Kuhlakanipha KwaNkulunkulu Ngekuphila

INGABE Jehova unguMbusi lohlakaniphile? Lenye yetindlela tekuphendvula lombuto ikucabangela siyalo lasiniketako. Ingabe siyasebenta? Kusisebentisa kuyayenta yini imphilo ibe ncono futsi ibe nenjongo? Inkhosi lehlakaniphile Solomoni yabhala taga letinyenti letitsintsa tonkhe tingoni tekuphila. Ase uhlole nati tibonelo letimbalwa.

Kwetsembela kuNkulunkulu. Kwetsembela kuJehova kubalulekile kute sibe nebuhlobo lobuhle naye. Solomoni wabhala: ‘Tsemba Nkulunkulu ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.’ (Taga 3:5, 6) Kwetsembela kuNkulunkulu ngekufuna sicondziso sakhe nekumlalela kwenta kuphila kube nenjongo. Sento lesinjalo senta kutsi Jehova ajabule, futsi akwati kuncoba ekumangalelweni sitsa saKhe, lesinguSathane.​—Taga 27:11.

Sebentisana nalabanye ngekuhlakanipha. Seluleko saNkulunkulu lesiya emadvodzeni, kubafati, nasebantfwaneni sidzingeka kakhulu lamuhla kunakucala. Nkulunkulu weluleka indvodza lapho atsi: “Jabula ngemfati webusha bakho,” lokusho kutsi kufanele ihlale itsembekile kumfati wayo. (Taga 5:18-20) Kulencwadzi yeTaga, labendzile batfola inchazelo yekutsi ngulonjani umfati lomuhle, nalotsandzekako endvodzeni nakubantfwana bakhe. (Taga, sahluko 31) Bantfwana batjelwa kutsi balalele batali babo. (Taga 6:20) Lencwadzi iphindze ibonise kutsi bungani bubalulekile njengoba kutehlukanisa kwenta umuntfu abe nebugovu. (Taga 18:1) Bangani bangakwenta kutsi wente lokuhle nobe lokubi, ngako-ke kufanele sibakhetse ngekuhlakanipha.​—Taga 13:20; 17:17.

Tinakekele ngekuhlakanipha. Incwadzi yeTaga ineseluleko lesilusito kakhulu ekugwemeni kusebentisa kabi tjwala lokutawusenta sibe nemphilo lenhle, futsi silahle imikhuba leyona imphilo yetfu, bese siba tisebenti letikhutsele. (Taga 6:6; 14:30; 20:1) Icwayisa ngekutsi kwetsembela ekucabangeni kwebantfu lokwehlukile esiyalweni saNkulunkulu, kuholela enhlekeleleni. (Taga 14:12) Isiyala kutsi sivikele tinhlitiyo tetfu emicabangweni lemibi, futsi isikhumbuta kutsi “[enhlitiyweni] kugeleta tiyalu tekuphila.”​—Taga 4:23.

Bantfu labanyenti emhlabeni wonkhe batfole kutsi kuphila ngaleseluleko kuletsa imphilo lencono. Ngenca yaloko, banetizatfu letinyenti tekwemukela Jehova njengeMbusi wabo.

​—Lendzaba itsetfwe encwadzini yeTaga.