IMIBUTO YELIBHAYIBHELI IYAPHENDVULWA
Yini leyenta kungabi nekuthula emhlabeni?
Hulumende longenta bantfu bashintje tinhlitiyo tabo nguye lotawuletsa kuthula emhlabeni
LiBhayibheli libeka tizatfu letimbili letiyinhloko. Kwekucala, ngisho nome bantfu sebafeze tintfo letinhle kangakanani, abazange badalwe banelikhono lekucondzisa tinyatselo tabo. Kwesibili, emacebo ebantfu ehlulekile ngobe “umhlaba wonkhe ungephansi kwemandla aLomubi,” longuSathane Develi. Ngako, imetamo yebantfu yehlulekile kwenta umhlaba ube nekuthula.—Fundza Jeremiya 10:23; 1 Johane 5:19.
Tifiso tebantfu tebugovu nato tente umhlaba wangakhoni kuba nekuthula. Hulumende longenta kube nekuthula emhlabeni wonkhe ngulongafundzisa bantfu kutsandza kwenta lokulungile nekukhatsalelana.—Fundza Isaya 32:17; 48:18, 22.
Ngubani lotawuletsa kuthula emhlabeni?
Nkulunkulu Somandla wetsembise kubeka hulumende munye kutsi abuse etikwabo bonkhe bantfu. Lohulumende utawungena esikhundleni sabohulumende bemhlaba. (Danyela 2:44) Jesu, iNdvodzana yaNkulunkulu utawubusa abe Sikhulu Sekuthula. Utawususa bubi emhlabeni wonkhe futsi afundzise bantfu indlela yekwenta kuthula.—Fundza Isaya 9:6, 7; 11:4, 9.
Kwanyalo, ngekucondzisa kwaJesu, tigidzi tebantfu emhlabeni wonkhe tisebentisa liVi laNkulunkulu liBhayibheli kute tifundzise bantfu indlela yekuba nekuthula nalabanye. Madvutane nje, kutawuba khona kuthula emhlabeni wonkhe.—Fundza Isaya 2:3, 4; 54:13.