IMIBUTO LEVELA KUBAFUNDZI
Kufanele yini emaKhristu ashise sidvumbu semuntfu?
ImiBhalo ayisho kutsi kubi kushisa sidvumbu.
EBhayibhelini kunetindzaba letiveta kutsi tidvumbu talabafile nobe ematsambo abo bekashiswa. (Josh. 7:25; 2 Khr. 34:4, 5) Kungenteka loku bekuluphawu lwekutsi labo bantfu bebangakufaneli kungcwatjwa ngendlela lehloniphekile. Kodvwa kushiswa kwebantfu labafile bekungasho ngaso sonkhe sikhatsi kutsi bebangakufaneli kungcwatjwa ngendlela lehloniphekile.
Loku sikubona endzabeni yekufa kweNkhosi Sawula kanye nemadvodzana ayo lamatsatfu. Bobane bafa ngesikhatsi balwa nemaFilisti. Lomunye walamadvodzana bekunguJonathani, lobekangumngani lomkhulu waDavide futsi etsembekile kuye. Ngesikhatsi ema-Israyeli lanesibindzi lebekahlala eJabeshi Gileyadi eva ngaloko lobekwentekile, ahamba alandza letidvumbu letine, atishisa ase angcwaba ematsambo. Ngekuhamba kwesikhatsi, Davide wawancoma lama-Israyeli ngaloko lakwenta.—1 Sam. 31:2, 8-13; 2 Sam. 2:4-6.
ImiBhalo yetsembisa kutsi labafile batawuvuswa—lokuyindlela yaNkulunkulu yekubuyisela bantfu ekuphileni. Ngisho nobe umuntfu lofile ashisiwe nobe angakashiswa, Jehova unawo emandla ekumvusa sekanemtimba lomusha. Ngesikhatsi emaHebheru lamatsatfu letsembekile kutsiwa atawushiswa emlilweni lowesabekako njengobe bekusho iNkhosi Nebukhadnezari, akazange esabe futsi acabange kutsi Nkulunkulu bekangeke akhone kuwavusa. (Dan. 3:16-18) Kwenteka intfo lefanako nasetincekwini taJehova letetsembekile letabulawa etinkambu temaNazi futsi tabese tiyashiswa. Tinceku letinyenti taNkulunkulu tabulawa tichumane nobe tafa ngaletinye tindlela kangangekutsi kute ngisho nalokuncane lokwasala. Nobe kunjalo, siyaciniseka kutsi titawuvuswa.—Semb. 20:13.
Akudzingeki kutsi Jehova aphindze ahlanganise umtimba umuntfu labekanawo kute amvuse. Loku kubonakala ngendlela Nkulunkulu lavusela ngayo emaKhristu lagcotjiwe ekuphileni kwasezulwini. NjengaJesu ‘lowavuswa angumoya,’ emaKhristu lagcotjiwe avuswa solo angulabantfu lebekangibo kodvwa sekanemtimba wemoya. Kute incenye yemtimba wawo loyinyama lavuswa nayo ezulwini.—1 Phet. 3:18; 1 Khor. 15:42-53; 1 Joh. 3:2.
Ematsemba lesinawo ekuvuswa kwalabafile akayi ngekutsi yini leyentiwako ngesidvumbu semuntfu, kodvwa aya ngekukholwa lesinako emandleni aNkulunkulu kanye nesifiso lanaso sekugcwalisa tetsembiso takhe. (Imis. 24:15) Kuliciniso kutsi kungenteka singayicondzi indlela Nkulunkulu lavuse ngayo labo labebafile esikhatsini lesendlulile nekutsi utakwenta njani esikhatsini lesitako. Nanobe kunjalo, litsemba letfu solo silibeke kuJehova. Usinikete “sicinisekiso” ngekutsi avuse Jesu.—Imis. 17:31; Luk. 24:2, 3.
EmaKhristu atawube enta kahle nakacabanga ngemasiko endzawo, imibono yebantfu basemmangweni, kanye nemitsetfo yendzawo mayelana nendzaba yekungcwatjwa kwebantfu. (2 Khor. 6:3, 4) Ngako-ke kutsi umuntfu lofile uyashiswa nobe akashiswa, leso sincumo semuntfu ngamunye nobe semndeni wakhe.