Fundza EVini LaNkulunkulu
Kungani EmaKhristu Abhajatiswa?
Lesihloko simayelana nemibuto lokungenteka kutsi uke watibuta yona futsi sikhombisa lapho ungatitfola timphendvulo eBhayibhelini lakho. BoFakazi BaJehova bangakujabulela kucoca nawe ngaletimphendvulo.
1. Lusho Kutsini Lubhabhatiso lwemaKhristu?
Lubhabhatiso lusicelo sekuba nebuhlobo lobuhle naNkulunkulu. Ngaleso sizatfu umKhristu kufanele abhajatiswe nasekakhule ngalokwenele asakwati kufundza ngaNkulunkulu bese ubangumfundzi waJesu, hhayi nakaseluswane. (Imisebenti 8:12; 1 Phetro 3:21) Siba bafundzi baJesu nangabe sifundza futsi senta loko lasitjela kutsi sikwente.—Fundza Matewu 28:19, 20.
Ngetikhatsi tebaphostoli baJesu, bantfu labanyenti basitsatsa ngekushesha sinyatselo sekufundza ngaNkulunkulu nangaJesu. Sibonelo saloko kutsi ngalesikhatsi lenye indvodza iva kutsi kufa kwaJesu kusivulele indlela leholela ekusindzisweni, yaba ngumfundzi ngekushesha. Lamuhla, bantfu labanyenti labanetinhlitiyo leticotfo bakhetse kuba balandzeli baJesu.—Fundza Imisebenti 8:26-31, 35-38.
2. Kungani Jesu abhajatiswa?
Jesu bekaneminyaka lengu-30 budzala ngesikhatsi Johane uMbhabhatisi ambhabhatisa eMfuleni iJordane. Kubhajatiswa kwaJesu bekumelela sincumo sakhe sekwenta intsandvo yaNkulunkulu. (Hebheru 10:7) Loko bekutawufaka ekhatsi kunikela ngekuphila kwakhe kube ngumhlatjelo wetono tebantfu. Ngisho nangembikwekusuka ezulwini ete emhlabeni, Jesu abevele amtsandza Babe wakhe Jehova futsi amhlonipha.—Fundza Makho 1:9-11; Johane 8:29; 17:5.
3. Kungani umKhristu kufanele abhajatiswe?
Simo setfu asifanani nesaJesu. Tsine sitalwa sitoni. Nobe kunjalo, kufa kwaJesu kusenta kutsi sibe nebuhlobo lobuhle naNkulunkulu. (Roma 5:10, 12; 12:1, 2) Yintfo lengenteka kutsi sibe baNkulunkulu, futsi sibe ngemalunga emndeni wakhe. (2 Khorinte 6:18) Singakhona njani kuba ngemalunga emndeni waNkulunkulu? Ngasese, umuntfu uyathandaza anikele kuphila kwakho kuJehova ametsembise kwenta intsandvo yakhe imphilo yakho yonkhe. Ngemuva kwekutinikela kuJehova, ukukhombisa labanye loko ngekutsi ubhajatiswe.—Fundza Matewu 16:24; 1 Phetro 4:2.
4. Ungatilungiselela njani kubhajatiswa?
BoFakazi BaJehova batadisha liBhayibheli nawo wonkhe umuntfu lofuna kusondzela kuNkulunkulu. Kutadisha liBhayibheli nekuya emihlanganweni yebuKhristu kutawukhulisa lutsandvo lonalo ngaNkulunkulu kuphindze kucinise nekukholwa kwakho. Kutakusita nekutsi ube nesimo sengcondvo lesihle kanye nemikhuba lemihle. Kuba nelutsandvo, kukholwa kanye nebuntfu lobujabulisa Nkulunkulu, kukwenta kutsi uphile ngekuvumelana nesifungo sakho sekukhonta Nkulunkulu phakadze.—Fundza Johane 17:3; Hebheru 10:24, 25.
Kute utfole kwatiswa lokubanti, fundza sehluko 18 salencwadzi, Lifundzisani Mbambambamba LiBhayibheli?, leshicilelwe boFakazi BaJehova.