Bengiticabangela mine kuphela

KUPHILA KWAMI KWESIKHATSI LESENGCILE:

Eminyakeni yekucala lembalwa yekuphila kwami, umndeni wakitsi wawuhlala eceleni kwaseLeipzig, eMphumalanga yeJalimane, lesedvutane nemncele waseCzech kanye newasePoland. Ngatsi nangineminyaka lesitfupha budzala, umndeni wakitsi watfutsela kulamanye emave ngenca yemsebenti wababe, sacale saya eBrazil sase siya e-Ecuador.

Nangineminyaka lengu-14 budzala, ngatfunyelwa esikolweni lesiseJalimane futsi bengihlala khona. Ngesizatfu sekutsi batali bami bebakhashane, bahlala eNingizimu Melika, bekufanele ngitinakekele mine. Ngafundza kutetsemba kakhulu. Benginganendzaba nekutsi tento tami tibatsintsa njani labanye.

Nasengineminyaka lengu-17 budzala, batali bami babuya eJalimane. Ngacale ngahlala nabo. Kodvwa ngenca yekutsi besenginesimo sengcondvo sekutetsemba, kwaba matima kutsi ngikhone kuphindze ngihlale nemndeni wakitsi. Nanginemnyaka lengu-18, ngahamba ekhaya.

Bengingenetiseki, ngifuna kutfola injongo yekuphila. Ngemuva kwekubona tindlela tekuphila kanye netinhlangano letehlukehlukene, ngaciniseka kutsi intfo lencono lengingayenta ngekuphila kwami kutsi ngikusebentisele kuhamba ngibuka leplanethi yetfu lenhle ngembikwekutsi bantfu bayone.

Ngasuka eJalimane, ngatsenga sidududu futsi ngalibangisa e-Afrika. Kodvwa ngekushesha kwadzingeka kutsi ngibuyele eYurophu kuze ngiyolungisa sidududu sami. Ngekushesha ngemuva kwaloko, ngefika elugwini lwasePortugal. Ngancuma kutsi ngisishiye lesidududu ngisale ngihamba ngesikebhe.

Ngatihlanganisa nelicembu lebantfu labasha lebelilungela kuhamba lidzabule lwandle lwase-Atlantic. Kulelo cembu ngahlangana naLaurie, lowagcina angumkami. Ekucaleni satsatsa umkhumbi saya esihlengeni saseCaribbean. Ngemuva kwekuhlala sikhashana ePuerto Rico, sabuyela eYurophu. Besetsemba kutsi sitawutfola sikebhe lebesingasishintja sibe sikebhe lesinendzawo yekuhlala. Kodvwa ngemuva kwekufuna tinyanga letintsatfu, sabese siyayekela. Ngabitwa kutsi ngijoyine libutfo lemphi laseJalimane.

Ngacitsa tinyanga letingu-15 ngisebutfweni lemasotja asemantini eJalimane. Ngaleso sikhatsi, mine naLaurie sashada futsi salungela kuchubeka nemphilo yetfu yekuvakasha. Ngembikwekutsi ngijoyine libutfo lemphi, besesitsenge umtimba wesikebhe. Ngatsi nasengikulelibutfo, sacala kuwushintja kancane kancane lomtimba walesikebhe waba sikebhe lesincane. Sahlela kutsi sitawuhlala kuwo futsi sichubeke sivakasha sibuka leplanethi lenhle. Kungaleso sikhatsi, ngemuva kwekuyekela kulelibutfo kodvwa ngaphambi kwekutsi sicedze kulungisa lesikebhe, lapho savakashelwa khona BoFakazi BaJehova futsi sacala kutadisha liBhayibheli.

INDLELA LIBHAYIBHELI LELAKUGUCULA NGAYO KUPHILA KWAMI:

Ekucaleni, bengingasiboni sidzingo sekushintja tintfo letinyenti ekuphileni kwami. Bengishadile naloyo lebengihlala naye, futsi besengivele ngikuyekele kubhema. (Efesu 5:5) Mayelana nesifiso setfu sekuvakasha etindzaweni temhlaba, nganginemcondvo wekutsi kusebentisa kuphila kwetfu sibuka indalo lenhle yaNkulunkulu bekuyintfo lezuzisa kakhulu.

