Kucatulula Kungevani Etindzabeni Tebhizinisi

Njengobe kubhaliwe encwadzini ya-1 Khorinte 6:1-8, umphostoli Pawula wakhuluma ngekumangalelana kwemakholwa. Abeveta kudvumala kwakhe ngenca yekutsi emaKhristu aseKhorinte abekhetsa ‘kumangalelana kubantfu labangakholwa.’ (Vesi 1) Pawula waniketa tizatfu letivakalako tekutsi kungani emaKhristu kwakungakafaneli amangalelane etinkantolo tembuso, kepha alungise kungevani kwawo asebentisa ticondziso letatiniketwe emabandla. Ase sihlole letinye taletizatfu letabangela kutsi leseluleko lesiphefumulelwe sikhishwe, bese sicabangela netimo letingakabalwa kuleseluleko.

Nangabe sinekungevani etindzabeni tebhizinisi nemuntfu lesikholwa naye, kwekucala nje sitawufuna kulungisa letinkinga ngendlela yaJehova hhayi yetfu. (Taga 14:12) Njengobe Jesu abonisa, kuncono kutsi sisheshe sikulungise kungevani kungakakhuli kwate kwaba yindzaba lenkhulu. (Matewu 5:23-26) Lokubuhlungu kutsi lamanye emaKhristu atfukutsela kakhulu, agcine asamangalelene etinkantolo tembuso. Pawula watsi: “Kwakona loko nje kutsi nibe niloku nimangalelana, kukhomba kona kwehluleka.” Kungani? Sizatfu lesiyinhloko kutsi tento letinjalo betitawulimelela kabi ligama lelibandla kanye nelaNkulunkulu. Ngako-ke, senta kahle ngekucabanga ngembuto waPawula lotsi: “Yini kungabi ncono kini kutsi noniwe?”​—Vesi 7.

Pawula waphindze wabonisa kutsi Nkulunkulu unikete libandla emalungiselelo latsite kute likwati kucatulula kungevani lokunyenti. Labadzala bangemadvodza langemaKhristu lentiwe ahlakanipha ngenca yelwati lwemaciniso emiBhalo, futsi Pawula watsi ‘bayakwahlulela . . . bazalwane ngemacala alokuphila kwalamuhla.’ (Emavesi 3-5) Jesu wabonisa kutsi kungevani lokuhlanganisa koniwa lokukhulu, lokunjengekunyundzela kanye nekukhwabanisa, kufanele kulungiswe kusetjentiswa tinyatselo letintsatfu. Kwekucala, kuhamba ulungise inkinga nebantfu labatsintsekile endzabeni. Kwesibili, nangabe sinyatselo sekucala singaphumeleli, tsatsa bofakazi lababili nobe labatsatfu. Kantsi kwesitsatfu, nangabe nalesi sesibili singaphumeleli, tfula indzaba yakho ebandleni njengobe limelelwa ngulabadzala.​—Matewu 18:15-17.

Kuliciniso-ke kutsi labadzala labangemaKhristu abasibo bameli nobe bosomabhizinisi, futsi asikho sidzingo sekutsi banikete teluleko temtsetfo nobe tebhizinisi. Ababeki imibandzela yekucatulula kungevani etindzabeni tebhizinsi lokusemkhatsini webazalwane. Kunaloko, betama ngawo onkhe emandla abo kutsi basite bonkhe labatsintsekako kutsi basebentise imiBhalo, futsi bagcine bafinyelele esivumelwaneni lesinekuthula. Etindzabeni letilukhuni kakhulu, bangase batsintse umbonisi wesifundza nobe batsintse lihhovisi leligatja laboFakazi BaJehova. Kepha-ke kunaletinye timo letingakatsintfwa kuleseluleko saPawula. Ngutiphi letinye taleto timo?

Kuletinye timo, kuya enkantolo kungase kube sinyatselo lesidzingekako kute kulungiswe indzaba ngekuthula nangaphandle kwebugovu. Nasi sibonelo: Kuya enkantolo kungase kudzingeke kute utfole tincwadzi tedivosi, imvume yekunakekela umntfwana, imali yesondlo, sincemphetelo, imvume yekuphuma etincwadzini talabakweletako ngenca yekwehluleka kubhadala, nobe kwehlukaniselwa emafa. Kukhona naletinye timo lapho umzalwane angase abone kudzingeka kutsi ayawumangala enkhantolo kute ativikele emtsetfweni.a

Nangabe kumangalelana lokunjalo kwentiwa ngaphandle kwekulwa, akusephuli seluleko saPawula lesiphefumulelwe.b Ngetulu kwako konkhe, intfo lokufanele ibaluleke kumKhristu, kungcweliswa kwelibito laJehova kanye nekuba nekuthula nebunye ebandleni. Balandzeli baKhristu babonakala kakhulu ngelutsandvo lwabo, futsi “lutsandvo . . . alutifuneli kwalo.”​—1 Khorinte 13:4, 5; Johane 13:34, 35.