Kufanele Yini Utigabatise?

KUSHO kutsini kutigabatisa? Uyakwati yini?— Nasi sibonelo: Uke wetama yini kwenta lokutsite lowati kahle kutsi ute likhono lekukwenta? Mhlawumbe wetame kukhahlela ibhola yetinyawo. Nobe wetame kudlala intsambo. Ukhona yini lowake wakuhleka watsi: “Ha-ha-ha-a! Lentfo ngingayenta kancono kunawe”?— Loyo muntfu bekatigabatisa.

Utiva njani nangabe labanye bantfu benta njalo kuwe? Uyakutsandza yini?— Ucabanga kutsi labanye bantfu bativa njani nawutigabatisa?— Kungumusa yini kutsi kulomunye: “Mine ngincono kunawe”?— Jehova uyabatsandza yini bantfu labenta loko?—

Umfundzisi Lomuhle Kakhulu bekabati bantfu lebebacabanga kutsi bancono kunalabanye. Bebatigabatisa nobe batikhukhumeta futsi baphindze babukele phansi labanye bantfu. Ngalelinye lilanga Jesu wacoca indzaba leyabakhombisa kutsi kubi kutigabatisa. Ase sicoce ngayo.

Lendzaba imayelana nemFarisi nemtselisi. Siyati kutsi baFarisi bekubothishela benkholo lebebatiphatsa shengatsi balungile nobe bangcwele kunalabanye bantfu. UmFarisi lokukhulunywa ngaye kulendzaba leyacocwa nguJesu, wenyukela ethempelini laNkulunkulu eJerusalema kuze ayothantaza.

Jesu watsi nalomtselisi naye wenyukela ethempelini kuze ayothantaza. Linyenti lebantfu belingabatsandzi batselisi. Bebacabanga kutsi batselisi bebadla imali. Kuliciniso kutsi linyenti lebatselisi belihle lingetsembeki.

Ethempelini, umFarisi wacala kuthantaza kuNkulunkulu watsi: ‘Awu Nkulunkulu, ngiyabonga kutsi angifanani nalabanye bantfu. Angifanani nalomtselisi lolapha. Ngiyindvodza lelungile. Ngizila kudla kabili ngeliviki lokungenta ngibe nesikhatsi sekucabanga ngawe. Futsi nginikela kwelishumi kwato tonkhe tintfo lengititfolako.’ Uyabona yini kutsi lomFarisi bekatibona ancono kunalabanye?— Futsi watjela Nkulunkulu ngaloko.

Umtselisi yena bekangafanani nalomFarisi. Bekangabuki ngisho nasetulu ngesikhatsi athantaza. Wema khashane inhloko yakhe ibuke phansi. Umtselisi bekatisola kakhulu ngetono takhe, futsi bekabeke sandla sakhe esifubeni. Akazange etame kutjela Nkulunkulu kutsi ulunge kangakanani. Kunaloko wathantaza: ‘Awu Nkulunkulu, ngihawukele mine soni.’

Kulamadvodza lamabili ucabanga kutsi nguyiphi leyajabulisa Nkulunkulu? BekungulomFarisi yini lobekacabanga kutsi ulungile? Nobe ngulomtselisi lobekatisola ngetono takhe?—

Jesu watsi umtselisi nguye lowajabulisa Nkulunkulu. Kungani asho njalo? Jesu wachaza: ‘Ngobe wonkhe umuntfu lotibona ancono kunalabanye utawutfotjiswa, kodvwa loyo lotitfobako utawuphakanyiswa.’​—Lukha 18:9-14.

Ngusiphi sifundvo Jesu labekasifundzisa ngalendzaba?— Bekafundzisa kutsi kubi kucabanga kutsi uncono kunalabanye. Singase singabatjeli labanye kutsi sicabanga kutsi sincono kunabo, kodvwa indlela lesenta ngayo ingakhombisa kutsi sitibona sincono kunalabanye. Uke wakwenta yini loko?— Ase sicoce ngemphostoli Phetro.

Ngesikhatsi Jesu atjela baphostoli bakhe kutsi bebatamshiya ngesikhatsi aboshwa, Phetro watishaya sifuba watsi: “Ngisho nobe bonkhe laba labanye bangakushiya, mine ngeke ngize ngikushiye!” Phetro bekenta liphutsa. Bekatetsemba kakhulu. Wamshiya Jesu. Nanobe kunjalo wabuyela kuye, njengobe sitawufundza eSehlukweni 30 salencwadzi.​—Matewu 26:31-33.