Kodvwa ecinisweni bekudzingeka kutsi ngente tingucuko letitsite, ikakhulukati esimilweni sami. Ngenca yekutsi bengitati futsi ngitetsemba kakhulu, benginaka kakhulu emakhono ami kanye naloko lengikufezile. Bengiticabangela mine kuphela.

Ngalelinye lilanga, ngafundza inshumayelo yaJesu ledvumile yaseNtsabeni. (Matewu, sehluko 5-7) Ekucaleni bengingakucondzi kujabula Jesu labekhuluma ngako. Nasi sibonelo: Watsi injabulo itfolwa ngulabo labalambile futsi labomile. (Matewu 5:6) Ngatibuta kutsi kweswela kungamenta njani umuntfu kutsi ajabule. Njengobe ngichubeka ngifundza, ngabona kutsi sonkhe sinesidzingo sekunaka tintfo letiphatselene naNkulunkulu, kodvwa kufanele sitfobeke sivume kutsi sinaso leso sidzingo kuze kutsi sisenetise. Kunjengobe Jesu asho, watsi: “Bayajabula labo labanakisisa tintfo letiphatselene naNkulunkulu.”​—Matewu 5:3.

Ngemuva kwekucala sifundvo setfu seliBhayibheli eJalimane, mine naLaurie satfutsela eFrance, kamuva saya eTaliyane. Nobe kukuphi lapho besiya khona besitfola BoFakazi BaJehova. Lwangitsintsa kakhulu lutsandvo lwabo lolucotfo kanye nebunye labanabo. Ngabona kutsi vele BoFakazi bamunye emhlabeni wonkhe. (Johane 13:34, 35) Ngekuhamba kwesikhatsi, mine naLaurie sabhajatiswa saba BoFakazi BaJehova.

Ngemuva kwekubhajatiswa, ngachubeka ngenta tingucuko esimilweni sami. Sancuma kuhamba ngemkhumbi siye elugwini lwase-Afrika, siphindze sisuke sidzabule lwandle i-Atlantic siye eMelika. Bekungesikhatsi silapho elwandle, kungitsi sobabili nje kuphela esikebheni lesincane, ekhatsi nelwandle, lapho ngabona khona kutsi ngimncane kangakanani nangicatsaniswa neMdali wetfu lomangalisako. Njengobe benginesikhatsi lesinyenti, (ngobe kute lokungako longakwenta nawusekhatsi elwandle), ngasisebentisela kufundza liBhayibheli. Ngatsintfwa kakhulu kulandzisa lokumayelana nekuphila kwaJesu kwasemhlabeni. Abeyindvodza lete sono futsi lenemakhono langeke acatsaniswe nalutfo, kodvwa akazange atiphakamise. Kuphila kwakhe bekungakabaluleki kuye, kodvwa nguYise wakhe losezulwini labebalulekile.

Njengobe ngizindla ngesibonelo saJesu, ngabona kutsi bekudzingeka ngibeke uMbuso waNkulunkulu kucala ekuphileni kwami kunekutsi ngetame kuwufaka etintfweni letinyenti lebengifuna kutenta. (Matewu 6:33) Ngesikhatsi sifika eMelika, sancuma kutsi sisale sihlala lapho futsi sinake kukhonta kwetfu Nkulunkulu.

INDLELA LENGIZUZE NGAYO:

Kuphila kwami kwangaphambili kwekuticabangela mine kuphela bekwenta kutsi ngingaciniseki ngetintfo letinyenti. Kodvwa nyalo sengitfole umtfombo wekuhlakanipha lomkhulu longangicondzisa. (Isaya 48:17, 18) Kuphila kwami sekunenjongo, lokukukhonta Nkulunkulu nekusita labanye kutsi bafundze ngaye, intfo lengingakaze ngibe nayo.

Ngekusebentisa timiso teliBhayibheli, mine naLaurie sikhonile kwenta umshado wetfu kutsi ucine kakhulu. Sibusiswe nangendvodzakati lenhle, lekhule yati futsi itsandza Jehova.

Akusho kutsi kuphila kwetfu bekuhlala kumelula. Kodvwa-ke ngekusitwa nguJehova, sitimisele kutsi singapheli emandla nobe siyekele kwetsembela kuye.​—Taga 3:5, 6.