Kungani Nkulunkulu Avumela Labaneligunya Kutsi Bacindzetele Labo Labangenalo?

LiBhayibheli lilandzisa ngetindzaba letibuhlungu tekucindzetelwa kwebantfu labete ligunya, bacindzetelwa ngulabo labanalo. Loku kusikhumbuta indzaba yaNabhothi.a Ahabi, inkhosi yaka-Israyeli leyabusa kusukela ngabo-940 B.C.E., wavumela umkakhe Jezebeli kutsi abulale Nabhothi nemadvodzana akhe kute lenkhosi itsatse sivini sakhe. (1 Emakhosi 21:1-16; 2 Emakhosi 9:26) Kungani Nkulunkulu avumela kutsi emandla ekubusa asetjentiswe ngesibhuku ngalendlela?

Asesikhulume kabanti ngalesinye sizatfu lesibalulekile lesitsi: Nkulunkulu akawacambi emanga. (Thithusi 1:2) Lamavi ahlobana kanjani nekucindzetelwa kwebantfu? Empeleni kusukela ekucaleni Nkulunkulu wecwayisa bantfu ngekutsi kungamlaleli yena kutawuletsa umphumela lobuhlungu, lokufa. Njengoba Nkulunkulu asho, bantfu solo bayafa kusukela ekuvukeleni kwasensimini yase-Edeni. Ecinisweni umuntfu wekucala lowabulawa, bekungu-Abela, abulawa ngumnakabo Khayini ngesibhuku.—Genesisi 2:16, 17; 4:8.

Nalikhuluma ngemlandvo webantfu kusukela ngaleso sikhatsi, liVi laNkulunkulu liveta kutsi bantfu bayahlukubeteka nabangephansi kwekubusa kwalomunye umuntfu. (Umshumayeli 8:9) Abonakale aliciniso yini lamavi? Jehova wecwayisa bantfu bakhe, sive saka-Israyeli kutsi emakhosi abo abeyawubacindzetela abangele kutsi bakhale kuNkulunkulu. (1 Samuweli 8:11-18) Ngisho neNkhosi Solomoni lebeyihlakaniphile yabacindzetela kakhulu bantfu lebeyibabusa. (1 Emakhosi 11:43; 12:3, 4) Emakhosi lamabi, lafaka ekhatsi Ahabi, abebaphatsa ngesibhuku nangesibulawela bantfu. Asewucabange ngaloku: Kube Nkulunkulu abesolo akuvimbela kuphatfwa kabi kwebantfu lokunjalo, bekungeke yini loko kusho kutsi abephosisa ngalamavi labewashito?

Khumbula nekutsi Sathane watsi bantfu bakhonta Nkulunkulu ngobe kukhona labatakutfola. (Jobe 1:9, 10; 2:4) Kube Nkulunkulu wativikela tinceku takhe kulo lonkhe luhlobo lwekuphatfwa kabi, loko bekungeke yini kufakazele kutsi Sathane abekhuluma liciniso? Ngetulu kwaloko, kube Nkulunkulu wavimbela tonkhe tinhlobo tekuphatfwa kabi kwanome ngabe ngubani, abe ngeke yini abonakale angumcambimanga lomkhulu? Nangabe bebangatfola kuvikeleka lokunjalo, labanyenti bangacabanga kutsi bantfu bangakhona kutibusa ngemphumelelo ngaphandle kwaNkulunkulu. Kodvwa liVi laNkulunkulu lisho lokwehlukile, litsi umuntfu angeke akhone nhlobo kutibusa. (Jeremiya 10:23) Sidzinga kutsi uMbuso waNkulunkulu ufike; kungaleso sikhatsi kuphela lapho kungalungi kuyawuphela khona.

Ingabe loko kusho kutsi kute yini Nkulunkulu lakwentako mayelana nekuphatfwa kabi kwebantfu? Cha. Cabanga nganaku lokubili lakwentako: Kwekucala, ukuchaza kabanti kuphatfwa ngesibhuku kutsi kusho kutsini. Sibonelo saloko kutsi liVi lakhe lisitjela yonkhe imininingwane lemayelana nelisu laJezebeli lekubulala Nabhothi. LiBhayibheli liphindze lisembulele kutsi tento letinjalo letimbi tikhutsatwa ngumbusi lonemandla lofuna kufihla bunguye bakhe. (Johane 14:30; 2 Khorinte 11:14) LiBhayibheli limbita ngekutsi nguSathane Develi. Nkulunkulu ubuchaza kabanti bubi kanye nekucindzetelwa aphindze avete umtfombo wako, ngenca yaloko usisita kutsi singenti tintfo letimbi. Loko kusenta sikhone kuhlala sinelitsemba lelikusasa.

Kwesibili, Nkulunkulu usiniketa litsemba lelingulonalona lekutsi kutawuphela kuphatfwa kabi kwebantfu. Indlela labhabata ngayo indzaba yaJezebeli na-Ahabi, nalase ubehlulela uphindze ubajezisa ngayo—kanye nalabanye labanyeti labafanana nabo—iyasicinisekisa kutsi ngalelinye lilanga utawubajezisa bonkhe bantfu labenta lokubi. (Tihlabelelo 52:1-5) Nkulunkulu uphindze asinikete litsemba lekutsi ngekushesha utawucedza imiphumela yebubi kulabo labamtsandzako.b Ngako-ke, siyeta sikhatsi lapho Nabhothi lobeketsembekile kanye nemadvodzana akhe bayawuphila phakadze emhlabeni lolipharadisi lapho kungekho muntfu loyawucindzetelwa khona.—Tihlabelelo 37:34.