Imfihlo Lesijabulela Kuyati

Ukhona yini umuntfu lowake wakutjela imfihlo?—a LiBhayibheli likhuluma ngemfihlo lebalulekile lebitwa ngekutsi ‘yimfihlo lengcwele.’ Ingcwele ngobe ivela kuNkulunkulu. Kutsiwa yimfihlo ngobe bantfu bebangayati. Ngisho netingilosi betifuna kwati lokunyenti mayelana nayo. Wena ungatsandza yini kuyati lemfihlo?—

Kadzeni, Nkulunkulu wadala indvodza nemfati wekucala. Emabito abo bekubo-Adamu na-Eva. Nkulunkulu wabanika likhaya lelihle lebelibitwa ngekutsi yinsimi yase-Edeni. Kube bo-Adamu na-Eva bamlalela Nkulunkulu, bona nebantfwababo bebatawukwenta wonkhe umhlaba ube lipharadisi njengaleyo nsimi. Bebangaphila ePharadisi kute kube phakadze. Kodvwa usakhumbula yini kutsi bo-Adamu na-Eva bentani?—

Bo-Adamu na-Eva abazange bamlalele Nkulunkulu, ngiko nje lamuhla singasahlali epharadisi. Kodvwa Nkulunkulu wetsembisa kwenta wonkhe umhlaba ube muhle, bantfu baphile phakadze kuwo futsi bajabule. Abetawukwenta njani loko? Kwaphela sikhatsi lesidze solo bantfu bangati, ngobe lena bekuyimfihlo.

Ngesikhatsi Jesu eta emhlabeni, wafundzisa bantfu lokunyenti ngalemfihlo. Watsi imayelana neMbuso waNkulunkulu. Jesu watjela bantfu kutsi bathantazele loMbuso kutsi ufike. LoMbuso utawukwenta umhlaba ube lipharadisi lelihle.

Utiva njani ngekwati lemfihlo?— Khumbula kutsi labo labalalela Jehova ngibo kuphela labatawuphila ePharadisi. LiBhayibheli lisitjela tindzaba letinyenti letimayelana nemadvodza nebafati labalalela Jehova. Ungatsandza yini kufundza ngabo?— Asesibone kutsi ngubaphi labanye balamadvodza nebafati nekutsi singafana njani nabo.