Umbuto Lovela Kubafundzi . . .
Umhlaba Utawubhujiswa Nga-2012 Yini?
▪ “Kulelinye lidolobha laseFrance, bayandza bantfu labakholelwa kutsi umhlaba utawubhujiswa . . . Bakholelwa kutsi umhlaba utawubhujiswa mhlaka-21 December 2012, lokusiphetfo seminyaka lengu-5 125 ekhalendeni yasendvulo yemaMaya.”—Tindzaba te-BBC.
Ngisho nangetulu kwaloko lokushiwo bafundisi labatsi umhlaba utawubhujiswa, bantfu labatsi babososayensi, kanye nalabanye bantfu labahlola likusasa labaphila kusukela nga-1999 kuchubeke, umhlaba utawuhlale ukhona phakadze. Umhlaba angeke ubhujiswe nga-2012. Ecinisweni utawuhlale ukhona phakadze.
LiBhayibheli litsi: “Titukulwane tiyefika, titukulwane tiyendlula, kodvwa umhlaba uyakusala unjalo phakadze naphakadze.” (Umshumayeli 1:4) Cabanga nangaloko lokushiwo ngu-Isaya 45:18: “Naku lokushiwo nguSimakadze, . . . lowo lowadala wabumba umhlaba, wawusekela; akazange awudalele kutsi ubete lutfo, kodvwa wawubumbela kutsi uhlale bantfu, utsi: ‘NginguSimakadze, kute lomunye.’”
Babe lonelutsandvo abengasicitsa yini sikhatsi sakhe lesinyenti akhela bantfwana bakhe tintfo tekudlala, bese uyatiphihlita nakasandza kubaniketa tona? Loko bekutawuba kubi kakhulu! Ngendlela lefananako, Nkulunkulu wadala umhlaba kute bantfu bajabule kuwo. Watjela bo-Adamu na-Eva: “Talanani, nandze, nigcwalise umhlaba, niwuncobe.” Ngemuva kwaloko, “Nkulunkulu wakubona konkhe labesakwentile, kutsi kuhle kakhulu.” (Genesisi 1:27, 28, 31) Nkulunkulu akakayikhohlwa injongo yakhe ngemhlaba, futsi angeke avume kutsi umhlaba ubhujiswe. Mayelana nato tonkhe tetsembiso takhe, Jehova watsi: “[Livi lami] lingeke libuye kimi yabayaba, kodvwa liyawukwenta loko lengikuhlosile, liwufeze umgomo walo lengilikhiphele wona.”—Isaya 55:11.
Nanobe kunjalo, injongo yaJehova ikutsi ‘abhubhise babhubhisi bemhlaba.’ (Sembulo 11:18) EVini lakhe, uyetsembisa: “Bantfu labacotfo labatawukwakha kulelive; ngulabetsembekile bodvwa labayawuhlala kulo. Kodvwa lababi bayawususwa eveni, nalabanemacebo bayawusishulwa kulo.”—Taga 2:21, 22.
Loko kutawukwenteka nini? Kute umuntfu lowatiko. Jesu watsi: “Kute lowatiko kutsi lelo langa nalelo awa kuyawufika nini. Netingelosi tasezulwini atati, neNdvodzana ayati; nguYise kuphela lokwatiko loko.” (Makho 13:32) BoFakazi BaJehova abetami kuhlola kutsi Nkulunkulu utawubabhubhisa nini bantfu lababi. Nanobe basicaphela “sibonakaliso” sekufika kwekuphela futsi bakholelwa kutsi siphila “emalangeni ekugcina,” angeke bati kutsi ‘kuphela’ kutawufika nini. (Makho 13:4-8, 33; 2 Thimothi 3:1) Loko bakushiyela kuJehova kanye naseNdvodzaneni yakhe.
Kwanyalo, boFakazi BaJehova bamatasatasa ekushumayeleni tindzaba letinhle teMbuso waNkulunkulu, lokunguhulumende wasezulwini lotawubusa futsi ugucule umhlaba ube lipharadisi leligcwele kuthula, lapho kuyawuphila khona ‘labalungile, bahlale kuwo kuze kube phakadze.’—Tihlabelelo 37:29.
[Emavi laveta Umtfombo wesitfombe ekhasini 12]
Image Science and Analysis Laboratory, NASA-Johnson Space Center