Umbuto Lovela Kubafundzi . . .

Yini Leyabangela Nkulunkulu Watsi Ku-Abrahama Akanikele Ngendvodzana Yakhe?

▪ Njengobe kulandziswa eBhayibhelini kuGenesisi, Jehova watsi ku-Abrahama akanikele ngendvodzana yakhe. (Genesisi 22:2) Labanye bantfu labafundza liBhayibheli abayivisisi kahle lendzaba. Carol longuphrofesa utsi: “Ngalesikhatsi ngicala kuva ngalendzaba ngisesengumntfwana, ngatfukutsela kakhulu. Ngatibuta kutsi nguNkulunkulu lonjani lona longacela umuntfu kutsi ente intfo lebuhlungu kangaka?” Nasingayicondzi kahle lendzaba, kungasisita kukhumbula naku lokulandzelako.

Kwekucala, cabanga ngaloko Jehova langazange akwente. Akazange amvumele Abrahama kutsi anikele ngendvodzana yakhe naloku Abrahama abesakulungele kunikela ngayo futsi Nkulunkulu akazange aphindze acele lomunye umuntfu kutsi anikele ngendvodzana yakhe. Jehova ufuna kutsi bonkhe bantfu labamkhontako lokufaka ekhatsi bantfwana, bachubeke baphila kuze bajabulele imphilo lendze naleyenetisako.

Kwesibili, liBhayibheli litsi Jehova bekanesizatfu lesikhetsekile sekutjela Abrahama kutsi anikele nga-Isaka. Nkulunkulu bekati kutsi eminyakeni leminyenti letawulandzela, bekatawuvumela iNdvodzanaa yakhe Jesu, kutsi isifele. (Matewu 20:28) Jehova bekafuna sicondze kutsi lomnikelo wendvodzana bewutawubita kangakanani. Wasibekisela ngentfo lesitayibona ngaloko labetakwenta esikhatsini lesitako ngekutjela Abrahama kutsi anikele ngendvodzana yakhe. Wakwenta njani loko?

Cabanga ngalokwashiwo nguJehova ku-Abrahama, watsi:“Tsatsa Isaka, indvodzana yakho, leyodvwana naloyitsandzako . . . wente umhlatjelo ngayo.” (Genesisi 22:2) Naka kutsi Jehova watsi Isaka yindvodzana Abrahama ‘layitsandzako.’ Jehova bekati kutsi Isaka abeligugu kangakanani ku-Abrahama. Nkulunkulu bekati kutsi Yena utiva njani ngendvodzana yakhe lenguJesu. Jehova abemtsandza kakhulu Jesu kangangekutsi waze washo kabili kuye asezulwini watsi: ‘uyiNdvodzana yami letsandzekako.’—Makho 1:11; 9:7.

Naka nekutsi Jehova wamcela ngemusa Abrahama. Lesinye sati seliBhayibheli sitsi: “INKHOSI beyicondza kutsi bekudule kangakanani loko lebeyikucela” ngekutsi imcele ngemusa Abrahama. Njengobe singase sicabange kutsi lesicelo samvisa buhlungu kakhulu Abrahama, ngendlela lefananako asibati buhlungu lobukhulu Jehova labuva nakabona indvodzana yakhe letsandzekako ihlupheka futsi ifa. Asingabati kutsi Jehova weva buhlungu lobukhulu langazange sabuve futsi kute lobufanana nabo layophindze abuve.

Kona kuliciniso kutsi kungasimangalisa kucabanga ngaloko Jehova lacela Abrahama kutsi akwente kodvwa sitawube senta kahle kukhumbula emaciniso latsi Jehova akazange amvumele Abrahama lowetsembekile kutsi anikele ngendvodzana yakhe. Wavikela Abrahama ebuhlungwini lobukhulu bekufelwa lobungeviwa ngumtali futsi wavikela Isaka kutsi angafi. Jehova akazange ayivikele “iNdvodzana yakhe, kodvwa wayinikela ngenca yetfu sonkhe.” (Roma 8:32) Kungani Jehova akuvumela kutsi kwenteke intfo letamvisa buhlungu kangaka? Wakwenta loko “khona sitewuphila.” (1 Johane 4:9) Lesento sakhe sisikhumbuta indlela Nkulunkulu lasitsandza ngayo. Loku akusenti yini kutsi natsi sifune kumkhombisa kutsi siyamtsandza?b

[Imibhalo lengentansi]