Bewati Yini Ngaloku?
Siyini ‘lesihlalo sekwehlulela’ umphostoli Pawula layiswa kuso?
▪ Kulandzisa lokusencwadzini yeMisebenti 18:12, 13 kuveta kutsi emaJuda aseKhorinte amangelela Pawula ngekutsi abeshumayela ngendlela lephambene nemtsetfo futsi amyisa ‘esihlalweni sekwehlulela,’ nobe i-beʹma (ligama lesiGriki lelisho “siteji”). IKhorinte yasendvulo beyinesiteji lesiphakeme, lebesisedvutane nemakethe, lokungenteka kutsi beyiseceleni kwesinagoge. Lesiteji lesiphakeme besenta kube melula kutsi bantfu labanyenti beve nakukhulunywa nabo. Besakhiwe ngemabuli lenembala loluhlata nalomhlophe futsi sinemihlobiso. Lesiteji besinemakamelo lamabili ekulindza, ekhatsi kwawo kunemabhentji emabuli lamabili nema-tiles lamibalabala phansi.
Kungenteka kutsi lesiteji bekungulesihlalo sekwehlulela lapho umphostoli Pawula abeme khona embikwembusi longumRoma Galiyo, wase-Akhaya. Kulendzawo, emajaji abevamise kuhlala phansi alalele emacala bese atjela sicumbi sebantfu sigwebo sawo.
Emadolobheni emaGriki, bekwetayelekile kutsi bantfu bahlangane embikwale beʹma, bakhulume tindzaba temabhizinisi lasemtsetfweni. Nayilandzisa ngekutekwa kwelicala laJesu, imibhalo yesiGriki, Matewu 27:19 naJohane 19:13 itsi Phontiyuse Philatu wakhuluma nebantfu akule-beʹma yakhe.—Imisebenti 12:21.
Kungani lamanye emaJuda akhubeka ngendlela Jesu lafa ngayo?
▪ Mayelana nemaKhristu ekucala, umphostoli Pawula watsi: “Kodvwa tsine sishumayela Khristu abetselwe. . . , losikhubekiso kumaJuda nebulima kubetive.” (1 Khorinte 1:23) Kungani lendlela Jesu lafa ngayo beyingabangela labanye kutsi bakhubeke?
Mayelana nendlela Jesu lafa ngayo kanye nemasiko ebantfu labebahlala emaveni akaJuda ngesikhatsi saJesu, umhlatiyi weliBhayibheli Ben Witherington III utsi indlela Jesu lafa ngayo “beyilihlazo kakhulu kulawo mave. Beyingatsatfwa njengendlela lehloniphekile yekufela kukholwa.” Witherington uchubeka atsi: “Bantfu bakulawo mave bebakholelwa kutsi indlela lofa ngayo iveta kutsi ungumuntfu lonjani. Ngaleso sizatfu, Jesu abetsatfwa njengemuntfu loluhlupho, umuntfu lovukela umbuso nalofanelwe kujeziswa njengesigcili lesivukelako.” Njengobe sesitfole umlandvo ngelisiko lalawomave, kubonakala kungesilo liciniso kutsi emaKhristu akucala ayicamba indzaba yekufa kwaJesu nekuvuka kwakhe.