Yini Leyenta Kubutwe Lombuto?

“Awumdzingi yini Nkulunkulu? Tigidzi tebantfu tisho njalo.” Nguloko lebekubhalwe ebhodini lekukhangisa lebelibhadalelwe licembu lebantfu labangakholelwa kuNkulunkulu. Kuyacaca kutsi banemuva wekutsi abamdzingi Nkulunkulu.

Ngakulokunye, bantfu labanyenti labatsi bayakholelwa kuNkulunkulu benta tincumo kube shengatsi akekho. Salvatore Fisichella, umbhishobhi lomkhulu wemaKatolika washo naku lokulandzelako ngemalunga elisontfo lakhe: “Indlela lesiphila ngayo ayikhombisi kutsi singemaKhristu, kangangekutsi bantfu nabasibuka ngeke basho kutsi singemakholwa.”

Labanye bamatasatasa kakhulu kangangekutsi bete sikhatsi sekucabanga ngaNkulunkulu. Batsi Nkulunkulu ukhashane futsi ngeke akhone kuba lusito ekuphileni kwabo. Bantfu labanjalo bachumana naNkulunkulu kuphela nangabe banetinkinga nobe badzinga lokutsite kuye—lokufana nekutsi Nkulunkulu bamtsatsa njengesisebenti labasibita kuphela nabahluphekile.

Labanye bantfu babona shengatsi timfundziso tenkholo atizuzisi kangako nome bayehluleka kusebentisa loko labakufundziswa emasontfweni abo. Lesinye sibonelo saloko ngunasi: Emaphesenti langu-76 emaKatolika aseJalimane akholelwa kutsi kwemukelekile kutsi umuntfu lomdvuna nalomsikati bahlale ndzawonye bangakashadi—lokungumbono longahambisani netimfundziso telisontfo labo kanye neteliBhayibheli. (1 Khorinte 6:18; Hebheru 13:4) EmaKatolika akusiwo kuphela langaphili ngetintfo latifundza esontfweni. Bafundisi bemasontfo lamanyenti bakhala ngekutsi emalunga emasontfo abo atiphatsisa “kwebantfu labangakholelwa kuNkulunkulu.”

Letibonelo tisiholela embutweni lotsi: Simdzinga mbamba yini Nkulunkulu? Lombuto awucali kuba khona. Wacala kuvela emakhasini ekucala eliBhayibheli. Kuze sitfole imphendvulo yalombuto, asesinake imibuto leminyenti levela encwadzini yaGenesisi.