SIHLOKO LESINGUMGOGODLA: KUNGANI KUNEKUHLUPHEKA LOKUNGAKA? KUTAWUPHELA NINI?
Kufa Kwebantfu Labanyenti Labete Licala!
Noelle abengumntfwana lonebungani futsi atsandza kudvweba. Ngalenye intsambama kungusehlobo, abehamba ngemuva kwendlu yakubo wase uyagileka wawela echibini lakubo lekubhukusha. Wamita sekusele nje emaviki lamabili kutsi ahlanganise iminyaka lemine.
BoCharlotte, Daniel, Olivia, naJosephine . . . ngemabito alabanye bantfwana kulabangu-20 labaneminyaka lesitfupha nobe lesikhombisa budzala, labebasemkhatsini webantfu labangu-26 labadutjulwa esikolweni lesiseConnecticut, U.S.A., ngaDecember 14, 2012. Enkonzweni yekukhumbula kufa kwabo, Mengameli Obama washo emabito alabantfwana wase utsi etilalelini lebetilila: “Letintfo letibuhlungu kufanele tiphele.”
Bano loneminyaka lengu-18 budzala wesuka e-Iraq nga-1996 watfutsela eNorway nemndeni wakubo. Bangani bakhe bebambita ngekutsi ngu-Sun Rays nabamdlalisa. Lokubuhlungu kutsi nga-July 22, 2011, waba semkhatsini webantfu labangu-77 lababulawa ngumuntfu labelwela tingucuko kutepolitiki, lowatishaya sifuba watsi: “Ngiva buhlungu . . . kutsi ngehlulekile kubulala bantfu labanyenti kunalaba.”
Tindzaba letibuhlungu letifanana naleti tibikwa emhlabeni wonkhe. Cabanga ngelusizi nangebuhlungu lobubangelwa tingoti, bugebengu, timphi, buphekula, tinhlekelele temvelo kanye naletinye tintfo letibuhlungu. Bantfu labanyenti labete licala bayafa futsi kunekuhlupheka lokukhulu lokwenteka ngaphandle kwesizatfu.
Labanye basola Nkulunkulu ngobe batsi uMdali wetfu akanendzaba nebantfu. Labanye baphetsa ngekutsi Nkulunkulu uyakubona kuhlupheka kwetfu, kodvwa ukhetsa kungangeneli. Kantsi labanye batsi tintfo letibuhlungu letifanana naleti tincunywe kusengaphambili. Minyenti kakhulu imibono lekhona ngalendzaba. Singatitfolaphi timphendvulo lesingatetsemba futsi letenetisako? Etihlokweni letilandzelako, sitawuhlola liVi laNkulunkulu liBhayibheli, kute sitfole kutsi yini lebangela kuhlupheka nekutsi kutawucedvwa njani.