Kulabafundza Lomagazini

Lomagazini lowufundzako wacala kushicilelwa nga-July 1879. Kusukela ngalowomnyaka, tikhatsi betisolo tishintja nalomagazini bewusolo ushintjashintja. (Buka titfombe letilangenhla.) Kusukela kulomagazini, utawubona kutsi kunetingucuko endleleni Sicongosekulindza lesesihlelwe ngayo. Ngutiphi letingucuko?

Emaveni lamanyenti, linyenti lebantfu litfola kwatiswa lokwehlukahlukene ku-Internet futsi litiva likhululekile kuyisebentisa. Ngekuchafata kanye nje batfola kwatiswa lokutfolaka kuyo kuphela ngendlela lemelula. Linyenti letincwadzi, bomagazini nemaphephandzaba ungakhona kukufundza ku-Internet.

Ngenca yekutsi bantfu labanyenti bayatsandza kungena kuyo, sisandza kuyihlela kabusha i-Web site yetfu letsi www.jw.org, sayenta yakhanga nakakhulu futsi kumelula kuyisebentisa. Labangena kuyo bangakhona kutifundzela tincwadzi letitfolakala ngetilwimi letingetulu kwaletingu-430. Nome kunjalo, kusukela kulenyanga bantfu labangena kule-Web site bangakhona kufundza tihloko letitsite lebetiba khona njalo kubomagazini betfu labashicilelwako kodvwa nyalo letihloko setitawutfolakala ku-www.jw.org.a

Njengobe tihloko letinyenti setitawutfolakala ku-www.jw.org kuphela, kusukela kulenyanga Sicongosekulindza lesisiniketa bantfu sesincishisiwe saba ngemakhasi langu-16 kusuka kulangu-32. Njengobe sikhuluma, Sicongosekulindza sihunyushelwa etilimini letingu-204. Njengobe sesincishisiwe, sekutawuba melula kusihumushela etilimini letinyenti.

Siyetsemba kutsi lolushintjo lutasisita sifinyelele bantfu labanyenti ngemlayeto losindzisa kuphila lovela eBhayibhelini. Sitimisele kuchubeka siniketa bantfu kwatiswa lokukukhanya futsi lokukhangako sisebentisa bomagazini labashicilelwe nalabaku-Internet kuze kusitakale bantfu labanyenti labalihloniphako liBhayibheli labafuna kwati lelikufundzisako.

Bashicileli