Ase sicoce ngesibonelo salokungenteka esikhatsini salamuhla. Kungenteka kutsi wena kanye nalofundza naye nibutwa leminye imibuto esikolweni. Kutsiwani nangabe wena uyakhona kuniketa imphendvulo ngekushesha kodvwa lona lomunye umfundzi angakhoni? Kuliciniso utojabula nawutati timphendvulo. Ucabanga kutsi kukubonisa umusa yini kuticatsanisa nalomfundzi lowephutako kuphendvula?— Yintfo lenhle yini kutsi utente ngatsi uncono ngekutsi wente lona lomunye ative ngatsi akati lutfo?—

Loku ngiko lokwentiwa ngumFarisi. Watigabatisa ngekutsi atsi uncono kunemtselisi. Umfundzisi Lomuhle Kakhulu watsi umFarisi bekente liphutsa. Kuliciniso kutsi lomunye umuntfu angakhona kwenta kancono letinye tintfo kunalomunye. Kodvwa loko akumenti abe ngumuntfu loncono.

Nangabe kwenteka sati tintfo kwendlula lomunye, sinaso yini sizatfu sekutigabatisa?— Cabanga ngako. Satakhela yini tingcondvo tetfu? Cha, nguNkulunkulu losiphe tingcondvo tetfu. Tintfo letinyenti lesitatiko sitifundza kulabanye bantfu. Mhlawumbe sifundza tintfo encwadzini. Nobe kunalotsite lositjele ngato. Ngisho nobe sititfolele tsine intfo letsite, sikwati njani?— Loko sikwente sisebentisa ingcondvo lesayiphiwa nguNkulunkulu.

Nangabe umuntfu atimisela, intfo lencono longayenta kutsi usho lokutsite lokutamkhutsata. Mtjele kutsi uyakutsandza loko lakwentile. Mhlawumbe ungamsita kutsi atfutfukise. Angeke yini utsandze kutsi labanye bantfu bente njalo kuwe?—

Labanye bantfu banemandla kunalabanye. Kutsiwani nangabe unemandla kwendlula umnakenu nobe dzadze wenu? Loko kufanele kukwente utikhukhumete yini?— Akukafaneli. Kudla lesikudlako ngiko lokusenta sibe nemandla. Nkulunkulu usinika lilanga kanye nemvula nako konkhe lesikudzingako kuze kukhule titjalo letisiniketa kudla, angitsi kunjalo?— Ngaleso sizatfu, nguNkulunkulu lokufanele simbonge nasiba nemandla.​—Imisebenti 14:16, 17.

Kute kitsi lotsandza kuva umuntfu atigabatisa, angitsi kuliciniso?— Asikhumbule emavi aJesu latsi: “Njengobe nifuna bantfu bente kini, yentani kanjalo nani kubo.” Nasenta loko angeke sifanane nemFarisi lowatigabatisa endzabeni leyalandziswa nguMfundzisi Lomuhle Kakhulu.​—Lukha 6:31.

Ngalelinye lilanga lomunye umuntfu watsi Jesu ulungile. Umfundzisi Lomuhle Kakhulu washo yini kutsi: ‘Yebo ngilungile’?— Akashongo njalo. Esikhundleni saloko watsi: “Kute umuntfu lomuhle ngaphandle kwaNkulunkulu.” (Makho 10:18) Nanobe Umfundzisi Lomuhle Kakhulu bekangawenti emaphutsa, akazange atigabatise. Esikhundleni saloko waniketa Babe wakhe Jehova ludvumo.

Ukhona yini lesingatigabatisa ngaye?— Yebo ukhona. Singatigabatisa ngeMdali wetfu Jehova Nkulunkulu. Nasibona kushona kwelilanga lelihle nobe letinye tintfo letinhle endalweni yaNkulunkulu, singatjela lotsite sitsi: ‘Nkulunkulu wetfu lomuhle Jehova nguye lowenta loku.’ Asihlale sikulungele kukhuluma ngetintfo letimangalisako Jehova lasatentile kanye naleto latatenta esikhatsini lesitako.