Uyakwenta Yini Loko Nkulunkulu Lakucela Kutsi Ukwente?

“Ungacela nobe yini loyifunako, mine ngitakwentela yona.” Ngeke ukhululeke kusho lamavi kumuntfu longamati nobe longakametayeli kangako. Kodvwa ngeke ube nenkinga yekuwasho kumngani wakho lomkhulu. Kuyatentakalela kubangani labakhulu kutsi bentelane tintfo lomunye wabo laticelako.

LiBhayibheli liveta kutsi Jehova uvame kwenta tintfo latiko kutsi titawubajabulisa labo labamkhontako. Nasi sibonelo: INkhosi Davide lebeyinebuhlobo lobuhle naNkulunkulu yatsi: “Simakadze, Nkulunkulu wami, timangaliso losentele tona tinyenti. . . . Kube bengingatilandzisa tonkhe betingeke tibaleke tonkhe.” (Tihlabelelo 40:5) Ngetulu kwaloko, Jehova ubentela tintfo letitawubajabulisa nalabo labasengakamati, ‘abanike nekudla lokunyenti futsi agcwalise tinhlitiyo tabo ngenjabulo.’​—Imisebenti 14:17.

Njengobe Jehova akujabulela kwenta tintfo letijabulisa labanye, kunengcondvo kulindzela kutsi labo labafuna kuba bangani bakhe nabo batawukwenta tintfo ‘letitawujabulisa’ inhlitiyo yakhe. (Taga 27:11) Kodvwa yini vele lokufanele uyente kuze ujabulise Nkulunkulu? LiBhayibheli liyasiphendvula litsi: “Ningakukhohlwa kwenta lokuhle nekwabela labanye loko leninako, ngobe Nkulunkulu uyajabula ngeminikelo lenjalo.” (Hebheru 13:16) Loku kusho kutsi kwenta tintfo letinhle kanye nekwabelana nalabanye ngiko kuphela yini lokudzingekako kuze sijabulise Jehova?

LiBhayibheli litsi: “Ngaphandle kwekukholwa ngeke kwenteke kutsi umuntfu amjabulise Nkulunkulu.” (Hebheru 11:6) Abrahama “wabitwa ngekutsi ngumngani waJehova” ngemuva kwekutsi ‘abe nekukholwa kuYe.’ (Jakobe 2:23) NaJesu Khristu wagcizelela kutsi nangabe sifuna kutfola sibusiso kuNkulunkulu kufanele ‘sikholwe kuYe.’ (Johane 14:1) Ungaba nako njani lokukholwa Nkulunkulu lakulindzele kulabo lasondzelana nabo? Longacala ngako kutsi utadishe liVi laNkulunkulu liBhayibheli njalo. Nawenta njalo utawutfola “lwati lwentsandvo yaNkulunkulu lolungulonalona” futsi ufundze kutsi ‘ungamjabulisa njani ngalokuphelele.’ Njengobe utawube utfutfuka ekumatini kahle Jehova nasekusebentiseni loko lokufundzako mayelana netintfo latilindzele kitsi, lizinga lokholelwa ngalo kuye litawukhula futsi utawusondzela kakhulu kuye kunakucala.​—Kholose 1:9, 10.