“Liphupho Lami Lifezekile”
Eminyakeni lengu-15 leyendlulile, Emilia abelihlahlandlela lelivamile. Nobe kunjalo, kwadzingeka kutsi awuyekele lomsebenti wakhe wesikhatsi sonkhe. Kuleminyaka, bekahle akhumbula leso sikhatsi lesijabulisako ekuphileni kwakhe futsi abefuna kwengeta sikhatsi lasicitsa ashumayela.
Nobe kunjalo,umsebenti wakhe wekutiphilisa bewutsatsa sikhatsi sakhe lesinyenti futsi loko bekumenta angajabuli. Ngalelinye lilanga wakhonona akanye nalasebenta nabo watsi: “Ngifisa shengatsi ngingasebenta ema-awa lambalwa.” Umphatsi wakhe weva ngalendzaba futsi wambita kute abute kutsi iliciniso yini. Emilia wavuma kutsi iliciniso. Nobe kunjalo, bekutawudzingeka imvume yemcondzisi wenkapane kulendzaba, ngobe lenkapane beyinemtsetfo lofuna tisebenti tayo titinikele ngalokuphelele kuyo. Lodzadze watilungiselela kuba nemhlangano nalomcondzisi futsi wathantazela kuthula nesibindzi.
Njengobe uchubeka lomhlangano, Emilia wacela kutsi ancishiselwe ema-awa lawasebentako futsi loko wakwenta ngekuhlakaniphia nangesibindzi. Wachaza kutsi bekasebentisa sikhatsi sakhe sekuphumula kute asite labanye, watsi: “Ngingulomunye waboFakazi BaJehova futsi ngisita bantfu bati ngaNkulunkulu. Kulamalanga, indlela bantfu labanyenti labatiphatsa ngayo yimbi. Badzinga timiso leticacile, ngako-ke kuhlakanipha lengibakhombisa kona lokuseBhayibhelini kuyabasita. Angifuni kutsi tintfo lengitenta ngemuva kwemsebenti tehlise lizinga lemsebenti wami lapha, kodvwa bengingatsandza kuba nesikhatsi lesengetiwe kute ngisite bantfu. Kungako ngidzinga kutsi ema-awa lengiwasebentako ancishiswe.”
Lomcondzisi wamlalelisisa wase utsi naye uke wakucabanga kwenta imisebenti yekusita labanye bantfu. Wase utsi: “Ngaletizatfu losewutichazile, ngicabanga kutsi kufanele ngisivume lesicelo sakho. Kodvwa uyacaphela yini kutsi utawuncipha umholo wakho?” Emilia watsi abekwati loko futsi abekulungele kwenta kuphila kwakhe kube melula. Wachubeka watsi: “Umgomo lobaluleke kakhulu kimi kwenta intfo letawubasita kakhulu labanye.” Naku lomcondzisi lakutjela Emilia: “Ngiyabatsandza bantfu labasebentisa sikhatsi sabo ngekutitsandzela kute basite labanye.”
Kute lesinye sisebenti kuleyo nkapane lesake saphatfwa kahle njengalodzadze. Emilia nyalo uvumelekile kusebenta emalanga lamane kuphela ngeliviki. Lokwammangalisa kakhulu kutsi wachubeka ahola imali labekayihola ekucaleni. Utsi: “Liphupho lami lifezekile, sengingaba lihlahlandlela lelivamile futsi!”
Uke wakucabanga yini kuhlela timo takho kute ucale kuba lihlahlandlela nobe uphindze ube ngilo?
[Emavi lacashuniwe lasekhasini 32]
Umcondzisi wamtjela kutsi: “Ngiyabatsandza bantfu labasebentisa sikhatsi sabo ngekutitsandzela kute basite labanye”