“Sicela Usitsatse Sitfombe”
Ngemuva kwelilanga lesibili lemhlangano wesigodzi, Josué lolilunga lemndeni waseBethel eMexico, abe hambahamba edolobheni laseQuerétaro. Tivakashi letibuya eColombia boJavier naMaru labashadene, bacela Josué kutsi abatsatse sitfombe. Lokwabenta bamcela kutsi yena nebangani bakhe lababoFakazi bebembetse kahle futsi bafake nemabheji emhlangano. Javier naMaru bababuta kutsi babuya emcimbini wekwetfweswa ticu yini nobe kulomunye umcimbi lokhetsekile. Josué wabachazela kutsi babuya emhlanganweni waboFakazi BaJehova, wase uyabamema kutsi bete batewulalela luhlelo lwangeLisontfo.
Javier naMaru babona shengatsi batawuhlazeka nabaya emhlanganweni ngobe bebete timphahla letifanelekako. Nobe kunjalo, Josué wabatjela libito lakhe wabanika nenombolo yelucingo yasehhovisini leligatja labekakulo.
Ngemuva kwetinyanga letine, Josué wamangala nakashayelwa lucingo nguJavier. Javier nemkakhe baya kulomhlangano futsi nyalo bese bafuna kuvakashelwa boFakazi BaJehova eMexico City lapho bese batfutsele khona. Ngekushesha kwacaliswa nabo sifundvo seliBhayibheli, futsi bacala kuba khona emihlanganweni. Ngemuva kwetinyanga letilishumi, baba bamemeteli. Nanobe kwadzingeka kutsi batfutsele eToronto, eCanada, bachubeka batfutfuka ebuhlotjeni babo naJehova badzimate babhajatiswa.
Ngemuva kwesikhatsi, Josué watfola incwadzi levela kuJavier lapho abechaza khona kutsi yini leyambangela wemukela liciniso. Yayitsi: “Singakayi kulomhlangano, mine nemkami sasikhuluma ngekutsi yini lesingayenta kute sitfole sicondziso saNkulunkulu. Nasinibona nembetse kahle sacabanga kutsi kungenteka nibuya emhlanganweni lokhetsekile. Emhlanganweni, sajatjuliswa yindlela labasemukela ngayo, basikhombisa nendzawo yekuhlala, basisita nasendleleni yekuvula liBhayibheli siphindze sihambisane naloyo lolifundzako. Saphindze sajatjuliswa nayindlela labebatiphetse ngayo labo labebakulomhlangano. Bebete ngisho nalencane inkinga ngendlela lebesembetse ngayo.”
Emavi eNkhosi lehlakaniphile Solomoni, abonakala aliciniso kuJosué. Solomoni wabhala: “Ekuseni hlanyela inhlanyelo yakho, ungayekeli kusebenta lize liyewushona, ngobe awuyati lenguyona itawuphumelela, kutsi ngulena yini nome nguleyo, nome totimbili tiyawuphumelela kahle ngalokufananako.” (Shu. 11:6) Ungayihlanyela yini imbewu ngekubamba ematfuba kute utjele labanye ngemhlangano lotako nobe ngenkhulumo yelinyenti? Jehova angase akusebentise kute usite labo labalambele futsi bomele sicondziso sakhe, njengobe bebanjalo boJavier naMaru.—Isa. 55:1.
[Sitfombe ekhasini 32]
Kusuka ngesencele kuya ngesekudla: Alejandro Voeguelin, Maru Pineda, Alejandro Pineda, Javier Pineda, kanye naJosué Ramírez basegatjeni laseMexico