Jesu Uphilisa Bantfu NgeliSabatha

BaFarisi bebangamtsandzi Jesu futsi bebafuna kumbopha. Ngako batsi angabelaphi bantfu ngeliSabatha. Ngalelinye lilanga kuliSabatha, Jesu wabona indvodza lengaboni emehlweni icela esitaladini. Watsi kubafundzi bakhe: ‘Ngicela nibuke kutsi ngitayisita njani lendvodza ngisebentisa emandla aNkulunkulu.’ Watsatsa umhlabatsi wawubhica nematse akhe wase ubhoca loludzaka emehlweni alendvodza. Jesu watsi kuyo: ‘Hamba uyewugeza emehlo akho echibini laseSilowama.’ Ngako yahamba yayowageza, yabuya seyibona.

Bantfu bamangala, batsi: ‘Lena akusiyo yini lendvodza lebeyihlale icela, nobe lena sengulenye lefana nayo?’ Lendvodza yatsi: ‘Mine ngingulendvodza leyatalwa ingaboni.’ Labantfu bayibuta batsi: “Pho emehlo akho avuleke njani?” Yatsi nayibatjela kutsi avuleke njani, bayimikisa kubaFarisi.

Lendvodza yatsi kulabaFarisi: ‘Jesu unindze emehlo ami ngeludzaka, watsi angiyolugeza, ngatsi nangicedza ngase ngiyabona.’ BaFarisi batsi kuyo: ‘Nangabe Jesu elapha ngeliSabatha, kusho kutsi lamandla lawasebentisako akaveli kuNkulunkulu.’ Kodvwa labanye batsi: ‘Kube emandla akhe abengaveli kuNkulunkulu, abengeke akhone kuphilisa bantfu.’

BaFarisi babita batali balendvodza bababuta batsi: ‘Avuleke njani emehlo endvodzana yenu?’ Besaba kubaphendvula ngobe baFarisi bebatsite nome ngubani lonekukholwa kuJesu abetawucoshwa esinagogeni. Ngako batsi: ‘Asati. Butani yena.’ LabaFarisi bachubeka babuta lendvodza imibuto leminyenti yaze yatsi: ‘Senginitjele konkhe lengikwatiko. Nifunelani kutsi ngiphindze nginitjele?’ LabaFarisi bakwata futsi bayicosha esinagogeni.

Jesu wahamba wafuna lendvodza futsi wayibuta watsi: ‘Uyakholwa yini kuMesiya?’ Lendvodza yatsi: ‘Ngubani loMesiya ngitewukholwa kuye?’ Jesu watsi: ‘Ngimi loMesiya.’ Bekuyintfo lenhle yini lena leyentiwa nguJesu? Akazange nje agcine ngekuyiphilisa lendvodza kodvwa wayisita yaba nekukholwa.