IMIBUTO YELIBHAYIBHELI IYAPHENDVULWA
Liyini Lilanga Lekwehlulela?
Yini letawukwenta kutsi lilanga lekwehlulela libe sikhatsi lesijabulisako?
Etikhatsini tekubhalwa kweliBhayibheli, Nkulunkulu abesebentisa tikhulu kuze akhulule bantfu bakhe nabaphatfwa kabi. (Tikhulu 2:18) LiBhayibheli lichaza leLilanga Lekwehlulela lelitako ngekutsi sikhatsi lesijabulisako lapho Jehova, uMehluleli wemhlaba wonkhe, atawukhulula khona bantfu ekuphatfweni kabi.—Fundza Tihlabelelo 96:12, 13; Isaya 26:9.
Nkulunkulu ubeke Jesu kutsi abentele kulunga labaphilako nalabafile. (Imisebenti 10:42; 17:31) Bantfu labanyenti bafe bangamati Nkulunkulu. NgeLilanga Lekwehlulela, Jesu utawubavusa bantfu labanjalo kuze nabo bamati Nkulunkulu weliciniso futsi bamtsandze.—Fundza Imisebenti 24:15.
Yini letawubangela kutsi Lilanga Lekwehlulela litsatse iminyaka leyinkhulungwane?
Bantfu labafile batawuvuswa kuleminyaka leyinkhulungwane. (Sembulo 20:4, 12) Labantfu batawudzinga sikhatsi sekufundza ngetindlela taNkulunkulu nekumlalela. Ngalokwehlukile kuloko bantfu labakushoko, liBhayibheli liveta kutsi bantfu batawehlulelwa ngaloko labatawukwenta nasebavusiwe.—Fundza Roma 6:7.
LiBhayibheli liphindze lichaze lilanga lekwehlulela lelitawufika ngekushesha ngaphambi kwekutsi kucale leminyaka leyinkhulungwane. Lelo langa liphindze libitwe ngekutsi sikhatsi sekuphela, njengobe kuvetiwe etihlokweni letisekucaleni kwalomagazini. Ngalelo langa, Nkulunkulu utawususa bonkhe bantfu labangamhloniphi nalababi. (2 Phetro 3:7) Ngako-ke, kufanele siciniseke kutsi siyalukhombisa lutsandvo lesinalo ngaNkulunkulu.—Fundza 2 Phetro 3:9, 13.