‘Ugcwalisa Tinhlitiyo Tetfu’

Vele Jehova uyasikhatsalela yini, nome akanendzaba netinkinga letisikhungetse lapha emhlabeni? Idvudvuta kakhulu imphendvulo yalombuto letfolakala eBhayibhelini. Nkulunkulu uyasikhatsalela, futsi ufuna sikujabulele kuphila. Malanga onkhe, uvumela bantfu—ngisho nalabo labanganandzaba naloko labentele kona—kutsi bazuze etintfweni takhe letinhle. Nakisisa emavi emphostoli Pawula.—Fundza Imisebenti 14:16, 17.

Akhuluma nebantfu basedolobheni lase-Listra labebangamkhonti Nkulunkulu, Pawula watsi: “Ngesikhatsi lesendlulile [Nkulunkulu] watiyekela tonkhe tive tatihambela ngetindlela tato. Kodvwa akayekelanga kutifakazela ngekwenta imisebenti lemihle: Unehlisela imvula nekudla ngesikhatsi lesifanele; uninika kudla agcwalise tinhlitiyo tenu ngenjabulo.” Abesho kutsini lamavi aPawula kulabantfu labebamlalele?

Kwakungadzingeki kutsi labantfu base-Listra babuke khashane kuze babone buciniso balamavi aPawula. Bebatayelene kakhulu nekulima futsi bahlala endzaweni levundzile nalegeleta emanti. Njengoba Pawula abakhumbuta, bekunguNkulunkulu lobekanguMtfombo walemvula kanye naletitselo. Ngaleso sizatfu, njalo nabavuna inala futsi bajabulela kudla lokumnandzi, bebazuza ebuhleni baNkulunkulu.

Lamavi lakhulunywa nguPawula kulabantfu base-Listra, asifundzisa tifundvo letimcoka ngaNkulunkulu Jehova.

Jehova usiniketa inkhululeko yekutikhetsela. Naka kutsi Jehova wavumela tonkhe tive letingasiwo emaJuda kutsi “titihambele ngetindlela tato.” Sikhombo sebahumushi beliBhayibheli sitsi lamavi angasho “kwenta ngendlela labatsandza ngayo” nome “kwenta loko bona labacabanga kutsi kukahle.” Jehova akaphoceleli muntfu kutsi amkhonte. Usinikete inkhululeko yekutikhetsela—lilungelo lekutincumela kutsi sitawuphila njani.—Dutheronomi 30:19.

Jehova ufuna kutsi simati. Pawula wachaza watsi, Jehova “akayekelanga kutifakazela.” Lesikhombo lokuke kwakhulunywa ngaso sitsi lomusho ungahunyushwa ngekutsi “ubakhombise ngalokucacile bantfu kutsi uluhlobo luni lwaNkulunkulu.” Indalo yaNkulunkulu ibufakazela ngalokucacile bunguye bakhe lobufihlekile, lokufaka ekhatsi kulunga kwakhe, emandla, kanye nelutsandvo. (Roma 1:20) Kunyenti Jehova lakwembulile mayelana naye eBhayibhelini. (2 Thimothi 3:16, 17) Akusicaceli yini kutsi ufuna simati?

Jehova ufuna sijabule. Pawula watsi: “Uninika kudla agcwalise tinhlitiyo tenu ngenjabulo.” Ngisho nesoni lesingavumi nekutsi Jehova ukhona singase sidle ngekutsandza kwaso futsi sijabulele imphilo ngelizinga lelitsite. Nanome kunjalo, Jehova ufuna sibe nenjabulo lenguyonayona nalehlala njalo. Loku kungenteka kuphela nangabe sifundza liciniso ngaye futsi silisebentise ekuphileni kwetfu.—Tihlabelelo 144:15; Matewu 5:3.

Malanga onkhe, sonkhe siyazuza ebuhleni baJehova. Kungaba njani ufundze kabanti ngekutsi ungakubonisa njani kubonga kuNkulunkulu loninika “kudla agcwalise tinhlitiyo tenu ngenjabulo”?