Esta Wabasindzisa Bantfu Bakubo

Esta abeyintfombatana lengumJuda lebeyihlala edolobheni lasePheresiya, eSusa. Besekuphele iminyaka leminyenti umndeni wakubo ungahlali eJerusalema. Wakhuliswa nguModekhayi inceku ya-Ahashiveroshi iNkhosi yasePheresiya.

INkhosi Ahashiveroshi beyifuna indlovukazi lensha. Tinceku tayo taletsa emantfombatane lamahle akulendzawo, kuhlanganise na-Esta. Inkhosi yakhetsa Esta kutsi abe yindlovukazi. Modekhayi watjela Esta kutsi angasho kutsi ungumJuda.

Indvodza lokutsiwa nguHamani yabekwa esikhundleni sekuba ngundvunankhulu walamantfombatana. Abefuna bonkhe bantfu bamkhotsamele. Modekhayi wala kumkhotsamela, ngako Hamani wakwata kakhulu futsi wafuna kumbulala. Ngesikhatsi atfola kutsi Modekhayi ungumJuda, wenta lisu lekubulala onkhe emaJuda. Watsi enkhosini: ‘EmaJuda ayingoti; kufanele uwabulale.’ Ahashiveroshi watsi: ‘Yenta nobe yini loyifunako, ngitakunika emandla ekwenta lomtsetfo.’ Hamani wenta umtsetfo wekutsi mhlaka 13 enyangeni ya-Adari kubulawe onkhe emaJuda. Jehova abebona konkhe.

Esta abengati lutfo ngalomtsetfo. Ngako Modekhayi wamtfumelela ikhophi yalomtsetfo, wase utsi kuye: ‘Hamba uyokhuluma nenkhosi.’ Esta watsi: ‘Noma ngubani loya enkhosini ingakambiti utawubulawa. Sekuphela inyanga solo inkhosi ingakangibiti! Kodvwa ngitawuya. Nangabe ingiphakamisela intfonga yayo ngitawuphila. Nayingangiphakamiseli ngitawufa.’

Esta waya esigodlweni senkhosi. Nayimbona inkhosi yamphakamisela intfonga yayo. Wangena Esta futsi inkhosi yambuta yatsi: ‘Ufuna ngikwenteleni Esta?’ Watsi: ‘Ngicela kutsi wena nkhosi naHamani nite edzilini lenginilungiselele lona.’ Nakasedzilini, Esta waphindze wabamema kutsi bete kulelinye lidzili. Nasebakuleli lelinye lidzili inkhosi yaphindze yabuta Esta yatsi: ‘Ufuna ngikwenteleni?’ Esta watsi: ‘Kukhona umuntfu lofuna kubulala mine nebantfu bakitsi. Ngicela usivikele.’ Inkhosi yatsi: ‘Ngubani lofuna kunibulala?’ Watsi: ‘Ngunangu Hamani indvodza lembi.’ Ahashiveroshi wakwata kakhulu waze wafuna kumbulala ngaleso sikhatsi Hamani.

Kodvwa kute umuntfu lobekangawususa lomtsetfo waHamani, ngisho nenkhosi imbala. Ngako inkhosi yabeka Modekhayi kutsi abe ngundvunankhulu futsi yamnika emandla ekubeka umtsetfo lomusha. Modekhayi wabeka umtsetfo lobewutawuvumela emaJuda ativikele nakahlaselwa. Mhlaka 13 enyangeni ya-Adari, emaJuda atincoba titsa tawo. Kusukela ngalelo langa, bekasolo aligubha lelilanga lekuncoba njalo ngemnyaka.