita. Ngekuhamba kwesikhatsi, ngeke usawabita kabi emagama futsi loko kutayitfutfukisa indlela lokhuluma ngayo.